លោកដូណាល់ ត្រាំ ស្បថចូលកាន់តំណែងជាប្រធានាធិបតីអាមេរិកទី ៤៥
ចុះផ្សាយនៅថ្ងៃ៖
ស្តាប់ - ០៩:០៧
លោកដូណាល់ ត្រាំ នឹងក្លាយជាប្រធានាធិបតីអាមេរិកជាផ្លូវការនៅថ្ងៃទី ២០មករា។ ពិធីស្បថរបស់លោកចូលរួមដោយមនុស្សប្រមាណ ៩សែននាក់ (ទាំងអ្នកគាំទ្រ និងក្រុមប្រឆាំងត្រាំ) នៅទីក្រុងវ៉ាស៊ីនតោន។ នៅថ្ងៃព្រហស្បតិ៍ ម្សិលមិញ លោកដូណាល់ ត្រាំ បានសន្យា បង្រួបបង្រួមអាមេរិក ជាធ្លុងមួយ និងនាំយកការងារពីបរទេស មកឲ្យប្រជាជនអាមេរិកាំងវិញ។
លោកដូណាល់ ត្រាំហើយនិងគ្រួសារបានទៅដល់ទីក្រុងវ៉ាស៊ីនតោន នៅថ្ងៃព្រហស្បតិ៍ ម្សិលមិញ។ ទៅតាមប្រពៃណី និងទម្លាប់ច្បាប់ចែងក្នុងរដ្ឋធម្មនុញ្ញ លោកដូណាល់ ត្រាំបានចូលទៅដាក់កម្រងផ្កានៅមុខផ្នូររបស់ទាហាន មុននឹងចូលរួមក្នុងពិធីប្រគំតន្រ្តី ដែលរៀបចំ ឡើងរំលឹកដល់លីនកូន អតីតប្រធានាធិបតីទី១៦របស់អាមេរិក។ នៅព្រឹកថ្ងៃសុក្រនេះ លោកដូណាល់ ត្រាំ ត្រូវទទួលទានអាហារពេលព្រឹកជាមួយគ្រួសាររបស់លោកអូបាម៉ា មុននឹងធ្វើដំណើរទាំងអស់គ្នា ចេញពីសេតវិមាន ទៅកាពីតូល ជាកន្លែងដែលលោកដូណាល់ ត្រាំ ស្បថ ក្លាយជាប្រធានាធិបតីទី ៤៥របស់អាមេរិក។
ក្រៅពីគ្រួសាររបស់លោកអូបាម៉ា អតីតប្រធានាធិបតី មុនៗ ដូចជាលោកGeorge W Bush លោកប៊ីលគ្លីនតុន ហើយនិងអតីតប្រធានាធិបតីJimmy Carter ជាដើម នឹងចូលរួមជាមួយប្រជាជនអាមេរិកាំងរាប់ម៉ឺននាក់ផ្សេងទៀត នៅក្នុងពិធីស្បថស្បែរបស់លោកដូណាល់ ត្រាំ។ ផ្ទុយទៅវិញ សមាជិកសភាមកពីគណបក្សប្រជាធិបតេយ្យជាង ៥០នាក់បានពហិការមិនទៅចូលរួមក្នុងពិធីស្បថចូលកាន់តំណែងរបស់លោកត្រាំ ដែលពួកគេបានចោទថា មើលងាយ សកម្មជនការពារសិទ្ធិពលរដ្ឋស្បែកខ្មៅ លោកJohn Lewis។
តាមអ្នកនាំពាក្យរបស់លោកត្រាំ បន្ទាប់ពីដាក់ដៃស្បថលើគុម្ពីព្រះ រួចហើយ ប្រធានាធិបតី ត្រាំ នឹងថ្លែងសុន្ទរកថា មួយ ដែលលោកបានសរសេរដោយដៃលោកផ្ទាល់។ ជាសុន្ទរកថាដែលផ្តោតទៅលើទស្សនវិស័យ ទស្សនវិជ្ជា ជាជាង លើកនិយាយពីកម្មវិធីនយោបាយរបស់រដ្ឋាភិបាល។ នេះបើតាម លោកSean Spicer អ្នកនាំពាក្យរបស់លោកដូណាល់ ត្រាំ។
ពិធីស្បថដែលថ្លៃកប់ពពក
លោកដូណាល់ ត្រាំធ្លាប់បាននិយាយហើយថា លោកនឹងធ្វើឲ្យពិធីស្បថចូលកាន់តំណែងរបស់លោកពិសេសមិនធ្លាប់មាន នៅអាមេរិក។ តាមប្រព័ន្ធផ្សព្វផ្សាយអាមេរិក ពិធីស្បថរបស់លោកដូណាល់ ត្រាំ មានតម្លៃថ្លៃខ្ពស់កប់ពពកក្នុងប្រវត្តិអាមេរិក ដល់ទៅជិត ២០០លានដុល្លារ អាមេរិក។ គ្រាន់តែគណៈកម្មាធិការសម្ពោធប្រធានាធិបតីតែម្នាក់ឯង រក អង្គាសរកបា្រក់បានដល់ទៅ ៩០លាន ដុល្លារ សម្រាប់រៀបចំពិធីស្បថចូលកាន់តំណែងរបស់លោក ដូណាល់ ត្រាំ គឺច្រើនទ្វេរដង បើប្រៀបធៀបនឹងពិធីស្បថរបស់លោកអូបាម៉ា នៅឆ្នាំ ២០០៩ និងឆ្នាំ ២០១៣។
អនុក្រឹត្យដែលលោកដូណាល់ ត្រាំ ចុះហត្ថលេខានៅថ្ងៃស្បថចូលកាន់តំណែង ភាគច្រើននឹងចូលទៅរំលាយជាអសារបង់ ច្បាប់របស់លោកអូបាម៉ា
បន្ទាប់ពីសុន្ទរកថា និងអាហារថ្ងៃត្រង់ គ្រួសាររបស់ដូណាល់ ត្រាំនឹងចូលកាន់កាប់ជាផ្លូវការ សេតវិមាន នៅអំឡុងម៉ោង ១កន្លះរសៀល។ តាមអ្នកនាំពាក្យខាងលើ មានអនុក្រឹត្យជាច្រើន ដែលលោកដូណាល់ ត្រាំនឹងចុះហត្ថលេខាភ្លាមៗ នៅប៉ុន្មានម៉ោងក្រោយស្បថចូលកាន់តំណែង នៅថ្ងៃសុក្រ។
អ្នកនាំពាក្យរបស់លោកដូណាល់ ត្រាំ មិនបានលម្អិតឲ្យគេដឹងពីខ្លឹមសារនៃអនុក្រឹត្យដែលលោកដូណាល់ ត្រាំ នឹងចុះហត្ថលេខា នៅពេលចូលកាន់តំណែងនៅថ្ងៃសុក្រនេះទេ។ ប៉ុន្តែ គេដឹងហើយថា ក្រុមរបស់លោកត្រាំ ធ្លាប់បានសិក្សា រៀបរៀង អនុក្រឹត្យប្រមាណ ២០០ នៅក្នុងវិស័យ សុខាភិបាល បរិស្ថាន អន្តោប្រវេសន៍ និងថាមពល។
Obamacareជាផ្ទាំងស៊ីបវាយប្រហាររបស់លោកត្រាំ
ក្រុមអ្នកជំនាញមួយចំនួនបានវាយតម្លៃថា លោកដូណាល់ ត្រាំ ដែលរិះគន់លោកអូបាម៉ា ថា បានធ្វើនយោបាយតាមសង្គមនិយម ប៉ុន្តែ មិនមែនមូលធននិយម ច្បាស់ជាប្រល័យ មិនទុកទេ ច្បាប់សុខភាពរបស់លោកអូបាម៉ា ដែលលោករិះគន់ ចាត់ទុកថា បន្ទុកធ្ងន់ ធ្វើឲ្យរដ្ឋខាតបង់ប្រាក់រាប់លានដុល្លារ។
សាងសង់ជញ្ជាំងនៅព្រំដែនជាមួយម៉ិចស៊ិក
មួយវិញទៀត ដោយសារតែលោកដូណាល់ ត្រាំសន្យាប្រយុទ្ធប្រឆាំង នឹងអន្តោប្រវេសន៍ខុសច្បាប់ គេជឿថា លោកប្រធានាធិបតីអាមេរិក ដូណាល់ ត្រាំ នឹងចុះហត្ថលេខាផងដែរទៅលើអនុក្រឹត្យដែលនិយាយពីការសាងសង់ជញ្ជាំង នៅព្រំដែនអាមេរិក ជាមួយម៉ិចស៊ិក។ ទៅតាមកម្មវិធីរបស់លោកត្រាំ នៅក្នុងយុទ្ធនាការឃោសនាបោះឆ្នោត រដ្ឋបាលអាមេរិកថ្មីនឹងកំណត់ផងដែរ ចំនួនអ្នកសុំសិទ្ធិរស់នៅ អាមេរិក ដែលដាក់ស្នើដោយប្រជាជនអាមេរិកឡាទីន។
កិច្ចព្រមព្រៀងស្តីពីពាណិជ្ជកម្មសេរី អន្តរប៉ាស៊ីហ្វិកTPP
គេជឿថា លោកដូណាល់ ត្រាំនឹងមិនលើកលែងផងដែរដែរ កិច្ចព្រមព្រៀង ស្តីពីការដោះដូរអន្តរប៉ាស៊ីហ្វិកTPP របស់លោកអូបាម៉ាដែលលោកត្រាំចោទថា បានធ្វើឲ្យអាមេរិកខាតបង់ ប្រយោជន៍ផ្នែកសេដ្ឋកិច្ច។ តាមអ្នកនាំពាក្យរបស់លោកដូណាល់ រដ្ឋបាលថ្មីនឹងចរចាឡើងវិញលើកិច្ចព្រមព្រៀង TPP ជាមួយនឹងប្រទេសកាណាដា និងម៉ិចស៊ិក។ ចរចាឡើងវិញ ឬដកខ្លួនទាំងស្រុង របស់អាមេរិក ពីកិច្ចព្រមព្រៀង ដែលរដ្ឋបាលរបស់លោកអូបាម៉ាបានធ្វើកន្លងមក។ ជំហររបស់ប្រធានាធិបតីថ្មីកំពុងធ្វើឲ្យគេបារម្ភដែរថា លោក ដូណាល់ ត្រាំ នឹងដកខ្លួនផងដែរ ពីកិច្ចព្រមព្រៀងស្តីពីអាកាសធាតុទីក្រុងប៉ារីស ដែលត្រូវបង្កើតឡើង ក្នុងបំណងកាត់បន្ថយការបញ្ចេញឧស្ម័នផ្ទះកញ្ចក់ ដែលជាដើមហេតុនៃការឡើងកំដៅនៃភពផែនដី។
លោកត្រាំ ប្រធានាធិបតីប្រឆាំងក្រុមបញ្ញវន្ត
ដោយបោះឆ្នោតជ្រើសរើសលោកដូណាល់ ត្រាំ មហាសេដ្ឋីអចលនទ្រព្យ និងធ្លាប់ជាពិធីករទូរទស្សន៍ ឲ្យធ្វើជាប្រធានាធិបតីទី៤៥របស់អាមេរិក អ្នកបោះឆ្នោតអាមេរិកាំងចង់កាច់បំបាក់ប្រពៃណី របៀបរបបធ្វើនយោបាយចាស់ៗកន្លងមករបស់អាមេរិក។ ប្រជាជនអាមេរិកបានជ្រើសរើសលោកត្រាំ ដែលតាមពិត គ្មានបទពិសោធន៍ធ្វើនយោបាយទាល់តែសោះ។ លោកគ្មានចំណេះដឹងផ្នែកនយោបាយការបរទេស មិនដែលចូលបម្រើក្នុងកងទ័ព ឬជាសមាជិកសភា ដូចដែលប្រធានាធិបតីអាមេរិកមុនៗធ្លាប់មានក្នុងប្រវត្តិរូបរបស់ខ្លួន។
ក្នុងនយោបាយក្រៅប្រទេស ដែលលោកមិនដែលមានបទពិសោធន៍ទាល់តែសោះនោះ លោកដូណាល់ ត្រាំ គឺមានជំហរ ផ្ទុយស្រឡះពីប្រធានាធិបតីអាមេរិកមុនៗ។ លោកបានទទួលទូរស័ព្ទរបស់លោកស្រីប្រធានាធិបតីតៃវ៉ាន់ រហូតធ្វើឲ្យចិនមិនសប្បាយចិត្ត។ លោកចង់ចូលទៅចងសម្ព័ន្ធភាពជាមួយប្រធានាធិបតីរុស្ស៊ី ដែលអាមេរិកកន្លងមក ចាត់ទុកជាគូប្រជែង។ គេមិនដឹងថា តើលោកដូណាល់ត្រាំគិតចង់បានអ្វីនោះទេ។ គ្មានអ្នកណាអាចស្មានដឹង យល់ចិត្តលោកត្រាំនោះទេ។ ខុសពីប្រធានាធិបតីមុនៗ លោកដូណាល់ ត្រាំ បែរជាទៅរករឿងប្រទេសដែលអាមេរិកធ្លាប់ពង្រឹងចងសម្ព័ន្ធភាព ដូចជាអង្គការអូតង់ ដែលអាមេរិកបោះជើង នៅអឺរ៉ុប ដើម្បីប្រឈមនឹងរុស្ស៊ី ហើយនិង ជប៉ុនឬកូរ៉េខាងត្បូងដែលអាមេរិកសហការរហូតមក ដើម្បីប្រជែងឥទ្ធិពលរបស់ចិននៅអាស៊ី។ កន្លងមក លោកត្រាំធ្លាប់បានទាមទារឲ្យជប៉ុន និងកូរ៉េខាងត្បូងចេញលុយបង់ថ្លៃ ចំណាយរបស់កងទ័ពអាមេរិក ដែលត្រូវដាក់ប្រចាំនៅប្រទេសទាំងពីរ ដើម្បីទប់ទល់នឹងកូរ៉េខាងជើង។
ក្នុងប្រទេសវិញ កម្មវិធីនយោបាយរបស់លោកត្រាំ ត្រូវបានគេរិះគន់ថា នឹងធ្វើឲ្យអាមេរិកធ្លាក់ ជាប់បំណុលកាន់តែច្រើន។ ក្នុងនាមជាអ្នកជំនួញ លោកដូណាល់ ត្រាំ គ្មានចក្ខុវិស័យដូចអ្នកនយោបាយអាមេរិកទេ។ ឧទាហរណ៍ លោកដូណាល់ ត្រាំបានសន្យាកាត់បន្ថយពន្ធលើប្រាក់ចំណូល មិនថា របស់ប្រជាជនអាមេរិក ឬក្រុមហ៊ុនអាមេរិក។ លោកដូណាល់ ត្រាំផ្ទាល់ កាលនៅពេលធ្វើជំនួញលើ ធ្លាប់រិះគន់ នយោបាយយកពន្ធធ្ងន់ពីក្រុមហ៊ុន។ នៅក្នុងយុទ្ធនាការឃោសនាបោះឆ្នោត លោកធ្លាប់ត្រូវបានគូប្រជែង ហ៊ីឡារី គ្លីនតុនចោទប្រកាន់ថា ប្រហែលលួចពន្ធ ហើយ ទើបមិនប្រកាសពីវិក័យប័ត្របង់ពន្ធជូនរដ្ឋ ជាសាធារណៈ។ ការសន្យាកាត់បន្ថយពន្ធ បានជួយធ្វើឲ្យលោកឈ្នះឆ្នោត ប៉ុន្តែ អ្នកសេដ្ឋកិច្ច ជាច្រើនបារម្ភថា វានឹងផ្តល់ប្រយោជន៍ខ្លាំងតែទៅលើក្រុមអ្នកធ្វើជំនួញ ដែលនឹងចំណេញដល់ទៅ ជាង ២សែន ក្នុងពេលដែលប្រជាជនសាមញ្ញនឹងចំណេញបានប្រមាណ ជាង ១០០ដុល្លារប៉ុណ្ណោះពីនយោបាយកាត់បន្ថយពន្ធ។ ហើយ គឺរដ្ឋអាមេរិកដែលត្រូវខាតបង់ប្រាក់ រាប់ពាន់ ដុល្លារ។ តាមអ្នកសេដ្ឋកិច្ចវិទូ នយោបាយរបស់លោកត្រាំ គឺមិនអាចធ្វើទៅបានទេ។ ក្នុងរយៈពេល១០ឆ្នាំ វានឹងធ្វើឲ្យអាមេរិកខាតបង់ប្រាក់ ១៥ពាន់ ពាន់លានដុល្លារ។ ប្រាក់បំណុលរបស់អាមេរិក កើនទ្វេដងដល់ ពី៨៦% ទៅ ១៤០% នៅឆ្នាំ ២០២៦។
លោកដូណាល់ ត្រាំ ជាប្រធានាធិបតីអាមេរិកលើកដំបូងបង្អស់ ដែលមានកូដប្រជាប្រិយតិចបំផុត នៅពេលស្បថចូលកាន់តំណែង។ នៅថ្ងៃម្សិលមិញ នៅក្នុងពេលក្រុមលោកដូណាល់ ត្រាំជប់លៀង នៅមួយថ្ងៃមុនពិធីស្បថ ចូលកាន់តំណែងជាប្រធានាធិបតី ក្រុមប្រឆាំង ដែលចូលរួមដោយក្រុមតារា និងប្រជាជនក្រុងញូវយ៉កនាំគ្នាធ្វើបាតុកម្មប្រឆាំងនយោបាយអន្តោប្រវេសន៍របស់លោកដូណាល់ ត្រាំ។
ប្រធានាធិបតីដូណាល់ ត្រាំ ជាប្រធានាធិបតីមូលធននិយមផ្តាច់មុខ រហូតធ្វើឲ្យ គេបារម្ភថា លោកគិតតែពីផលប្រយោជន៍សេដ្ឋកិច្ច តែមួយមុខ។ នៅក្នុងរដ្ឋាភិបាលរបស់លោក លោកដូណាល់ ត្រាំបានជ្រើសរើសសុទ្ធតែមហាសេដ្ឋីមកកាន់តំណែងសំខាន់ៗ ដូចជាមហាសេដ្ឋី ប្រេង Tillersonឲ្យធ្វើជារដ្ឋមន្រ្តីការបរទេស។ មហាសេដ្ឋីធនាគារ លោកMnuchinដែលធ្លាប់ធ្វើឲ្យអាមេរិកជួបវិបត្តិហិរញ្ញវត្ថុ មកធ្វើជារដ្ឋមន្រ្តីសេដ្ឋកិច្ច ឬមហាសេដ្ឋីម្ចាស់អណ្តូងប្រេងម្នាក់ទៀត ឲ្យធ្វើជារដ្ឋមន្រ្តីថាមពល។ វត្តមានរបស់មហាសេដ្ឋីនៅក្នុងតំណែងរដ្ឋាភិបាល រួមទាំងកូនប្រសារប្រុសរបស់លោកជាទីប្រឹក្សា នៅសេតវិមាន ធ្វើឲ្យគេខ្លាចថា នឹងមានជម្លោះផលប្រយោជន៍ ព្រោះថា ក្រុមគ្នីគ្នារបស់លោកដូណាល់ ត្រាំ នឹងកេងចំណេញពីតំណែងក្នុងរដ្ឋាភិបាលដើម្បីបម្រើផលប្រយោជន៍ផ្ទាល់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ