តើវត្តមានក្រុមគ្រួសារលោក ដូណាល់ ត្រាំ ក្នុងក្រុមការងារផ្ទេរអំណាចជាអំពើបក្សពួកនិយម?
ចុះផ្សាយនៅថ្ងៃ៖
ស្តាប់ - ០៤:០៥
លោក ដូណាល់ ត្រាំ បានតែងតាំងកូនបង្កើតរបស់គាត់ចំនួនបីនាក់ចូលទៅក្នុងសមាសភាពក្រុមការងារផ្ទេរអំណាចសំរាប់រដ្ឋាភិបាលថ្មី។ កូនទាំងបីនាក់នោះរួមមាន៖ Eric, Donald Junior និង Ivanka។ ក្រៅពីកូនបង្កើតទាំងបីនាក់នោះ លោក ត្រាំ ក៏បានបញ្ចូលកូនប្រសាររបស់គាត់ម្នាក់គឺ Jared Kushner (ស្វាមីនាង Ivanka) ចូលទៅក្នុងក្រុមការងារនោះផងដែរ។ វត្តមានសមាជិកក្រុមគ្រួសាររបស់អនាគតប្រធានាធិបតីអាមេរិកថ្មី ក្នុងការរៀបចំផ្ទេរអំណាចនេះកំពុងតែចោទជាចម្ងល់យ៉ាងខ្លាំង។ តើការតែងតាំងនេះស្របច្បាប់ដែរឬទេ? តើគេអាចចាត់ទុកថានេះជាអំពើបក្សពួកនិយមបានដែរឬទេ?
បណ្តាសារព័ត៌មានអាមេរិក និងអ្នកវិភាគនយោបាយមួយចំនួនកំពុងបង្ហាញការព្រួយបារម្ភយ៉ាងខ្លាំង ជុំវិញវត្តមានសមាជិកក្រុមគ្រួសារលោក ដូណាល់ ត្រាំ នៅក្នុងសមាសភាពក្រុមការងាររៀបចំផ្ទេរអំណាចសំរាប់រដ្ឋាភិបាលថ្មី។ សព្វថ្ងៃនេះ លោក ដូណាល់ ត្រាំ បានបញ្ចូលកូនបង្កើតចំនួន ៣ នាក់ និងកូនប្រសារប្រុសម្នាក់ទៅក្នុងក្រុមការងារផ្ទេរអំណាចនោះ។ ក្រុមការងារនេះមានភារកិច្ចរៀបចំជ្រើសរើសបុគ្គលិករដ្ឋាភិបាលសហព័ន្ធ និងតែងតាំងមន្រ្តីនៅតាមក្រសួងនានារបស់រដ្ឋាភិបាលថ្មី។ ក្រុមការងារនេះត្រូវធានាថា ការផ្ទេរអំណាចនឹងត្រូវធ្វើយ៉ាងរលូន អោយបានមុនថ្ងៃទី២០ មករា ២០១៧។ ថ្ងៃនោះហើយដែលលោក ដូណាល់ ត្រាំ នឹងចូលកាន់តំណែងជាប្រធានាធិបតីអាមេរិកផ្លូវការ។
ក្រោយពីទទួលជ័យជំនះ លោក ដូណាល់ ត្រាំ ធ្លាប់បានប្រកាសថានឹងប្រគល់មុខជំនួញរកស៊ីទាំងអស់អោយកូនបង្កើតជាអ្នកគ្រប់គ្រង។ តាមរយៈនេះ លោកនឹងបង្កើតក្រុមហ៊ុនផ្ទេរកិច្ចការរកស៊ីមួយ (blind trust) ដោយលោកគ្មានសិទ្ធិចូលជ្រៀតជ្រែកត្រួតពិនិត្យឡើយ។ ហើយក្រុមហ៊ុនថ្មីនេះនឹងមានភារកិច្ចតាមដានការគ្រប់គ្រងមុខជំនួញរបស់កូនបង្កើតគាត់។ បើតាមលោក Daniel DiSalvo អ្នកជំនាញប្រចាំ City College នៅទីក្រុងញ៉ូវយកបានវិភាគថា ករណីលោក ដូណាល់ ត្រាំ មានចំនុចប្រទាក់ក្រឡាគ្នាច្រើនងាយស្រួលណាស់ ក្នុងការបង្កអោយមានជម្លោះផលប្រយោធន៍ ឬការជួញដូរឥទ្ធិពលរវាងមជ្ឈដ្ឋាននយោបាយ និងមុខជំនួញឯកជន។
កូនប្រសារដ៏អាថ៌កំបាំង និងដ៏មានឥទ្ធិពល
បើយោងតាមសារព័ត៌មានអាមេរិកនានា ក្នុងកំឡុងពេលឃោសនាបោះឆ្នោត និងរហូតមកដល់ពេលបច្ចុប្បន្ននេះ កូនប្រសារគឺ Jared Kushner ជាមនុស្សជំនិតបំផុត ដែលលោក ដូណាល់ ត្រាំ តែងពិគ្រោះយោបល់ជាមួយ។ ជាអ្នកជំនួញវ័យក្មេងផែ្នកអចលនទ្រព្យ Jared Kushner មានខ្សែស្រឡាយចេញពីគ្រួសារជ្វីសអ័រតូដុកដ៏មហាអភិរក្សនិយមដើមកំណើតប៉ូឡូញ។ ទស្សនាវដ្តី Vanity Fair ប្រៀបប្រដូច Jared Kushner ទៅនឹងគ្រូធ្មប់សូត្រមន្តអាគម ដែលធ្វើអោយលោក ដូណាល់ ត្រាំ តែងសុំស្តាប់យោបល់ជានិច្ច។
លោកស្រី Jeanne Zaino សាស្រ្តាចារ្យវិទ្យាសាស្រ្តនយោបាយប្រចាំ Iona College នៅទីក្រុងញ៉ូវយកបានវិភាគថា Jared Kushner ឡើងរះត្រដែតបែបនេះ ព្រោះតែកូនប្រសាររូបនេះបានបង្ហាញភាពស្មោះស្ម័គ្រចំពោះឱពុកក្មេក។ គេជាមនុស្សអាថ៌កំបាំងពុំដែលនិយាយជាមួយសារព័ត៌មាន ឬបញ្ចេញយោបល់លើបណ្តាញសង្គមឡើយ។ ហើយរូបគេនេះហើយជាអ្នកសរសេរសុន្ទរកថាមួយចំនួនអោយលោក ដូណាល់ ត្រាំ។ ថ្មីៗនេះ គេក៏ឃើញ Jared Kushner បានជួបសន្ទនាទល់មុខគ្នាជាមួយលោក Denis McDonough នាយកខុទ្ទកាល័យរបស់លោកប្រធានាធិបតី បារ៉ាក់ អូបាម៉ា ដើម្បីរៀបចំកិច្ចការក្នុងសេតវិមាន។
យោងតាមសារព័ត៌មាន New York Times និង Wall Street Journal លោក Jared Kushner ទំនងជាបានពិគ្រោះយោបល់ជាមួយមេធាវីម្នាក់ ដើម្បីចង់ដឹងពីលទ្ធភាពតាមផ្លូវច្បាប់ ក្នុងការដែលខ្លួនចង់ក្លាយជាសមាជិករដ្ឋាភិបាល។ អ្វីដែលភ្ញាក់ផ្អើលទៅទៀតនោះ គឺ Jared Kushner ក៏ជាអ្នកដែលបានផាត់លោក Chris Christie ចេញពីតំណែងប្រធានក្រុមការងារផ្ទេរអំណាច។ ទង្វើនេះត្រូវបានគេសន្និដ្ឋានថាជាការសងសឹកអោយឱពុករបស់ខ្លួន ដែលធ្លាប់បានជាប់ពន្ធាគារចំនួន ២ ឆ្នាំដោយសារការចោទប្រកាន់របស់លោក Chris Christie ពេលមានមុខតំណែងជាអគ្គរដ្ឋអាជ្ញាប្រចាំរដ្ឋ New Jersey។
ច្បាប់ប្រឆាំងអំពើបក្សពួកនិយម (Federal Law Ant-Nepotism Law)
វេបសាយ Politico បានពិគ្រោះយោបល់ជាមួយមេធាវីមួយចំនួន។ បើតាមមេធាវីទាំងនោះ ប្រសិនបើលោក ដូណាល់ ត្រាំ តែងតាំងកូនប្រសារគាត់ជាសមាជិករដ្ឋាភិបាល វាប្រាកដណាស់ នេះជាអំពើបក្សពួកនិយម។ សូមបញ្ជាក់ថា សហរដ្ឋអាមេរិកមានច្បាប់មួយ ដែលគេហៅថា ច្បាប់ប្រឆាំងអំពើបក្សពួកនិយម។ ច្បាប់សហព័ន្ធនេះត្រូវបានអនុម័តកាលពីឆ្នាំ ១៩៦៧។ ហើយច្បាប់នេះបានចែងច្បាស់ហាមឃាត់មិនអោយអ្នកមានតួនាទីខ្ពស់ក្នុងរដ្ឋាភិបាលសហព័ន្ធ (ជាពិសេសប្រធានាធិបតី) តែងតាំងសមាជិកក្រុមគ្រួសាររបស់ខ្លួន ឬគ្រួសារសាច់ថ្លៃអោយចូលបំរើការមានប្រាក់បៀវត្សរ៍ក្នុងជួររដ្ឋាភិបាល។
ប៉ុន្តែ ច្បាប់នេះហាក់មានភាពស្រពិចស្រពិលពុំបានបញ្ចាក់ច្បាស់លាស់ជុំវិញឋានៈទីប្រឹក្សា។ ដកស្រង់សំដីនៅក្នុងទស្សនាវដ្តី L'Express លោក Jean-Eric Brana សាស្រ្តាចារ្យប្រចាំសាកលវិទ្យាល័យប៉ារីសទី ២ បានបញ្ជាក់ថា វត្តមានកូនបង្កើត និងកូនប្រសាររបស់លោក ដូណាល់ ត្រាំ នៅក្នុងក្រុមការងារផ្ទេរអំណាចគឺ មិនខុសច្បាប់ទេ។ ប៉ុន្តែ វាគ្រាន់តែជាការភ្ញាក់ផ្អើលមិនដែលធ្លាប់មានក្នុងប្រវត្តិសាស្រ្តអាមេរិក។ ផ្ទុយទៅវិញ ប្រសិនបើលោក ត្រាំ តែងតាំងពួកគេចូលជាសមាជិករដ្ឋាភិបាល ប្រាកដណាស់ វានឹងក្លាយជាអំពើខុសច្បាប់។
បើតាមសារព័ត៌មាន Washington Post លោក ដូណាល់ ត្រាំ អាចពង្វាងច្បាប់នេះ ដោយអាចតែងតាំងសមាជិកគ្រួសារគាត់ចូលទៅក្នុងក្រុមការងារប្រចាំព្រឹទ្ធសភា។
ម៉្យាងទៀត ប្រធានាធិបតីអាចដាក់បញ្ចូលបុគ្គលណាក៏បានទៅក្នុងខុទ្ទកាល័យស្ទួនមួយ ដែលគេហៅការិយាល័យប្រតិបត្តិប្រធានាធិបតី (EOP)។ បង្កើតឡើងចាប់តាំងពីឆ្នាំ១៩៣៩ ការិយាល័យនេះមានដំណើរការស្របគ្នាបេះបិទទៅនឹងខុទ្ទកាល័យប្រធានាធិបតី។ សមាជិកខ្លះមានឥទ្ធិពលដូចរដ្ឋមន្រ្តីអញ្ចឹង។ ការតែងតាំងសមាជិកក្នុងការិយាល័យនេះពុំចាំបាច់សុំការអនុម័តពីសភាឡើយ។ ច្បាប់ប្រឆាំងអំពើបក្សពួកនិយមក៏ពុំបានបញ្ជាក់លំអិតពីការតែងតាំងនៅក្នុងការិយាល័យនេះឡើយ។ ជាទ្រឹស្តី លោក ត្រាំ អាចតែងតាំងកូនគាត់ និងកូនប្រសារនៅក្នុងការិយាល័យនោះបាន ដរាបណាពួកគេមិនទទួលប្រាក់បៀវត្សរ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ