យន្តហោះទម្លាក់គ្រាប់បែកអាមេរិកហោះលើតំបន់ជាប់ជម្លោះនៃសមុទ្ទចិនខាងត្បូង
មានយ៉ាងហោចណាស់ក៏យន្តហោះយោធាអាមេរិកមួយគ្រឿងដែរ ដែលបានហោះឆ្វែលលើសមុទ្ទចិនខាងត្បូង នៅថ្ងៃសុក្រនេះ។ នេះបើតាមការគូសបញ្ជាក់របស់ប្រភពយោធាUS Air Force អាមេរិក។ ជាទង្វើហោះហើរដោយចេតនាដើម្បីប្រឆាំងនឹងការទាមទារគ្រប់គ្រង់បូរណភាពដែនទឹកនៅសមុទ្ទចិនខាងត្បូង ដែលប៉េកាំងជាប់ជម្លោះជាមួយបណ្តាប្រទេសជិតខាងជាច្រើន។
ចុះផ្សាយនៅថ្ងៃ៖
ស្តាប់ - ០១:៤១
ការបោះឆ្វែលចូលដែនសមុទ្ទចិនខាងត្បូង នឹងធ្វើឱ្យមហាយក្សចិនច្រឡោតជាថ្មី ជាក់ជាមិនខាន ! ជាពិសេសពេលនេះប្រធានាធិបតីអាមេរិកដូណាល់ ត្រាំ និងសមភាគីចិន ស៊ីជិនពីង កំពុងបង្ហាញវត្តមានទាំងអស់គ្នាក្នុងជំនួបកំពូលហ្សេ២០ផង និងអាចមានជំនួបទ្វេភាគីផង។ តែអាមេរិកមិនខ្វល់ទេ អាមេរិកត្រូវការតែម្យ៉ាងគឺបញ្ជាក់ថា យោធាអាមេរិកបន្តបេសកកម្ម ដោយប្រាកដ និងប្រកបដោយប្រសិទ្ធិភាព ហើយអាមេរិកមានសេរីភាពពេញលេញក្នុងហោះហើរទៅគ្រប់ទិសទី ដែលច្បាប់អន្តរជាតិអនុញ្ញាត។
តាមការពិត តាំងពីអាធ្រាត្រយប់ថ្ងៃព្រហស្បតិ៍មក យន្តហោះចម្បាំងF-15 នៃកងទ័ពស្វ័យការពារជប៉ុននិងយន្តហោះទម្លាប់គ្រាប់បែកអាមេរិកB1-B បានចាកចេញពីមូលដ្ឋានទ័ពនៅប៉ាស៊ីហ្វិក ដើម្បីធ្វើសមយុទ្ធរួមគ្នា។ សមយុទ្ធដែលជាតំណាងនៃសាមគ្គីភាពជប៉ុន-អាមេរិក។ ជាដំបូងយន្តហោះទាំងបីគ្រឿងនេះបានធ្វើការហោះហើរនៅសមុទ្ទចិនខាងកើត ហើយមុននឹងវិលទៅមូលដ្ឋានវិញ យន្តហោះទម្លាក់គ្រាប់បែកអាមេរិកបានបង្ហួសទៅសមុទ្ទចិនខាងត្បូងមួយភ្លែត។ នេះបើតាមការលម្អិតរបស់យោធាអាមេរិក ប៉ុន្តែមិនថាតើយន្តហោះចម្បាំងពីរគ្រឿងនៅតាមជាមួយដែរឬក៏ទេ។
ហេតុការណ៍នេះ បានប្រព្រឹត្តទៅក្នុងបរិបទនៃទំនាក់ទំនងដុនដាបភ្លាមភ្លែតរវាងវ៉ាស៊ីនតោន និងប៉េកាំង និងក្រោយពីអាមេរិកបានបង្កហេតុជាច្រើនលើកច្រើនសាបញ្ឆេះកំហឹងចិន។
ជាឧទាហរណ៍ជាក់ស្តែង កាលពីថ្ងៃអាទិត្យកន្លងទៅ រដ្ឋមន្ត្រីការបរទេសចិន បានបរិហារ សមយុទ្ធអាមេរិកនៅសមុទ្ទចិនខាងត្បូង ថាជាបង្កហេតុនយោបាយនិងយោធាដ៏ធ្ងន់ធ្ងរ។ កាលណោះនាវាអាមេរិកបានចូលទៅកៀកខ្លាំង តំបន់ប្រជុំកោះប៉ារ៉ាសែល ដែលវៀតណាមទាមទារចំណែកដែរ តែចិនបានគ្រប់គ្រងតាំងពីរាប់ទសវត្សរ៍មកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ