អគ្គលេខាធិការថ្មីរបស់អសបចង់បាន២០១៧ជាឆ្នាំដើម្បីសន្តិភាព
នៅថ្ងៃចាប់ផ្តើមដំបូងនៃឆ្នាំថ្មី ឆ្នាំ២០១៧ ប្រធានថ្មីរបស់អង្គការសហប្រជាជាតិ លោកអង់តូនីញ៉ូ ហ្គុយទែរក៍ បានអំពាវនាវ ប្រជាជនក្នុងពិភពលោកឲ្យចូលរួមជាមួយលោក ដើម្បីប្រែក្លាយឆ្នាំ ២០១៧ ជាឆ្នាំ សន្តិភាព។ តាំងពីថ្ងៃទី ១មករា អតីតនាយករដ្ឋមន្រ្តីព័រទុយហ្គេ លោកអង់តូនីញ៉ូ ហ្គុយទែរក៍ត្រូវចូលកាន់តំណែង ជាផ្លូវការ ជាអគ្គលេខាធិការអង្គការសហប្រជាជាតិ ជំនួសលោកបាន គីមូន។
ចុះផ្សាយនៅថ្ងៃ៖
នៅក្នុងសារលើកដំបូងបង្អស់ ក្នុងនាមជាប្រធានអង្គការសហប្រជាជាតិ លោកអង់តូនីញ៉ូ ហ្គុយទែរក៍ បានអំពាវនាវសុំឲ្យមនុស្សគ្រប់គ្នា ចូលរួមជាមួយលោក ដើម្បីសន្យា យកសន្តិភាពជាកិច្ចការអាទិភាព សម្រាប់ឆ្នាំ ២០១៧។ សម្រាប់អគ្គលេខាធិការថ្មី របស់អង្គការសហប្រជាជាតិ អ្វីដែលមនុស្សជាតិគោរពឲ្យតម្លៃដូចជា ភាពថ្លៃថ្នូរ ក្តីសង្ឃឹម ការរីកចម្រើន និងភាពរុងរឿង គឺអាស្រ័យទៅលើសន្តិភាព។ សន្តិភាពកើតឡើងទៅបាន គឺអាស្រ័យទៅលើកត្តាមនុស្ស។ នៅឆ្នាំ២០១៧ លោកអង់តូនីញ៉ូ ហ្គុយទែរក៍បានអំពាវនាវមិនថា ប្រជាជន ឬថ្នាក់ដឹកនាំកំពូលរបស់ប្រទេសមហាអំណាចឲ្យចូលរួមគ្នាជាធ្លុងមួយ ដើម្បីជំនះគ្រប់ឧបសគ្គ និងការខ្វែងគំនិតគ្នា ដើម្បីសុខសន្តិភាពក្នុងពិភពលោក។
ចាប់ពីថ្ងៃទី ១មករា លោកអង់តូនីញ៉ូ ហ្គុយទែរក៍បានចូលដឹកនាំ ស្ថាប័នអន្តរជាតិកំពូល បន្តពីលោកបាន គីមូន ដែលអស់អាណត្តិ។ អគ្គលេខាធិការថ្មីរបស់អង្គការសហប្រជាជាតិនឹងត្រូវប្រឈមដោះស្រាយសំណុំរឿងសំខាន់ៗដែលនៅជាប់គាំង មិនទាន់ដោះស្រាយចប់ ដូចជាវិបត្តិមនុស្សធម៌ សង្រ្គាមបង្ហូរឈាមនៅស៊ីរី ជម្លោះប្រយុទ្ធគ្នានៅស៊ូដង់ យេម៉ែន ឬវិបត្តិនុយក្លេអ៊ែរកូរ៉េខាងជើងជាដើម។
លោកអង់តូនីញ៉ូ ហ្គុយទែរក៍ ចូលកាន់ក្បាលម៉ាស៊ីនអង្គការសហប្រជាជាតិ នៅក្នុងកាលៈទេសៈ ដែលស្ថាប័នអន្តរជាតិកំពូលមួយនេះ រងការរិះគន់ថា ចុះខ្សោយ គ្មានអំណាច គ្មានសមត្ថភាព ដើម្បីដោះស្រាយជម្លោះ ប្រដាប់អាវុធ ជាពិសេស នៅស៊ីរី។ ដោយបោះឆ្នោតជ្រើសរើស លោកអង់តូនីញ៉ូ ហ្គុយទែរក៍ ដែលធ្លាប់ជាអតីតនាយករដ្ឋមន្រ្តីព័រទុយហ្គេ និងមានបទពិសោធន៍នយោបាយ ខុសពីលោកបាន គីមូន ប្រទេសសមាជិកអង្គការសហប្រជាជាតិរំពឹងថា លោកអង់តូនីញ៉ូ ហ្គុយទែរក៍ នឹងជួយជំរុញ ផ្តល់កម្លាំងជាថ្មីដល់ស្ថាប័នកំពូលមួយនេះឡើងវិញ។ លោកអង់តូនីញ៉ូ ហ្គុយទែរក៍ផ្ទាល់ធ្លាប់ទទួលស្គាល់ថា អគ្គលេខាធិការអង្គការសហប្រជាជាតិមិនមែនជាមេដឹកនាំពិភពលោកទេ។ ការងាររបស់អគ្គលេខាធិការអង្គការសហប្រជាជាតិគឺអាស្រ័យទាំងស្រុងទៅលើឆន្ទះ ប្រាថ្នាចង់បានរបស់មេដឹកនាំប្រទេសមហាអំណាច។ តើលោកអង់តូនីញ៉ូ ហ្គុយទែរក៍ចង់និយាយសំដៅដល់អនាគតប្រធានាធិបតីអាមេរិក លោកដូណាល់ ត្រាំ ឬយ៉ាងណា?
លោកដូណាល់ ត្រាំ ដែលធ្លាប់រិះគន់អង្គការសហប្រជាជាតិ នៅក្រោយក្រុមប្រឹក្សាសន្តិសុខបោះឆ្នោតថ្កោលទោសសំណង់អាណានិគមកិច្ចរបស់អ៊ីស្រាអែល ធ្លាប់បានបង្ហាញ ពីការមិនជឿជាក់ទៅលើស្ថាប័នអន្តរជាតិកំពូលមួយនេះ។ នៅសប្តាហ៍មុន លោកដូណាល់ ត្រាំបានសរសេរនៅក្នុងសារ Twitterរបស់លោកថា អ្វីៗនឹងផ្លាស់ប្តូរ នៅអង្គការសហប្រជាជាតិ បន្ទាប់ពីថ្ងៃ ទី ២០មករា ថ្ងៃដែលលោកនឹងចូលស្បថក្លាយជាប្រធានាធិបតីអាមេរិក ទី៤៥។ រហូតមកដល់ពេលនេះ គេមិនដឹងថា តើការឈ្នះឆ្នោតរបស់លោកត្រាំ ក្លាយជាប្រធានាធិបតីអាមេរិក នឹងមានផលប៉ះពាល់ប៉ុណ្ណាដល់អង្គការសហប្រជាជាតិ និងកិច្ចការពិភពលោកទាំងមូល។ បច្ចុប្បន្ននេះ ថវិកា២២ភាគរយរបស់អង្គការសហប្រជាជាតិបានមកពីវិភាគទានរបស់សហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ