លោកបាន គីមូនបញ្ចប់តំណែងអគ្គលេខាធិការអង្គការសហប្រជាជាតិជាមួយនឹងលទ្ធផលខកចិត្តខ្លាំង
ចុះផ្សាយនៅថ្ងៃ៖
ស្តាប់ - ០៦:០៤
ចាប់ពីថ្ងៃទី១ មករា ឆ្នាំ ២០១៧ អង្គការសហប្រជាជាតិមានអគ្គលេខាធិការថ្មី គឺលោកអង់តូនីញ៉ូ ហ្គូទែរ៉េស។ អតីតនាយករដ្ឋមន្រ្តីព័រទុយហ្កាល់រូបនេះបានចូលជំនួសកន្លែងលោកបាន គីមូនដែលបានកាន់តំណែងកំពូលពិភពលោកមួយនេះអស់រយៈពេល ២អាណត្តិចំនួន ១០ឆ្នាំ។ តើអ្វីទៅជាលទ្ធផលដែលលោកបាន គីមូនសម្រេចបានក្នុងរយៈពេល ១០ឆ្នាំក្នុងនាមជាអគ្គលេខាធិការអង្គការសហប្រជាជាតិ?។
ក្នុងរយៈពេល ១០ឆ្នាំជាអគ្គលេខាធិការអង្គការសហប្រជាជាតិ លោកបាន គីមូនដែលជាជនជាតិកូរ៉េមិនបានសម្រេចអ្វីឲ្យបានដុំកំភួនប៉ុន្មានទេសម្រាប់ពិភពលោក ឬគេអាចនិយាយតាមបែបម្យ៉ាងទៀតថា លោកបាន គីមូនមិនអាចប្រើអំណាចរបស់ខ្លួនដើម្បីឲ្យមានឯកភាពនៅផ្ទៃក្នុងរបស់អង្គការពិភពលោកមួយនេះទេ។ ផ្ទុយទៅវិញក្នុងរយៈពេលប៉ុន្មានឆ្នាំកន្លងទៅ មានវិបត្តិមួយចំនួនបែរជាបានធ្វើឲ្យមានការប្រជែងកម្លាំងគ្នា និងការដណ្តើមប្រយោជន៍គ្នារវាងប្រទេសមហាអំណាច ពិសេសរវាងសមាជិក និងសមាជិកអចិន្ត្រែយ៍នៃក្រុមប្រឹក្សាសន្តិសុខតែម្តង ពិសេសវិបត្តិដែលកំពុងអូសបន្លាយ និងស្មុគស្មាញនៅក្នុងប្រទេសស៊ីរី។
គឺការមិនអាចដោះស្រាយវិបត្តិនៅស៊ីរីនេះហើយដែលលោកបាន គីមូនបានទទួលស្គាល់ជាសាធារណៈកាលពីថ្ងៃទី១៣ ធ្នូថា ជាបរាជ័យដែលលោកមានការសោកស្តាយខ្លាំងណាស់។ សោកស្តាយ ព្រោះលោកបាន គីមូនមិនអាចធ្វើអ្វីកើតនៅចំពោះមុខការរារាំង បិទខ្ទប់របស់ក្រុមប្រឹក្សាសន្តិសុខដោយការប្រើសិទ្ធិវ៉េតូរបស់ប្រទេសរុស្ស៊ីដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខ និងជាសម្ព័ន្ធមិត្តចាក់ទឹកមិនលេចរបស់លោកប្រធានាធិបតីស៊ីរីអាសាដ។ សោកស្តាយ ព្រោះលោកបាន គីមូនបានរង់ចាំជាង ១ឆ្នាំមុននឹងយកចិត្តទុកដាក់ខ្លាំងលើវិបត្តិស៊ីរីដោយធ្វើការតែងតាំងប្រេសិតពិសេសជាបន្តបន្ទាប់ចំនួន ៣នាក់។
នៅប៉ុន្មានខែចុងក្រោយនេះ ពោលក្នុងពេលដែលទីក្រុងអាឡិបដែលជាទីក្រុងទី២ របស់ស៊ីរីស្ថិតក្រោមការឡោមព័ទ្ធរបស់កម្លាំងរដ្ឋាភិបាលស៊ីរី និងក្រោមការទម្លាក់គ្រាប់បែករបស់រុស្ស៊ី លោកបាន គីមូនបានបញ្ចេញសកម្មភាពកាន់តែខ្លាំងដោយបានចោទលោកប្រធានាធិបតីស៊ីរីអាសាដជាសាធារណៈពីបទឧក្រិដ្ឋកម្មប្រឆាំងមនុស្សជាតិ។ តែកាយវិការយ៉ាងសកម្មនៅប៉ុន្មានខែមុនចាកចេញពីតំណែងរបស់លោកបាន គីមូនត្រូវបានគេមើលឃើញថា មិនគ្រប់គ្រាន់ និងយឺតពេលបាត់ទៅហើយ។ មហាជនទូទៅក្នុងលោកបានមើលឃើញថា លោកបាន គីមូនគួរតែចាត់វិធានការនៅស៊ីរីតាំងពីដំបូងម្ល៉េះ ពោលមិនគួរណាទុកឲ្យស្ថានការណ៍មួយនេះធ្លាក់ដុនដាបដល់ម្លឹងទេ។
ក្រៅពីវិបត្តិនៅស៊ីរី ក៏មានវិបត្តិនៅស៊ូដង់ខាងត្បូង និងនៅយេម៉ែនដែលលោកបាន គីមូនអសត្ថភាពក្នុងការដោះស្រាយ និងគ្មានជម្រើសអ្វីទុកឲ្យប្រទេសមហាអំណាចជាអ្នកចាត់វិធានការដោះស្រាយដោយទាញចំណេញនយោបាយ និងផលប្រយោជន៍សេដ្ឋកិច្ចរៀងៗខ្លួនទេ។ តើទង្វើរបៀបនេះ មិនមែនជាសក្ខីកម្មមួយដែលបញ្ជាក់ពីភាពអាណាធិបតេយ្យក្នុងលោកដែលគេអាចហៅបែបម្យ៉ាងទៀតថាជាពិភពលោកគ្មានអាណាព្យាបាលទេ ឬយ៉ាងណា?។ កុំថាឡើយដោះស្រាយវិបត្តិនយោបាយប្រទេសមួយមិនបាន សូម្បីតែវិបត្តិជនភៀសខ្លួនហូរចេញពីប្រទេសមានវិបត្តិទាំងនោះក៏លោកបាន គីមូនមិនអាចនិយាយបញ្ចុះបញ្ចូលប្រទេសសមាជិកឲ្យអនុម័តលើកិច្ចព្រមព្រៀងអន្តរជាតិមួយបានដែរ។
ជាមួយនឹងចំនួនជនភៀសខ្លួន ៦៥លាននាក់ដែលបានចាកចេញពីប្រទេសកំណើតទៅកាន់ទ្វីបអឺរ៉ុបច្រើនជាងគេ ឬមួយប្តូរទីលំនៅក្នុងស្រុកដើម្បីគេចពីសង្រ្គាម ពិភពលោកមិនដែលមានចំនួនជនភៀសខ្លួនយ៉ាងច្រើនសម្បើមដូចនេះទេគិតតាំងពីក្រោយសង្រ្គាមលោកលើកទី២។ សម្រាប់អង្គការសហប្រជាជាតិដែលបានចាប់កំណើតក្នុងឆ្នាំ ១៩៤៥ នេះជាវិបត្តិដ៏ធ្ងន់ធ្ងរជាងគេដែលខ្លួនមិនធ្លាប់ប្រទះសោះឡើយ។ រូបលោកបាន គីមូនបានអំពាវនាវឲ្យអឺរ៉ុបទទួលយកជនភៀសខ្លួនដោយលើកឡើងពីកាតព្វកិច្ចមនុស្សធម៌ និងបានព្យាយាមកែនប្រមូលថ្នាក់ដឹកនាំពិភពលោកឲ្យអនុម័តលើផែនការអន្តរជាតិមួយក្នុងការចែកគ្នាទទួលយកជនភៀសខ្លួន។ តែទីបំផុត ប្រទេសសមាជិកបានសម្រេចឲ្យលើកយកផែនការអន្តរជាតិមួយនេះទៅជជែកគ្នានៅឆ្នាំ ២០១៨ វិញ។
ចំណាត់ការលើការគោរពសិទ្ធិមនុស្សក៏ជាប្រធានបទមួយដែលលោកបាន គីមូនបានទទួលរងការរិះគន់ដែរ។ ជាក់ស្តែងក្នុងឆ្នាំ ២០០៩ ពោលទើបឡើងកាន់តំណែងអគ្គលេខាធិការអាណត្តិទី១ បាន ២ឆ្នាំ អង្គការសហប្រជាជាតិបានជាប់ចោទពីបទបិទភ្នែក និងមិនបានរារាំងការសម្លាប់រង្គាលមនុស្សប្រមាណជា ៤០ ០០០នាក់នៅក្នុងជម្លោះក្នុងប្រទេសសេរីលង្ការវាងចលនាឧទ្ទាមខ្លារំដោះតាមូល និងរដ្ឋាភិបាលទីក្រុងកូឡុំបូ។ បន្ទាប់មក រូបភាពរបស់អង្គការពិភពលោកត្រូវបានអាប់ឱនដោយរឿងអាស្រូវរំលោភផ្លូវភេទពីសំណាក់ទ័ពមួកខៀវនៅក្នុងប្រទេសអាហ្រ្វិកកណ្តាល និងសាធារណរដ្ឋប្រជាធិបតេយ្យកុងហ្គោ។ លោកបាន គីមូនទើសទាល់ចិត្តខ្លាំងណាស់ចំពោះទង្វើរបៀបនេះរបស់ទាហានមួកខៀវដែលមានតួនាទីជាអ្នកការពារពលរដ្ឋស៊ីវិលក្នុងលោក។
ក្រៅពីចំណុចអវិជ្ជមានដែលលោកបាន គីមូនមានការសោកស្តាយខ្លាំងក្នុងរយៈពេលកាន់តំណែង ១០ឆ្នាំកន្លងមក ក៏មានចំណុចវិជ្ជមានមួយចំនួនដែលលោកសម្រេចបានដែរ ពិសេសក្នុងបញ្ហាអាកាសធាតុតាមរយៈកិច្ចព្រមព្រៀងទីក្រុងប៉ារីសដែលបានចូលជាធរមានតាំងពីថ្ងៃទី២១ កញ្ញាកន្លងទៅ។ បន្ទាប់មកនៅក្នុងរយៈពេល ១០ឆ្នាំជាចៅហ្វាយពិភពលោក លោកបាន គីមូនបានធ្វើឲ្យអត្រានៃភាពក្រីក្រ និងអត្រាមរណៈមានការថយចុះក្នុងលោក។ បន្ទាប់មកទៀត លោកបាន គីមូនបង្កើតបាននូវកម្មវត្ថុអភិវឌ្ឍន៍យូរអង្វែងចំនួន ១៧កម្មវត្ថុដែលអនុញ្ញាតឲ្យមានការផ្លាស់ប្តូរពិភពលោកចាប់ពីពេលនេះទៅទល់ឆ្នាំ ២០៣០។ គឺជាកម្មវត្ថុដែលជំនួសឲ្យកម្មវត្ថុសហស្សវត្សរ៍អនុម័តកាលពីឆ្នាំ ២០០០។
គេនៅមិនទាន់ដឹងថា តើលោកអគ្គលេខាធិការថ្មីអង់តូនីញ៉ូ ហ្គូទែរ៉េសអាចសម្រេចបានលទ្ធផលគ្រាន់បើជាងលោកបាន គីមូនឬអត់ទេ។ អ្វីដែលគេដឹង លោកបាន គីមូនបានប្រគល់ឲ្យលោកអង់តូនីញ៉ូ ហ្គូទែរ៉េសនូវពិភពលោកមួយដែលកំពុងបន្តប្រេះឆា មិនច្បាស់លាស់ និងគ្របដណ្តប់ដោយវិបត្តិគ្រប់យ៉ាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ