អាមេរិក ៖ លោកត្រាំបណ្តេញនាយកFBI ចេញតំណែង ដោយគ្មានប្រាប់មុន
ចុះផ្សាយនៅថ្ងៃ៖
ស្តាប់ - ០៦:២១
លោកដូណាល់ ត្រាំ ប្រធានាធិបតីអាមេរិក បានធ្វើព្យុះភ្លៀងនយោបាយមួយមេទៀតហើយ នៅថ្ងៃអង្គារម្សិលមិញ ដោយបានប្រកាសហូតតំណែងនាយកទីភ្នាក់ងារFBI លោក James Comey ដែលកំពុងដឹកនាំការស៊ើបអង្កេតស្តីអំពីសំណុំរឿងសង្ស័យរុស្ស៊ីចូលលូកដៃក្នុងយុទ្ធនាការឃោសនាបោះឆ្នោតប្រធានាធិបតីអាមេរិក។ ជាសេចក្តីសម្រេចដែលធ្វើឡើងតាមអនុសាសន៍របស់រដ្ឋមន្ត្រីក្រសួងយុត្តិធម៌ ! នេះជាការពន្យល់របស់លោកត្រាំ។ ហើយនៅក្នុងសេចក្តីថ្លែងការណ៍ដ៏ខ្លី សេតវិមានបានអះអាង “ដកលោក ខមីចេញ ដើម្បីឱ្យភ្នាក់ងារអាចចាប់ផ្តើមថ្មី”។
ការដកតំណែងនាយកFBI ដូចដកស្មៅបែបនេះ ពិតជាករណីដ៏មហាកម្របំផុតនៅសហរដ្ឋអាមេរិក។ តាមធម្មតា តួនាទីនាយកទីភ្នាក់ងារ FBI ត្រូវបានតែងតាំងឡើង សម្រាប់រយៈពេល ១០ឆ្នាំ ដើម្បីបញ្ចៀសកុំឱ្យភ្នាក់ងាររងសម្ពាធនិងឥទ្ធិពលនយោបាយ។
លោកJames Comey ដែលចូលកាន់តំណែងជានាយកទីភ្នាក់ងារ នៅឆ្នាំ២០១៣ មិននឹកស្មានដល់ទាល់តែសោះថាអាចមានហេតុការណ៍បណ្តេញលោកពីតំណែងយ៉ាងដូច្នេះ។ លោក ខមី បានឮព័ត៌មានដកលោកពីតំណែងតាមទូរទស្សន៍ ក្នុងពេលកំពុងប្រជុំសមាជិកFBIផ្សេងទៀត ដោយដំបូងឡើយលោកគិតស្មានជាដំណឹងបញ្ឆោត។
ដកមេFBIចេញ ដើម្បីស្តារទំនុកចិត្ត
នៅពេលគេដឹងថា គឺFBI នេះឯងជាអ្នកដឹកនាំស៊ើបអង្កេតស្តីអំពីទំនាក់ទំនងជាយថាហេតុរវាងលោកត្រាំ និងរុស្ស៊ី ! ហើយគឺFBIដដែលនេះឯង ដែលបានបើកអង្កេតប្រឆាំងនឹងលោកឧត្តមសេនីយ៍ Flynn ទីប្រឹក្សាសន្តិសុខជាតិរបស់ប្រធានាធិបតីត្រាំ មួយខែដំបូង។ គឺរូប លោក ខមី នេះផ្ទាល់តែម្តង ដែលបានថ្លែងជាសាធារណៈច្រានចោលការមន្ទិលសង្ស័យរបស់លោកត្រាំ ដែលថារដ្ឋបាលលោកអូបាម៉ា បានធ្វើចារកិច្ចលួចស្តាប់លោក កាលនៅជាបេក្ខជនប្រធានាធិបតី ... យើងពិតជាអាចយល់បានច្បាស់អំពីអារម្មណ៍របស់លោកត្រាំ ចំពោះនាយកទីភ្នាក់ងារនេះ។
ពីរថ្ងៃក្រោយចូលកាន់តំណែងជាប្រធានាធិបតី លោក ត្រាំ ធ្លាប់បានចាប់ដៃរលាក់ជាមួយលោក ខមី និងបានចំអកថា “លោកឯងជាមនុស្សដែលល្បីល្បាញជាងប្រធានាធិបតីអាមេរិកទី ៤៥ទៅទៀត”។
ប៉ុន្តែជាផ្លូវការ ការបណ្តេញលោក ខមី ចេញពីតំណែង គឺដើម្បីស្តារទំនុកចិត្តប្រធានាធិបតី។ នៅក្នុងលិខិតរបស់លោកត្រាំ ដែលបានផ្សព្វផ្សាយជាសាធារណៈ បានបញ្ជាក់យ៉ាងច្បាស់លាស់ ថា ប្រធានាធិបតី ដូណាល់ ត្រាំ គ្មានទំនុកចិត្តសោះលើនាយកFBI ទៀតទេ ដូច្នេះលោក ខមី មិនអាចបំពេញតួនាទីនេះទៀតបានឡើយ ! លោក ខមី ត្រូវតែបណ្តេញតំណែងភ្លាមរំពេញ តែម្តង។ សម្រាប់សេតវិមាន ការចាកចេញរបស់លោក ខមី នឹងអនុញ្ញាតឱ្យភ្នាក់ងារមានសន្ទុះចាប់ផ្តើមថ្មី។ លោកបានអះអាងថា បានធ្វើសេចក្តីសម្រេចចិត្តរបស់ប្រធានាធិបតីនេះ ដោយមានការណែនាំរបស់ក្រសួងយុត្តិធម៌។
នៅក្នុងកំណត់ហេតុរបស់អនុរដ្ឋមន្ត្រីក្រសួងយុត្តិធម៌ គេឃើញមានចំណុចបន្ទោសលោក ចែម ខមី ជាច្រើន ដូចជា ការចាត់ចែងដឹកនាំការអង្កេតសំណុំរឿងអ៊ីមែលលោកស្រី គ្លីនតុនមិនបានល្អ។ កាលណោះលោកស្រី គ្លីនតុន ជាបេក្ខជនប្រធានាធិបតីមានប្រជាប្រិយភាពនិងនាំមុខខ្លាំងផង តែលោកខមី បានជ្រើសរើសមធ្យោបាយផ្តល់ព័ត៌មានខុសទម្លាប់ ធ្វើសន្និសីតកាសែត ថ្ងៃទី ៥កក្កដា ២០១៦ បែបដូចការពារលោកស្រីគ្លីន ដោយបានត្រឹមតែបន្ទោសលោកស្រីថាធ្វេសប្រហែសធ្ងន់ធ្ងរ។ ហើយកាលពីសប្តាហ៍មុន សភា បានបន្ទោសលោក ខមី ថាមានកំហុសវិនិច្ឆ័យ លើទំហំនៃសំណុំរឿងសារអ៊ីមែលរបស់លោកស្រីគ្លីនតុន។
នាយកFBI ប៉ុស្តិ៍ក្តៅ
លោក ចែម ខមី ជាឥស្សរជនដ៏ប្រទាញប្រទង់បំផុតនៅសហរដ្ឋអាមេរិក ! ជាមនុស្សដែលគេខ្លាចក្រែងផង និង ស្អប់ផង មិនថាអ្នកនោះនៅខាងបក្សសាធារណរដ្ឋរបស់លោកត្រាំ ឬបក្សប្រជាធិបតេយ្យរបស់លោកស្រីគ្លីនតុនទេ។
លោក ដូណាល់ ត្រាំ ធ្លាប់ជាន់ឈ្លីបង្អាប់ លោក ខមី ផង និងលើកសរសើរផង នៅក្នុងអំឡុងពេលឃោសនាបោះឆ្នោត។ ជាន់បង្អាប់នៅពេលលោក ខមី ប្រកាសឈប់តាមដានសំណុំរឿងសារអ៊ីមែលឯកជនលោកស្រីគ្លីនតុន ដល់ពេល FBI ប្រកាសបើកអង្កេតប្រឆាំងលោកស្រី គ្លីនតុន ១១ថ្ងៃមុខការបោះឆ្នោតប្រធានាធិបតី លោកត្រាំក៏បានលើកសរសើរ តែខាងបក្សប្រជាធិបតេយ្យនាំគ្នាបន្ទោសវិញ និងចាត់ទុកថាជាចំណែកមួយដែលធ្វើឱ្យលោកស្រីគ្លីនតុនចាញ់ឆ្នោតប្រធានាធិបតី។
ប៉ុន្តែទោះជាយ៉ាងណាក្តី ក៏នាយកFBI រូបនេះ ហាក់ដូចជាមិនរង្គោះរង្គើនឹងការវាយប្រហារទាំងអស់នោះឡើយ។ នាយកទីភ្នាក់ងារនៅតែបន្តធ្វើការរបស់ខ្លួនដដែល ជាក់ស្តែងការអង្កេតអំពីចំណងជាយថាហេតុរវាងរុស្ស៊ីនិងក្រុមឃោសនារបស់លោកត្រាំ ដោយបានទម្លាយអំពីកិច្ចសន្ទនារបស់លោក Flynn ទីប្រឹក្សាសន្តិសុខដំបូងរបស់ប្រធានាធិបតីត្រាំ ជាមួយឯកអគ្គរដ្ឋទូតរុស្ស៊ី រហូតទាល់ខ្ទាតពីតំណែង។ ការអង្កេតលើសំណុំរឿងនេះនៅតែបន្តធ្វើជានិច្ច។
បណ្តេញនាយកFBI មួយថ្ងៃមុនទស្សនកិច្ចរបស់រដ្ឋមន្ត្រីការបរទេសរុស្ស៊ីនៅអាមេរិក
សម្រាប់អ្នកវិភាគនិងសង្កេតការជាច្រើនទៀត គឺការអង្កេតអំពីទំនាក់ទំនងរុស្ស៊ី-និងការឃោសនាបោះឆ្នោតអាមេរិកនេះឯងដែលធ្វើឱ្យលោកខមីបាត់បង់តំណែង។ ប្រព័ន្ធសារព័ត៌មានជាច្រើន ក៏គ្មាននរណាជឿលើមូលហេតុនៃការទម្លាក់លោក ខមី ផ្តល់ជាផ្លូវការដោយលោកត្រាំទេ។
ទង្វើរបស់លោកត្រាំ បានត្រឹមតែធ្វើឱ្យទាំងអ្នកនយោបាយ អ្នកវិភាគឯករាជ្យ ឬអ្នកសង្កេតការណ៍សាមញ្ញ រឹតតែមានជំនក់ចិត្តគិតថា រដ្ឋបាលលោកត្រាំ ពិតជាមានអ្វីលាក់លៀមជាមួយរុស្ស៊ី ខ្លាចការអង្កេត ! ខ្លះទៀត យល់ថាមានតែប្រទេសមិនប្រជាធិបតេយ្យទេដែលធ្វើយ៉ាងដូច្នេះ ! គឺពិតជាគួរឱ្យខកចិត្តបំផុត។ ម្យ៉ាងទៀត ដំណឹងបណ្តេញលោក ខមី ធ្លាក់មកតែមួយថ្ងៃមុនដំណើរទស្សនកិច្ចរបស់រដ្ឋមន្ត្រីការបរទេសរុស្ស៊ីនៅអាមេរិក ជាលើកដំបូង គិតចាប់តាំងពី៤ឆ្នាំមក។
សេតវិមានបានសន្យានឹងរកឥស្សរជនមកជំនួស ឱ្យបានឆាប់ តែគ្រប់គ្នាចាប់ផ្តើមគិតតើជននោះឯករាជ្យ និងជំហររឹងប៉ុណ្ណា ? ខ្លះបានសុំឱ្យរដ្ឋអាជ្ញាឯករាជ្យមួយបើកអង្កេតសំណុំរឿងសង្ស័យរុស្ស៊ីចូលជ្រៀតជ្រែកក្នុងយុទ្ធនាការឃោសនាបោះឆ្នោតអាមេរិកតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ