អ៊ីរ៉ង់ថា នឹងចម្រើនធាតុអ៊ុយរ៉ាញ៉ូម បើសិនអាមេរិកដើរចេញពីកិច្ចព្រមព្រៀងនុយក្លេអ៊ែរ
ចុះផ្សាយនៅថ្ងៃ៖
ស្តាប់ - ០៧:២៧
រដ្ឋមន្រ្តីការបរទេស នៅថ្ងៃសៅរ៍ទី ២១មេសា បានគំរាមថា នឹងចម្រើនធាតុអ៊ុយរ៉ានីញ៉ូម យ៉ាងស្វាហាប់ បើសិនអាមេរិកដកខ្លួនចេញពីកិច្ចព្រមព្រៀងអន្តរជាតិស្តីពីនុយក្លេអ៊ែរអ៊ីរ៉ង់។ មានវត្តមាននៅទីក្រុងញូវយ៉ក ដើម្បីចូលរួម នៅក្នុងសន្និសីទរបស់អង្គការសហប្រជាជាតិដើម្បីសន្តិភាព ប្រមុខការបរទេសអ៊ីរ៉ង់ លោកហ្សាវ៉ាដ ហ្សារីហ្វ បាននិយាយប្រាប់អ្នកកាសែតថា អ៊ីរ៉ង់ មិនចង់មានអាវុធនុយក្លេអ៊ែរនោះទេ ប៉ុន្តែ បើសិនលោកប្រធានាធិបតី ដូណាល់ ត្រាំ ដកអាមេរិកចេញពីកិច្ចព្រមព្រៀង នុយក្លេអ៊ែរ ដូចការគំរាមមែន នោះ អ៊ីរ៉ង់ ក៏នឹងឆ្លើយតបវិញ ជាមួយនឹងការផលិត ចម្រើនធាតុអ៊ុយរ៉ានីញ៉ូម ដែលជាគន្លឹះសំខាន់ សម្រាប់ផលិតអាវុធនុយក្លេអ៊ែរ។
រដ្ឋាភិបាលអ៊ីរ៉ង់ប្រើពាក្យគំរាមចង់ចម្រើនសារធាតុ អ៊ុយរ៉ានីញ៉ូម នៅបីសប្តាហ៍មុន ដែលលោកប្រធានាធិបតី អាមេរិក ដូណាល់ ត្រាំ ត្រូវសម្រេចចិត្តសាជាថ្មី ថា តើត្រូវបន្ត ព្យួរទណ្ឌកម្មសេដ្ឋកិច្ចលើអ៊ីរ៉ង់ ឬក៏ត្រូវដើរចេញពីកិច្ចព្រមព្រៀងនុយក្លេអ៊ែរអ៊ីរ៉ង់។
កាលពីខែមករា នៅពេលដែលលោកត្រូវជូនដំនឹងទៅសភាអាមេរិក ពីជំហររបស់រដ្ឋាភិបាល លើសំណុំរឿងនុយក្លេអ៊ែរអ៊ីរ៉ង់ លោកដូណាល់ ត្រាំ បាននិយាយថា លោកនៅមិនទាន់សម្រេចចិត្តដកអាមេរិកចេញពីកិច្ចព្រមព្រៀងនុយក្លេអ៊ែរ។ លោកចង់ទុកពេលចុងក្រោយ ឲ្យប្រទេសហត្ថលេខីផ្សេងទៀត ដូចជាបារាំង អាល្លឺម៉ង់ និងអង់គ្លេស ទៅសើរើ ចរចាឡើងវិញ ជាមួយ អ៊ីរ៉ង់ពីលក្ខខណ្ឌមួយចំនួន ដែលលោកដូណាល់ ត្រាំ វាយតម្លៃថា ធូររលុង និងផ្តល់ឱកាសឲ្យអ៊ីរ៉ង់អាចមានសមត្ថភាពផលិតអាវុធនុយក្លេអ៊ែរ។
សូមអាន៖ អឺរ៉ុបនិងអ៊ីរ៉ង់រួមគ្នាជាធ្លុងមួយ ការពារកិច្ចព្រមព្រៀងនុយក្លេអ៊ែរ
ទៅតាមកិច្ចព្រមព្រៀងឆ្នាំ ២០១៥ អ៊ីរ៉ង់យល់ព្រមផ្អាក មិនចម្រើនធាតុអ៊ុយរ៉ានីញ៉ូម រហូតដល់ឆ្នាំ ២០២៥ ប៉ុន្តែ អាមេរិករបស់លោកដូណាល់ ត្រាំ ចង់ឲ្យអ៊ីរ៉ង់ឈប់ចម្រើនធាតុអ៊ុយរ៉ានីញ៉ូម ជារៀងរហូត។ លោកដូណាល់ ត្រាំ បាននិយាយទុកពេលឲ្យមហាអំណាចនៅ អឺរ៉ុប ដាក់សម្ពាធ លើអ៊ីរ៉ង់ មុននឹងលោកត្រូវសម្រេចចិត្ត នៅថ្ងៃទី១២ឧសភាខាងមុខនេះ។ ប្រទេសហត្ថលេខីផ្សេងទៀត ដូចជាបារាំង ចិន រុស្ស៊ី អាល្លឺម៉ង់ និងអង់គ្លេស វិញ បានព្រមានរួចហើយ ពីគ្រោះថ្នាក់ រលាយបាត់កិច្ចព្រមព្រៀង ដែលជួយធានា មិនឲ្យអ៊ីរ៉ង់បង្កើតកម្មវិធីផលិតនុយក្លេអ៊ែរយោធា។
នៅថ្ងៃចន្ទ ទី ២៣ មេសាប្រធានាធិបតី បារាំង លោកអេម៉ានុយអែល ម៉ាក្រុងត្រូវធ្វើទស្សនកិច្ចផ្លូវរដ្ឋ នៅសហរដ្ឋអាមេរិក។ គេវាយតម្លៃថា លោកអេម៉ានុយអែល ម៉ាក្រុង ដែលនឹងជួបលោកដូណាល់ ត្រាំ នៅថ្ងៃចន្ទ អាចនឹងបញ្ចុះបញ្ចូល សាជាថ្មី លោកដូណាល់ ត្រាំ កុំឲ្យដកអាមេរិកចេញពីកិច្ចព្រមព្រៀងនុយក្លេអ៊ែរ។ លោកដូណាល់ ត្រាំ ប្រហែលជានឹងត្រូវនិយាយពីរឿងកិច្ចព្រមព្រៀងនុយក្លេអ៊ែរអ៊ីរ៉ង់ ម្តងទៀត ជាមួយ លោកស្រីនាយករដ្ឋមន្រ្តីអាល្លឺម៉ង់ ដែលត្រូវធ្វើទស្សនកិច្ចនៅទីក្រុងវ៉ាស៊ីនតោន នៅថ្ងៃសុក្រ សប្តាហ៍ក្រោយ។
រដ្ឋមន្រ្តីការបរទេស៖ អ៊ីរ៉ងមិនអាចគោរពកិច្ចព្រមព្រៀងតែម្នាក់ឯងនោះទេ
នៅថ្ងៃសៅរ៍ រដ្ឋមន្រ្តីការបរទេសអ៊ីរ៉ង់បានបញ្ជាក់ បើសិនលោកដូណាល់ ត្រាំ ប្រកាសជាផ្លូវការ ដកអាមេរិកចេញពីកិច្ចព្រមព្រៀង នោះ អ៊ីរ៉ង់ ក៏មិនអាចនៅបន្តគោរពតាមកិច្ចព្រមព្រៀងតែម្នាក់ឯងដែរ។ អ៊ីរ៉ង់នឹងចាប់ផ្តើមសកម្មភាព ចម្រើនសារធាតុអ៊ុយរ៉ានីញ៉ូម របស់ខ្លួនឡើងវិញ។ គេមិនដឹងថា ដោយប្រើពាក្យគំរាមបែបនេះ តើប្រមុខការបរទេសអ៊ីរ៉ង់កំពុងចង់មានន័យថា អ៊ីរ៉ង់នឹងត្រលប់ទៅចម្រើនធាតុអ៊ុយរ៉ានីញ៉ូមកម្រិតខ្ពស់ ដែលអាចគេប្រើសម្រាប់កម្មវិធីនុយក្លេអ៊ែរយោធាដែរឬក៏យ៉ាងនោះទេ។
តាមកិច្ចព្រមព្រៀង ឆ្នាំ ២០១៥ អ៊ីរ៉ង់ មានសិទ្ធិចម្រើនធាតុអ៊ុយរ៉ានីញ៉ូមត្រឹមតែ ៥ភាគរយ ប៉ុណ្ណោះសម្រាប់សកម្មភាព នុយក្លេអ៊ែរស៊ីវិល ដូចជាផលិតថាមពលអគ្គិសនីជាដើម។ ក្រុមប្រទេសលោកខាងលិច បានហាមឃាត់អ៊ីរ៉ង់ មិនឲ្យចម្រើនសារធាតុអ៊ុយរ៉ានីញ៉ូម កម្រិត ចាប់ពី២០ភាគរយឡើង ព្រោះថា អ៊ុយរ៉ានីញ៉ូម ចម្រើនចាប់ពីកម្រិត២០ រហូតដល់៨០ភាគរយអាចគេយកទៅប្រើសម្រាប់ផលិតបានគ្រាប់បែកនុយក្លេអ៊ែរ។ នៅក្នុងកិច្ចព្រមព្រៀងនុយក្លេអ៊ែរ អ៊ីរ៉ង់ អ៊ីរ៉ង់ ត្រូវបញ្ជូនសារធាតុអ៊ុយរ៉ានីញ៉ូម ទៅចម្រើននៅបរទេស គឺមិនអាចមានសិទ្ធិធ្វើនៅក្នុងស្រុកនោះទេ។
សម្រាប់អ្នកជំនាញរុស្ស៊ី ទោះជាអ៊ីរ៉ង់គំរាមថា នឹងត្រលប់ទៅចម្រើនសារធាតុអ៊ុយរ៉ានីញ៉ូម យ៉ាងសកម្ម ប៉ុន្តែ គេមិនជឿថា អ៊ីរ៉ង់នឹងអាចមានសមត្ថភាព ចម្រើនសារធាតុអ៊ុយរ៉ានីញ៉ូមកម្រិតខ្ពស់ជាង ២០ភាគរយ ដោយខ្លួនឯងនៅពេលនេះទេ។ អ៊ីរ៉ង់ត្រូវការពេលវេលាយូរទៀតដើម្បីមានសមត្ថភាពចម្រើនសារធាតុអ៊ុយរ៉ានីញ៉ូម សម្រាប់កម្មវិធីនុយក្លេអ៊ែរយោធា។
គេមិនអាចរកបានកិច្ចព្រមព្រៀងណាមួយជាមួយអាមេរិក?
នៅក្រោយការចរចាអស់២ឆ្នាំ ជាមួយ អ៊ីរ៉ង់ សហគមន៍អន្តរជាតិបានសម្រេចចុះហត្ថលេខាលើកិច្ចព្រមព្រៀងដែលនៅក្នុងនោះ អ៊ីរ៉ង់បានយល់ព្រមបញ្ឈប់កម្មវិធីនុយក្លេអ៊ែរយោធារបស់ខ្លួន ជាថ្នូរនឹងការដកទណ្ឌកម្មសេដ្ឋកិច្ចពីសហគមន៍អន្តរជាតិ ហើយនិងអាមេរិក។ ប៉ុន្តែ អាមេរិករបស់លោកដូណាល់ ត្រាំវិញ បានគំរាមរាល់លើកថា នឹងដកខ្លួនចេញពីកិច្ចព្រមព្រៀងនុយក្លេអ៊ែរ បើសិនគេមិនសើរើកិច្ចព្រមព្រៀង ដែលលោកដូណាល់ត្រាំ ចោទថា លំអៀង ផ្តល់ប្រយោជន៍ទៅឲ្យអ៊ីរ៉ង់។
តាំងពីមុនចូលកាន់តំណែងជាប្រធានាធិបតីអាមេរិក លោកដូណាល់ ត្រាំ អរិភាព រិះគន់កិច្ចព្រមព្រៀងនុយក្លេអ៊ែរ ដែលលោកចាត់ទុកថា ជាកិច្ចព្រមព្រៀងដ៏អាក្រក់។ ប៉ុន្តែ ប៉ុន្មានដងមកហើយ គឺរាល់លើកដែលលោកត្រូវជូនដំណឹងទៅសភា អាមេរិក ពីរឿងអ៊ីរ៉ង់គោរព កិច្ចព្រមព្រៀងនុយក្លេអ៊ែរ លោកដូណាល់ ត្រាំ មិនបានប្រកាសដកអាមេរិកចេញពីកិច្ចព្រមព្រៀង ដូចពាក្យគំរាមនោះទេ។
ប៉ុន្តែ នៅថ្ងៃទី ១២ឧសភា ខាងមុខ គេបារម្ភថា លោកដូណាល់ ត្រាំ អាចចិត្តដាច់ សម្រេច ដកអាមេរិកចេញពីកិច្ចព្រមព្រៀង នុយក្លេអ៊ែរអ៊ីរ៉ង់។ ប៉ុន្តែ មុននឹងធ្វើការសម្រេចចិត្តចុងក្រោយ លោកដូណាល់ ត្រាំ បានទាមទារថា បើសិនគេមិនអាចសើរើកិច្ចព្រមព្រៀង ឆ្នាំ ២០១៥ នោះ ប្រទេសហត្ថលេខីផ្សេងទៀត ក៏ត្រូវតែចរចាជាមួយ អ៊ីរ៉ង់ ដើម្បីធ្វើកិច្ចព្រមព្រៀងបំពេញបន្ថែម ដែលនៅក្នុងនោះ អ៊ីរ៉ង់ ត្រូវតែបញ្ឈប់កម្មវិធីផលិតមីស៊ីលដែលគ្រោះថ្នាក់ដល់អ៊ីស្រាអែល សម្ព័ន្ធមិត្តរបស់អាមេរិក។ បារាំង អាល្លឺម៉ង់ និងអង់គ្លេស ដែលមិនចង់ឲ្យកិច្ចព្រមព្រៀងនុយក្លេអ៊ែរអ៊ីរ៉ង់ស្លាប់ បាត់រូបរាង បានយល់ស្របជាមួយអាមេរិក ដោយ បានបញ្ចេញសំឡេងរិះគន់ ខ្លាំងៗ អ៊ីរ៉ង់ ក្នុងរឿងបាញ់សាកល្បងមីស៊ីល ហើយនិងអន្តរាគមន៍យោធារបស់អ៊ីរ៉ង់ នៅក្នុងជម្លោះសង្រ្គាមស៊ីវិលនៅក្នុងតំបន់ដើមបូព៌ា សព្វថ្ងៃ។
សម្រាប់រដ្ឋមន្រ្តីការបរទេសអ៊ីរ៉ង់ ការប៉ុនប៉ងរបស់ថ្នាក់ដឹកនាំបរទេស ដើម្បីបញ្ចុះបញ្ចូលលោកដូណាល់ ត្រាំ គឺជាការខាតបង់ពេលវេលា។ ដោយដកអាមេរិកចេញពីកិច្ចព្រមព្រៀង អន្តរជាតិ លោកប្រធានាធិបតីដូណាល់ ត្រាំ បានធ្វើឲ្យគេបាត់ជំនឿ ទុកចិត្តលើរដ្ឋាភិបាលអាមេរិក ហើយនិងអាចអន្តរាយដល់ការចរចា ផ្សេងៗទៀតដូចជា ជំនួបកំពូលអាមេរិក និងកូរ៉េខាងជើង ជាដើម។ ប្រមុខការបរទេសអ៊ីរ៉ង់ បាននិយាយថា ដោយដកអាមេរិកចេញពីកិច្ចព្រមព្រៀង នោះលោកដូណាល់ ត្រាំចង់បង្ហាញសារមួយថា គេមិនអាចធ្វើកិច្ចព្រមព្រៀង ម៉ត់ចត់ណាមួយ ជាមួយអាមេរិកនោះទេ ព្រោះថា នៅទីបំផុត អាមេរិកតែងគិតថា អ្វីដែលខ្លួនធ្វើគឺត្រូវ ចំណែកអ្នកដទៃធ្វើគឺតែងតែខុស មិនល្អ ដែលគេអាចចរចា សើរើឡើងវិញ គ្រប់ពេលវេលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ