អាមេរិកទម្លាយឯកសារសម្ងាត់ចុងក្រោយទាក់ទងនឹងការធ្វើឃាតអតីតប្រធានាធិបតីKennedy
ចុះផ្សាយនៅថ្ងៃ៖
ស្តាប់ - ០៥:៤២
ចាប់ពីព្រហស្បតិ៍ទី២៦តុលា២០១៧នេះទៅ សាធារណជនគ្រប់រូបអាចរកអានបាន តាមទំព័រអ៊ីនធ័រនែត នូវរាល់ឯកសារសម្ងាត់ ចុងក្រោយបង្អស់ ចំនួនជាងបីពាន់ឯកសារ ទាក់ទងនឹងការធ្វើឃាតអតីតប្រធានាធិបតីអាមេរិក ចន ឃែណឺឌី John Fitzgerald Kennedy កាលពីជាង៥០ឆ្នាំមុន។ ជាសេចក្តីសម្រេចចិត្តរបស់លោកត្រាំ ក្នុងនាមជាប្រធានាធិបតីអាមេរិក ដែលត្រូវបញ្ជាក់ជាផ្លូវការនៅថ្ងៃព្រហស្បតិ៍ទី ២៦ តុលា ២០១៧នេះ។ ប៉ុន្តែសួរថាតើការទម្លាយឯកសារសម្ងាត់នេះនឹងផ្តល់ប្រយោជន៍អ្វីខ្លះ ? ហើយហេតុអ្វីទើបទម្លាយនៅពេលនេះ ?
លោក ចន ឃែណឺឌី ដែលជាប្រធានាធិបតីអាមេរិកទី ៣៥ ត្រូវឃាតករបាញ់សម្លាប់ នៅកណ្តាលហ្វូងមហាជន ពេលកំពុងបំពេញទស្សនកិច្ចនៅក្រុង ដាឡាស រដ្ឋតិចសាស់ កាលពីថ្ងៃទី២២វិច្ឆិកា ១៩៦៣។ កាលណោះលោកទើបមានវ័យ៤៦ឆ្នាំ និងជាប្រធានាធិបតីដែលមានប្រជាប្រិយភាពខ្ពស់បំផុត។ ជាង៥០ឆ្នាំក្រោយមរណភាព សំណុំរឿងឃាតកម្មនេះ នៅតែបន្តផុសផុលគ្មានថ្ងៃចប់ និងបន្តមកដល់នៅថ្ងៃនេះទៀត តាមរយៈការទម្លាយឯកសារសម្ងាត់ចុងក្រោយជាសាធារណៈ ក្រោយពីមានសេចក្តីសម្រេចរបស់ប្រធានាធិបតី គឺលោក ដូណាល់ ត្រាំ។ ប៉ុន្តែឯកសារដែលរសើបខ្លាំងបំផុត ត្រូវពន្យារពេល៦ខែ បន្ថែមទៀត។
តាមធម្មតាឯកសារទាំងនេះ ត្រូវរក្សាជាការសម្ងាត់រហូតដល់ឆ្នាំ ២០២៩។ ប៉ុន្តែ ក្រោយពីមានការបញ្ចាំងភាពយន្តស្តីឃាតកម្មលើលោកឃែណឺឌី របស់ផលិតករ Olivier Stone គ្រប់គ្នាកើតសង្ស័យថាមានការផ្សំគំនិតសម្លាប់ប្រធានាធិបតីអាមេរិក និងសង្ស័យទាំងលើលទ្ធផលអង្កេតផ្លូវការទៀត។ ហើយនៅថ្ងៃទី ២៦តុលា ១៩៩២ ច្បាប់អាមេរិកបានបង្ខោចកំណត់រក្សាឯកសារអង្កេតឃាតកម្មលើលោក ឃែណឺឌី ជាសំងាត់ត្រឹម២៥ឆ្នាំ ពោលគឺបង្ខិតមកត្រឹមថ្ងៃទី ២៦ តុលា ២០១៧នេះ ដោយត្រូវបើកទំលាយជាសាធារណៈក្នុងប្រព័ន្ធបណ្ណសារជាតិ និងលែងមានបម្រាមអ្វីទាំងអស់ លើកលែងតែប្រធានាធិបតីកាន់អំណាច ប្រឆាំង។
ខួប៥០ឆ្នាំនៃមរណភាពរបស់លោក ឃែណឺឌី
តែលោកត្រាំ បានបង្ហើបសេចក្តីសម្រេចចិត្តតាំងពីថ្ងៃសៅរ៍មក ថា ឯកសារសម្ងាត់បំផុត ក្នុងសំណុំរឿងឃាតកម្មលើអតីតប្រធានាធិបតីឃែណឺឌី នឹងត្រូវបើកទម្លាយបង្ហាញជាសាធារណៈ ដើម្បីតម្លាភាព។ លោក ត្រាំ ធ្លាប់បានព្រលយអំពីភាពសង្ស័យក្នុង សំណុំរឿងនេះតាំងពីក្នុងសម័យឃោសនាបោះឆ្នោតបេក្ខជនប្រធានាធិបតីបក្សមកម្ល៉េះ។ ដោយលោកមានចម្ងល់នឹងរូបភាពឯកសារ(នៅក្នុងសារព័ត៌មាន National Enquirer ឆ្នាំ១៩៦៣ )ឃើញឃាតករឈរចែកខិត្តបណ្ណឃោសនានយោបាយកាស្ត្រូ ជាមួយនឹងមនុស្សម្នាក់ទៀត។ លោកឆ្ងល់ថាតើបុរសនោះជានរណា ? ហេតុអ្វីបានជាគ្មាននរណានិយាយពីជនម្នាក់នោះសោះ ? ដោយពិតទៅបុរសនោះគឺជាឪពុករបស់ លោក ថេត គ្រូស បេក្ខជនប្រធានាធិបតីបក្សសាធារណរដ្ឋ។ សម្រាប់លោកត្រាំឃាតកម្មលើលោក កេនឺឌី ទំនងជាការផ្សំគំនិតក្បត់ មិនមែនជាឃាតកម្មធ្វើឡើងឃាតករទោល ដូចការសន្និដ្ឋានជាផ្លូវការទេ។
សេណារីយោផ្សំគំនិត គុយបា រុស្ស៊ី CIA FBI ...
ឯកសារអង្កេតឃាតកម្មលើអតីតប្រធានាធិបតីអាមេរិករបស់CIA FBI និងតុលាការអាមេរិក ត្រូវបានទម្លាយជាង៣ម៉ឺនរួចមកហើយ ហើយថ្ងៃនេះជាការទម្លាយឯកសារចុងក្រោយ ចំនួនប្រមាណជាង៣១០០សំណុំ និងសំណុំឯកសារ ជាប់បម្រាមរាប់សិបពាន់ផ្សេងទៀត ត្រូវ បង្ហោះផ្សាយនៅក្នុងប្រព័ន្ធវិបសៃត៍បណ្ណសារជាតិ។
ខ្លឹមសារក្នុងឯកសារសម្ងាត់ទាំងនេះ មានពាក់ព័ន្ធនឹងបរិបទនៃឃាតកម្ម សកម្មភាពរបស់ឃាតករ និងសកកម្មភាពរបស់ភ្នាក់ងារចារកិច្ចអាមេរិក ព្រមទាំងអំណាចជ្រៀតជ្រែករបស់បរទេស។ ស្លាប់៤៨ម៉ោងក្រោយការចាប់ខ្លួន ឃាតករ លី ហារវេ អូស្វ័ល Lee Harvey Oswald បានធ្វើដំណើរទៅក្រុងម៉ិចស៊ិកូ ពីរបីសប្តាហ៍មុនហេតុការណ៍ ឃាតកម្ម។ ដំណើររបស់ឃាតករនេះ ស្ថិតក្រោមការតាមដានរបស់របស់ភ្នាក់ងារចារកិច្ចអាមេរិក CIA ព្រោះ Lee Harvey Oswald ទំនងជាទៅទីនោះដើម្បីជួបចារបុរសរុស្ស៊ីនិងគុយបា និយាយអំពីផែនការសម្លាប់ប្រធានាធិបតីអាមេរិក។ ឯកសារនេះ ក៏អាចបើកកកាយឱ្យឃើញអំពីកង្វះខាតរបស់ភ្នាក់ងារចារកិច្ចអាមេរិក ហើយប៉ុនប៉ងលាក់។
ប៉ុន្តែបើតាមអ្នកជំនាញ ការទម្លាយឯកសារសម្ងាត់នេះ ទំនងជាមិនអាចបិទបញ្ចប់ទេរវកថាស្តីពីមរណភាពរបស់ប្រធានាធិបតីអាមេរិក ដ៏ពេញនិយមដូចរូបលោក ឃែណឺឌី បានទេ។ ពលរដ្ឋអាមេរិកជាងពាក់កណ្តាល នៅតែបន្តគិតជានិច្ចថា ឃាតករមិនធ្វើសកម្មភាពតែម្នាក់ឯងទេ។
ជំនឿថាមានការផ្សំគំនិតក្បត់សម្លាប់ប្រធានាធិបតី ជាមួយគុយបា រុស្ស៊ី FBI CIA ឬពួកម៉ាហ្វីយ៉ា មិនអាចជម្រុះអស់ពីផ្នត់គំនិតអាមេរិកបានទេ។ លោក ដូណាល់ ត្រាំផ្ទាល់ ក៏ចោទសួរអំពីទំនួលខុសត្រូវរបស់ឪពុកលោកថេត គ្រូស អតីតគូប្រជែងក្នុងបក្ស។ ផ្ទុយទៅវិញ ការទម្លាយឯកសារ ដើម្បីតម្លាភាព ទំនងជារឹតតែធ្វើឱ្យមានភាពសង្ស័យ និងច្របូកច្របល់ ថែមទៀតទៅវិញទេ។ សម្មតិកម្មថាមានការផ្សំគំនិតគ្នា នឹងកាន់តែផុសផុលទៀត ព្រោះឯកសារខ្លះ ត្រូវបានបំផ្លាញខ្ទេចទៅហើយ។ នេះជាភស្តុតាងថ្មី បញ្ជាក់ថាអាមេរិកគ្មានថ្ងៃដែលគេដឹងការពិតនៃឃាតកម្មសម្លាប់លោក ឃែណឺឌី ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ