លោកដូណាល់ ត្រាំ៖អ៊ីរ៉ង់ជាអ្នកបង្ក និងចិញ្ចឹមអស្ថិរភាពនៅក្នុងតំបន់
លោកប្រធានាធិបតីអាមេរិកដូណាល់ ត្រាំបានអំពាវនាវឲ្យមានសន្តិភាព និងយុទ្ធនាការប្រយុទ្ធប្រឆាំងភេរវនិយម។ សេចក្តីអំពាវនាវនេះបានធ្វើឡើងនៅចំពោះមុខថ្នាក់ដឹកនាំអារ៉ាប់ និងអ៊ីស្លាមដែលរួមប្រជុំគ្នាក្នុងប្រទេសអារ៉ាប៊ីសាអូឌីត។ ក្រោមភ្នែកច្រមុះរបស់លោកត្រាំ យុទ្ធនាការប្រយុទ្ធប្រឆាំងនឹងភេរវនិយមត្រូវជាប្រធានបទអាទិភាពនៃទំនាក់ទំនងរវាងអាមេរិក និងពិភពអារ៉ាប់ អ៊ីស្លាម។ ពិភពអារ៉ាប់ អ៊ីស្លាមដែលលោកត្រាំមិនបានរាប់បញ្ចូលប្រទេសអ៊ីរ៉ង់ទេ។ លោកត្រាំយល់ឃើញថា អ៊ីរ៉ង់ជាអ្នកបង្ក និងចិញ្ចឹមអស្ថិរភាពនៅក្នុងតំបន់។
ចុះផ្សាយនៅថ្ងៃ៖
ស្តាប់ - ០១:៣៦
« ពីប្រទេសលីបង់រហូតដល់ប្រទេសអ៊ីរ៉ាក់ និងប្រទេសយេម៉ែន អ៊ីរ៉ង់ជាអ្នកចំណាយ ជាអ្នកបំពាក់អាវុធ និងជាអ្នកហ្វឹកហ្វឺនក្រុមភេរវជន ក្រុមប្រដាប់អាវុធលួចលាក់ និងក្រុមជ្រុលនិយមដែលបង្កឲ្យមានភាពវឹកវរ និងបំផ្លិចបំផ្លាញនៅក្នុងតំបន់ទាំងមូល។
តាំងពីច្រើនទសវត្សកន្លងមក អ៊ីរ៉ង់ជាប្រទេសបង្កឲ្យមានជម្លោះសាសនា និងភាពតក់ស្លុត។ របបអ៊ីរ៉ង់បាននិយាយជាចំហនូវទង្វើសម្លាប់រង្គាល សន្យាកម្ទេចប្រទេសអ៊ីស្រាអែល ការស្លាប់របស់អាមេរិក ព្រមទាំងភាពហិនហោចទ្រព្យសម្បតិរបស់ថ្នាក់ដឹកនាំនៃប្រទេសមួយចំនួនដែលកំពុងមានវត្តមាននៅក្នុងបន្ទប់ប្រជុំពេលនេះ។
អ្នកដែលបានទទួលរងគ្រោះខ្លាំងជាងគេពីរបបអ៊ីរ៉ង់ គឺប្រជាជនអ៊ីរ៉ង់។ អ៊ីរ៉ង់ជាប្រទេសដែលមានប្រវត្តិសាស្រ្តយូរលង់ និងមានវប្បធម៌រុងរឿង។ ក៏ប៉ុន្តែ ប្រជាជនអ៊ីរ៉ង់កំពុងរងទុក្ខ វេទនាដោយថ្នាក់ដឹកនាំរបស់ខ្លួន។ ដរាបណារបបអ៊ីរ៉ង់នឹងមិនក្លាយខ្លួនជាដៃគូសន្តិភាពទេ គ្រប់ប្រទេសក្នុងលោកត្រូវតែធ្វើការរួមគ្នាដើម្បីដាក់អ៊ីរ៉ង់ឲ្យនៅឯកោ។
យើងបន់ស្រន់ឲ្យប្រជាជនអ៊ីរ៉ង់មានរដ្ឋាភិបាលត្រឹមត្រូវ និងយុត្តិធម៌ដែលពួកគេសមនឹងទទួលបាននៅថ្ងៃណាមួយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ