រូបភាពសហរដ្ឋអាមេរិកកាន់តែអវិជ្ជមានដោយសារតែលោកដូណាល់ ត្រាំ ជាមនុស្សគ្មានប្រជាប្រិយភាព
ចុះផ្សាយនៅថ្ងៃ៖
រយៈពេលតែប៉ុន្មានខែតែប៉ុណ្ណោះ រូបភាពសហរដ្ឋអាមេរិកចំពោះពិភពលោកកំពុងតាំដាំក្បាលចុះយ៉ាងគំហុក។ ធ្លាក់ចុះបែបនេះក៏ដោយសារតែមតិសាធារណជនលើឆាកអន្តរជាតិកាន់តែមិនទុកចិត្តលោក ដូណាល់ ត្រាំ។ នេះជាសេចក្តីសន្និដ្ឋាននៃការសិក្សាស៊ើបអង្កេតស៊ីជម្រៅមួយរបស់មជ្ឈមណ្ឌលស្រាវជ្រាវ ភៀវ (Pew) ។ ការសិក្សានេះត្រូវបានធ្វើឡើងតាមរយៈការជួបសម្ភាសជាមួយមនុស្សជាង ៤ ម៉ឺនរស់នៅតាមប្រទេសចំនួន ៣៧។ តើមានចំណុចអ្វីខ្លះដែលធ្វើឲ្យមជ្ឈដ្ឋានអន្តរជាតិលែងផ្តល់សេចក្តីទុកចិត្តដល់លោក ដូណាល់ ត្រាំ?
នយោបាយតាមរយៈពាក្យស្លោក «ធ្វើឲ្យសហរដ្ឋអាមេរិករុងរឿងជាថ្មី» (Make America Great Again) របស់លោក ដូណាល់ ត្រាំ ពុំបានធ្វើប្រជាប្រិយភាពរបស់គាត់ក្នុងឋានៈជាប្រធានាធិបតីអាមេរិកមានរស្មីភ្លឺចិញ្ចាចឡើយ។ នេះជាការអង្កេតសិក្សាលើប្រជាប្រិយភាពប្រធានាធិបតីអាមេរិកផង និងលើរូបភាពសហរដ្ឋអាមេរិកចំពោះមជ្ឈដ្ឋានបរទេសផង។ ការសិក្សាស្រាវជ្រាវនេះត្រូវបានរៀបចំដោយមជ្ឈមណ្ឌលស្រាវជ្រាវ Pew ដែលជាស្ថាប័នឯករាជ្យត្រូវបានគេចាត់ទុកថាជាឃ្លាំងគំនិតផែ្នកនយោបាយ។ ស្ថាប័នដ៏ល្បីមួយនេះមានមូលដ្ឋាននៅរដ្ឋធានីវ៉ាស៊ីងតោន។ ការស្រាវជ្រាវនេះត្រូវបានធ្វើឡើងចន្លោះពីថ្ងៃទី១៦ កុម្ភៈ ដល់ថ្ងៃទី៨ ឧសភា ឆ្នាំ២០១៧។ មានមនុស្សចំនួន ៤០ ៤៤៧ នាក់រស់នៅតាមប្រទេសចំនួន ៣៧ ក្នុងទ្វីបចំនួន ៥ បានចូលរួមផ្តល់មតិយោបល់។ សូមជំរាបជូនថា ចាប់តាំងពីឆ្នាំ២០០២មកម្ល៉េះ មជ្ឈមណ្ឌលស្រាវជ្រាវ Pew តែងធ្វើអង្កេតសិក្សាបែបនេះជារៀងរាល់ឆ្នាំ។
លទ្ធផលនៃការសិក្សាស្រាវជ្រាវនេះត្រូវបានផ្សព្វផ្សាយជាសាធារណៈកាលពីចុងខែមិថុនាកន្លងទៅនេះ។ ក្នុងចំណោមអ្នកដែលបានផ្តល់បទសម្ភាសន៍ចំនួនជាង ៤ ម៉ឺននាក់ មាន ៧៤% បាននិយាយថា ពួកគេពុំទុកចិត្តលោក ដូណាល់ ត្រាំ ឡើយ ចំពោះសេចក្តីសំរេចចិត្តរបស់គាត់លើនយោបាយក្នុងស្រុក និងសំណុំរឿងអន្តរជាតិ។ នេះជាកំរិតមិនទុកចិត្តខ្ពស់បំផុតមិនធ្លាប់មានចំពោះប្រធានាធិបតីអាមេរិកពីសំណាក់សាធារណជនបរទេស ក្នុងរយៈពេល ១៥ ឆ្នាំចុងក្រោយនេះ។
តាមរយៈការស្រាវជ្រាវនេះ គេរកឃើញថា ចំណុចអវិជ្ជមានខ្លាំងដែលធ្វើឲ្យមហាជនបរទេសមិនពេញចិត្តលោក ដូណាល់ ត្រាំ គឺដោយសារតែបុគ្គលិកលក្ខណៈ និងកម្មវិធីនយោបាយរបស់គាត់។ ចំណុចមួយចំនួនធ្វើឲ្យគេមិនចូលចិត្តលោក ដូណាល់ ត្រាំ គឺមានជាអាទិដូចជា៖ ចរិតឆាប់ខឹងច្រឡោត (៧៥%), ការមិនចេះអត់ឱនសណ្តោសប្រណី (៦៥%) និងជាប្រភេទមនុស្សគ្រោះថ្នាក់ (៦២%)។ ម៉្យាងទៀត មនុស្សភាគច្រើនដែលបានជួបសម្ភាសក្នុងចំណោម គឺពួកគេមិនពេញចិត្តឡើយចំពោះសំណើកម្មវិធីនយោបាយបច្ចុប្បន្នរបស់លោកប្រធានាធិបតី ។ តួយ៉ាងដូចជា គំរោងសង់ជញ្ជាំងតាមបណ្តោយព្រំដែនប្រទេសម៉ិចសិក, ការសំរេចដកសហរដ្ឋអាមេរិកចេញពីកិច្ចព្រមព្រៀងអន្តរជាតិស្តីពីអាកាសធាតុក្រុងប៉ារីស, ការលប់ចោលកិច្ចព្រមព្រៀងបណ្តូរពាណិជ្ជកម្មសេរីអន្តរប៉ាស៊ីហ្វិក, ការព្យួរទិដ្ឋាការហាមឃាត់ប្រជាជនរស់នៅប្រទេសកាន់សាសនាឥស្លាម និងការលប់ចោលកិច្ចព្រមព្រៀងនុយក្លេអ៊ែរជាមួយអ៊ីរ៉ង់ជាដើម។
ចំណែកប្រជាជនរស់នៅតាមប្រទេសដ៏ទៃទៀតដែលធ្លាប់តែជាសម្ព័ន្ធមិត្តចាក់ទឹកមិនលេចរបស់សហរដ្ឋអាមេរិក គឺមានមនុស្សជាច្រើននាក់ណាស់មិនចូលចិត្តលោក ដូណាល់ ត្រាំ ឡើយ។ ក្នុងនោះមានប្រទេសស៊ុយអែដ (-៨៣%), ហូឡង់ (-៧៥%), អាល្លឺម៉ង់ (-៧៥%), បារាំង (-៧០%) និងកូរ៉េខាងត្បូង (-៧១%)។ ចំណែកប្រជាជននៃប្រទេសជិតខាងសហរដ្ឋអាមេរិក គឺកាណាដា និងម៉ិចសិកក៏ពុំចូលចិត្តលោក ដូណាល់ ត្រាំ ដែរ។ អប្រជាប្រិយភាពនេះ គឺខ្ពស់ជាងលោក George W. Bush ទៅទៀត ដែលធ្លាប់បានកាប់កាប់អំណាចរយៈពេល ២ អាណត្តិរហូតដល់ឆ្នាំ២០០៨។
ដោយទទួលបានអត្រាអប្រជាប្រិយភាពរហូតទៅដល់ ៧៤% បច្ចុប្បន្ននេះ លោក ដូណាល់ ត្រាំកំពុងដឹកមុខមេដឹកនាំពិភពលោកពីររូបទៀត។ តួយ៉ាងលោក ស៊ី ជីនពីង ប្រធានាធិបតីចិនមានកំរិតអប្រជាប្រិយភាព ៥៣% ខណៈពេលលោក វ្ល៉ាឌីមៀរ ពូទីន ប្រធានធិបតីរុស្សីមានគេមិនពេញចិត្តរហូតទៅដល់ ៥៩% ឯណោះ។ ក្នុងចំណោមអ្នកជួបសម្ភាសន៍ទាំងនោះ មានតែ ៥៥% ប៉ុណ្ណោះ ដែលចាត់ទុកលោក ដូណាល់ ត្រាំ ថាជាមេដឹកនាំខ្លាំងពូកែ។ ហើយ ៣៩% យល់ឃើញថា គាត់ជាមនុស្សមានទឹកមាត់ប្រៃពូកែនិយាយបញ្ចុះបញ្ជូលគេ។ ក្នុងចំណោមមនុស្សរស់ចំនួន ៣៧ ប្រទេសដែលបានផ្តល់មតិ មានតែប្រជាជនរស់នៅប្រទេសអ៊ីស្រាអែល (៥៦%) និងរុស្សី (៥៣%) តែប៉ុណ្ណោះដែលមានយោបល់វិជ្ជមានគាំទ្រលោក ដូណាល់ ត្រាំ។
អប្រជាប្រិយភាពបែបនេះរបស់ប្រមុខដឹកនាំអាមេរិកកំពុងធ្វើឲ្យរូបភាពសហរដ្ឋអាមេរិកមើលមកពីខាងក្រៅ ពោល គឺពីសំណាក់មហាជនអន្តរជាតិ កាន់តែអវិជ្ជមានថែមទៀត។ កាលពីឆ្នាំ២០១៦ សហរដ្ឋអាមេរិកទទួលបានការពេញចិត្តចំនួន ៦១%។ ប៉ុន្តែ អត្រានេះបានធ្លាក់ចុះមកត្រឹម ៤៦% សំរាប់ឆ្នាំ២០១៧នេះ។ ទន្ទឹមគ្នានេះផងដែរ ចក្ខុវិស័យសហរដ្ឋអាមេរិកចំពោះលិទ្ធិប្រជាធិបតេយ្យទទួលបានការកោតសរសើរតែចំនួន ៤៦% តែប៉ុណ្ណោះ។
បើទោះបីជានយោបាយរបស់រដ្ឋាភិបាលអាមេរិកក្រោមការដឹកនាំរបស់លោក ដូណាល់ ត្រាំមិនទទួលបានការស្រលាញ់ពេញចិត្តក៏ដោយ ប៉ុន្តែ ផ្ទុយទៅវិញ ជនជាតិអាមេរិកនៅតែមានគេចូលចិត្តដដែល ដោយទទួលបានពិន្ទុ ៥៨%។ ចំណែកវប្បធម៌ប្រជាប្រិយអាមេរិកវិញ មានជាអាទិ តន្រ្តី ភាពយន្ត និងកម្មវិធីទូរទស្សន៍ជាដើម នៅតែទទួលបានការពេញនិយមក្នុងកំរិតខ្ពស់ពីសំណាក់ជនបរទេស ពោល គឺទទួលបានពិន្ទុរហូតទៅដល់ ៦៥%។
សូមរំលឹកជូនថា ពេលបញ្ចប់អាណត្តិប្រធានាធិបតី លោក បារ៉ាក់ អូបាម៉ា ទទួលបានកំរិតប្រជាប្រិយភាពចំនួន ៦៤% ពីសំណាក់មនុស្សម្នាជុំវិញពិភពលោក។ ហើយទន្ទឹមគ្នានោះ រូបភាពសហរដ្ឋអាមេរិកមើលពីខាងក្រៅក៏ទទួលបានការពេញចិត្តចំនួន ៦៤% ផងដែរ។ ពោល គឺជាសហរដ្ឋអាមេរិកបែបវិជ្ជមាន ដែកលគេឯងចង់យកធ្វើជាគំរូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ