តើចប់ហើយឬរាត្រីទឹកឃ្មុំរវាងអ៊ីរ៉ង់ និងអាមេរិកបន្សល់ទុកដោយលោកបារ៉ាក់ អូបាម៉ា?
ចុះផ្សាយនៅថ្ងៃ៖
ស្តាប់ - ០៥:១២
នៅក្នុងដំណើរទស្សនកិច្ចរយៈពេល ២ថ្ងៃក្នុងទីក្រុងរីយ៉ាដ ប្រទេសអារ៉ាប៊ីសាអូឌីតដែលបានបិទបញ្ចប់នាយប់ថ្ងៃអាទិត្យ ទី២១ ឧសភា លោកប្រធានាធិបតីអាមេរិកដូណាល់ ត្រាំបានបញ្ចេញវាចារវ៉ៃប្រហារប្រទេសអ៊ីរ៉ង់ដោយមិនប្រណីមាត់។ នៅក្នុងជំនួបជាមួយថ្នាក់ដឹកនាំអារ៉ាប់ អ៊ីស្លាមក្នុងទីក្រុងរីយ៉ាដ លោកដូណាល់ ត្រាំបានចោទអ៊ីរ៉ង់ពីបទបានគាំទ្រភេរវនិយម ព្រមទាំងចាត់ទុកអ៊ីរ៉ង់ជាសត្រូវម្នាក់ដូចជាអង្គការភេរវនិយមអាល់កៃដា និងអង្គការរដ្ឋអ៊ីស្លាមអ៊ីចឹងដែរ។ ជំហររបស់លោកត្រាំពេលនេះនាំឲ្យមានសំណួរចោទឡើងថា តើចប់ហើយឬរាត្រីទឹកឃ្មុំរវាងអ៊ីរ៉ង់ និងអាមេរិកបន្សល់ទុកដោយលោកអតីតប្រធានាធិបតីអាមេរិកបារ៉ាក់ អូបាម៉ា?
ជាថ្មីម្តងទៀត លោកដូណាល់ ត្រាំបានបង្ហាញប្រាប់ពិភពលោកថា លោកជាប្រធានាធិបតីអាមេរិកម្នាក់ដែលប្តូរជំហរស្រេចតែចិត្តដោយគ្មាននរណាអាចទាយទុក និងមើលឃើញជាមុនបានឡើយ។ តែគេក៏មិនត្រូវភ្លេចនិយាយទេថា រាល់កាយវិការ និងទង្វើទាំងអម្បាលម៉ានរបស់លោកត្រាំក្នុងនាមជាប្រធានាធិបតីនៃប្រទេសមហាអំណាចក្នុងលោកត្រូវបានគ្រប់គ្នាចាប់អារម្មណ៍ និងយកចិត្តទុកដាក់ជាទីបំផុត។ ជំហរផ្លាស់ប្តូររបស់លោកត្រាំក្នុងសំណុំរឿងមជ្ឈិមដើមបូព៌ាត្រូវបានស្តែងចេញយ៉ាងច្បាស់ក្រឡែតនាដំណើរទស្សនកិច្ចរយៈពេល ២ថ្ងៃក្នុងប្រទេសអារ៉ាប៊ីសាអូឌីត។
ដើម្បីបញ្ជាក់ពីជំហរផ្លាស់ប្តូររបស់អាមេរិកនៅមជ្ឈិមបូព៌ា ពិសេសក្នុងបញ្ហានៅស៊ីរី នៅយេម៉ែន នៅអ៊ីរ៉ាក់ ឬមួយក៏នៅក្នុងប្រទេសលីបង់ លោកដូណាល់ ត្រាំមិនញញើតនឹងបោះដៃទៅរកក្រុមប្រទេសសម្ព័ន្ធមិត្តស៊ុយនីតនៅក្នុងតំបន់ ដូចយ៉ាងអារ៉ាប៊ីសាអូឌីតដែលជាមហាអំណាចស៊ុយនីតនៅក្នុងតំបន់ រួមទាំងក្រុមប្រទេសអារ៉ាប់កាន់សាសនាអ៊ីស្លាមនិកាយស៊ុយនីតដទៃផ្សេងទៀត។ ទន្ទឹមគ្នានេះ លោកក៏មិនញញើតនឹងវ៉ៃប្រហារលើប្រទេសអ៊ីរ៉ង់ដែលជាមហាអំណាចឈីអ៊ីតនៅក្នុងតំបន់ និងជាសត្រូវស៊ីសាច់ហុតឈាមគ្នាជាមួយប្រទេសអារ៉ាប៊ីសាអូឌីត។
នៅក្នុងសុន្ទរកថាថ្លែងនៅចំពោះមុខថ្នាក់ដឹកនាំអារ៉ាប់ដែលរួមប្រជុំគ្នាក្នុងទីក្រុងរីយ៉ាដ ប្រទេសអារ៉ាប៊ីសាអូឌីត លោកដូណាល់ ត្រាំបានចោទអ៊ីរ៉ង់ពីបទបានគាំទ្រភេរវនិយម ព្រមទាំងចាត់ទុកអ៊ីរ៉ង់ជាសត្រូវមួយដែលត្រូវកំចាត់ដូចជាអង្គការភេរវនិយមអាល់កៃដា និងអង្គការរដ្ឋអ៊ីស្លាមអ៊ីចឹងដែរ។ មកដល់ត្រង់ចំណុចនេះនាំឲ្យមានសំណួរចោទឡើងថា តើទំនាក់ទំនងល្អគ្រាន់បើរវាងអ៊ីរ៉ង់ និងអាមេរិកដែលលោកអតីតប្រធានាធិបតីអាមេរិកបារ៉ាក់ អូបាម៉ាខំកសាងឡើងនឹងត្រូវលោកដូណាល់ ត្រាំជាន់កម្ទេចនៅពេលនេះ ឬយ៉ាងណា?។
គេពិតជានៅចាំមិនភ្លេចថាក្នុងថ្ងៃទី១៤ កក្កដា ឆ្នាំ ២០១៥ អ៊ីរ៉ង់ និងសហគមន៍អន្តរជាតិ មានអាមេរិកបានចុះហត្ថលេខាលើកិច្ចព្រមព្រៀងនុយក្លេអ៊ែរ។ គឺជាកិច្ចព្រមព្រៀងដែលបានអនុញ្ញាតឲ្យមានការបិទបញ្ចប់បញ្ហានុយក្លេអ៊ែរដ៏ចម្រូងចម្រាសរវាងអ៊ីរ៉ង់ និងសហគមន៍អន្តរជាតិ ហើយជាមួយនឹងកិច្ចព្រមព្រៀងនេះ លោកអូបាម៉ាសង្ឃឹមបញ្ចុះឥទ្ធិពលអ៊ីរ៉ង់ និងទាញអ៊ីរ៉ង់ឲ្យប្រកាន់ជំហរជាអ្នកសម្របសម្រួលនៅក្នុងតំបន់ ពិសេសទាក់ទងនឹងជម្លោះផ្ទៃក្នុងនៅក្នុងប្រទេសស៊ីរី។ តែផ្ទុយទៅវិញ ទីក្រុងតេហេរ៉ង់បែរជាបន្តប្រកាន់ជំហរដដែល និងចេញមុខគាំទ្រជាចំហលើរបបស៊ីរីរបស់លោកប្រធានាធិបតីអាសាដ។ ទន្ទឹមគ្នានេះ អ៊ីរ៉ង់ក៏កំពុងបន្តអភិវឌ្ឍន៍គ្រាប់មីស៊ីលអន្តរទ្វីប និងបន្តពង្រីកមហិច្ឆតានយោបាយរបស់ខ្លួននៅក្នុងតំបន់។
មែនទែនទៅ ជំហរ និងមហិច្ឆតារបៀបនេះរបស់អ៊ីរ៉ង់មិនមែនជារឿងថ្មីទេ ហើយគូប្រជែងរបស់អ៊ីរ៉ង់នៅក្នុងតំបន់ក៏គ្មាននរណាថ្មីក្រៅពីអារ៉ាប៊ីសាអូឌីតដែរ។ តែអ្វីដែលថ្មីពេលនេះ គឺការដែលអាមេរិករបស់លោកដូណាល់ ត្រាំបានព្យាយាមដកខ្លួនពីការរំកិលរកគ្នារវាងទីក្រុងតេហេរ៉ង់ និងទីក្រុងវ៉ាស៊ីតោនដែលបន្សល់ដោយលោកអូបាម៉ា។ លោកដូណាល់ ត្រាំបានយល់ឃើញថា មានតែការខោកក្បាលអ៊ីរ៉ង់ទេទើបអាមេរិកអាចស្តារឡើងវិញនូវទំនាក់ទំនងជាមួយអារ៉ាប៊ីសាអូឌីតដែលជាសម្ព័ន្ធមិត្តចាក់ទឹកមិនលេចនៅក្នុងតំបន់។ សម្ព័ន្ធមិត្តដែលពិតជាមិនអាចមើលរំលងប្រយោជន៍សេដ្ឋកិច្ចបានឡើយ ព្រោះនាឱកាសនោះ លោកត្រាំទទួលបានកិច្ចសន្យាទិញអាវុធពីអារ៉ាប៊ីសាអូឌីតក្នុងទឹកប្រាក់មិនតិចជាង ១១០ ០០០លានដុល្លារទេ។
អត្ថន័យ និងខ្លឹមសារវ៉ៃប្រហារអ៊ីរ៉ង់នៅក្នុងសុន្ទរកថារបស់លោកដូណាល់ ត្រាំនៅអារ៉ាប៊ីសាអូឌីត ពិតជាអ្វីដែលក្រុមអ្នកប្រឆាំងអ៊ីរ៉ង់ទន្ទឹងរង់ចាំចង់ឮ និងចង់ស្តាប់ចេញពីបបូរមាត់របស់លោកត្រាំ។ ជាមួយនឹងសុន្ទរកថានេះ ពួកគេបានយល់កាន់តែច្បាស់ពីជំហររបស់អាមេរិកជាមួយអ៊ីរ៉ង់ និងពីទំនាក់ទំនងរវាងអាមេរិក និងពិភពអារ៉ាប់។ ក្រៅពីបានបំពេញចិត្តអារ៉ាប៊ីសាអូឌីត ជំហរខោកក្បាលអ៊ីរ៉ង់របស់លោកដូណាល់ ត្រាំក៏កំពុងធ្វើអ៊ីស្រាអែលដែលជាសត្រូវស៊ីសាច់ហុតឈាមនឹងអ៊ីរ៉ង់ញញឹមបិទមាត់មិនជិតដែរ។ ពលរដ្ឋអ៊ីស្រាអែលបានយល់ឃើញដូចពលរដ្ឋអារ៉ាប់និកាយស៊ុយនីតដែលថា មហិច្ឆតារបស់អ៊ីរ៉ង់កំពុងបង្កគ្រោះថ្នាក់នៅក្នុងតំបន់។
សរុបមកវិញឃើញថា ទស្សនកិច្ចរបស់លោកដូណាល់ ត្រាំនៅមជ្ឈិមបូព៌ាក្នុងប្រទេសអារ៉ាប៊ីសាអូឌីត និងអ៊ីស្រាអែលពេលនេះ ហាក់មិនបានបង្ហាញចេញនូវនយោបាយរបស់អាមរិកជាមួយពិភពអារ៉ាប់ អ៊ីស្លាមដូចដែលប្រធានាធិបតីអាមេរិកមុនៗបានធ្វើនោះទេ។ ផ្ទុយទៅវិញ លោកដូណាល់ ត្រាំបែរជាបានផ្តោតលើការរឹតចំណងជាមួយប្រទេសសម្ព័ន្ធមិត្តនៅក្នុងតំបន់ និងកំពុងបញ្ឆេះឲ្យមានការប្រឈមមុខដាក់គ្នាកាន់តែខ្លាំងរវាងចលនាពីរ នៅម្ខាង មានអារ៉ាប់ស៊ុយនីត អ៊ីស្រាអែល និងអាមេរិក ចំណែកនៅម្ខាងទៀត មានអ៊ីរ៉ង់ដែលគាំទ្រដោយស៊ីរី និងរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ