ក្រោយព្រឹត្តិការណ៍បាញ់រះក្នុងរដ្ឋ Florida កម្មវិធីហ្វឹកហ្វឺនទាហានអារ៉ាប៊ីសាអូឌីតនៅអាមេរិកកំពុងចោទជាបញ្ហា?
ចុះផ្សាយនៅថ្ងៃ៖
ស្តាប់ - ០៥:១៧
កាលពីថ្ងៃសុក្រ ទី៦ ធ្នូ ទាហានអារ៉ាប៊ីសាអូឌីតម្នាក់ដែលកំពុងហ្វឹកហ្វឺននៅមូលដ្ឋានទ័ពអាកាសនាវាចរណ៍អាមេរិកឈ្មោះ Pensacola ក្នុងរដ្ឋ Florida បានបាញ់រះនៅក្នុងបន្ទប់ហ្វឹកហ្វឺនដោយបណ្តាលស្លាប់មនុស្ស ៣នាក់ និងរបួស ៨នាក់។ ខណៈនេះ ភាគីអារ៉ាប៊ីសាអូឌីត និងអាមេរិកកំពុងបើកការស៊ើបអង្កេតដើម្បីស្វែងយល់ និងស្វែងរកការពិត។ គួររម្លឹកថា អាមេរិក និងអារ៉ាប៊ីសាអូឌីតជាសម្ព័នមិត្តចាក់ទឹកមិនលេច។ តែចង់ ឬមិនចង់ ព្រឹត្តិការណ៍មួយនេះអាចធ្វើឲ្យរដ្ឋបាលអាមេរិកពិចារណាឡើងវិញលើកម្មវិធីហ្វឹកហ្វឺនទាហានបរទេស និយាយជារួម និងទាហានអារ៉ាប៊ីសាអូឌីត និយាយដោយឡែក។
គេនៅមិនទាន់អាចនិយាយបានទេថា ព្រឹត្តិការណ៍ដែលកើតមាននៅមូលដ្ឋានទ័ពអាកាសនាវាចរណ៍អាមេរិក Pensacola ក្នុងរដ្ឋ Florida នឹងធ្វើឲ្យទំនាក់ទំនងរវាងអាមេរិក និងអារ៉ាប៊ីសាអូឌីតស្គាល់ភាពរកាំរកូសនោះ។ មិនទាន់អាចនិយាយបាន ព្រោះគេត្រូវរង់ចាំលទ្ធផលស៊ើបអង្កេតពីភាគីអាមេរិកក៏ដូចជាអារ៉ាប៊ីសាអូឌីតឲ្យបានស៊ីជ្រៅ និងច្បាស់លាស់ជាមុនសិន។ ៣ថ្ងៃក្រោយព្រឹត្តិការណ៍នេះមក មានសំណួរជាច្រើនដែលគេនៅមិនទាន់មានចម្លើយនៅឡើយទេ៖ហេតុអ្វីបានជាខ្មាន់កាំភ្លើងជនជាតិអារ៉ាប៊ីសាអូឌីតរូបនោះធ្វើសកម្មភាពយ៉ាងនេះ អ្វីទៅជាគោលដៅរបស់រូបគេ និងថា តើរូបគេពិតជាបានធ្វើតែម្នាក់ឯង ឬមួយក៏មានការចូលរួម ឃុបឃិតពីអ្នកផ្សេង?។
អ្វីដែលគេដឹងនៅពេលនេះដោយផ្អែកលើព័ត៌មានផ្តល់ដោយ FBI ខ្មាន់កាំភ្លើងមានឈ្មោះ ម៉ូហាម៉េដ អាល់ស្ហាញរ៉ានី មានអាយុ ២១ឆ្នាំ និងជាអនុសេនីយត្រីក្នុងអង្គភាពទ័ពអាកាសអារ៉ាប៊ីសាអូឌីត។ កាសែត New York Times ដែលបានស្រង់សម្តីអ្នកទទួលខុសត្រូវអាមេរិកម្នាក់ឲ្យដឹងថា ខ្មាន់កាំភ្លើងមិនមានចំណងទាក់ទងជាមួយក្រុមភេរវនិយមណាមួយទេ។ ចំណែកស្ថាប័នឃ្លាំមើលចលនាជីហាតបានប្រាប់ឲ្យដឹងថា នៅមុនធ្វើសកម្មភាព ខ្មាន់កាំភ្លើងបានបង្ហោះសារមួយចំនួនប្រឆាំងអាមេរិកនៅក្នុងបណ្តាញសង្គម Twitter របស់ខ្លួនមានដូចជា « ខ្ញុំប្រឆាំងនឹងអំពើអាក្រក់ ហើយអាមេរិកបានប្រែខ្លួនជាប្រជាជាតិអាក្រក់ »។
« ខ្ញុំមិនប្រឆាំងអស់លោកដោយសារតែអស់លោកជាជនជាតិអាមេរិកាំងទេ។ ខ្ញុំមិនស្អប់អស់លោកដោយសារតែសេរីភាពរបស់អស់លោកទេ។ តែខ្ញុំស្អប់អស់លោកព្រោះជារៀងរាល់ថ្ងៃ អស់លោកគាំទ្រ ចាយលុយ និងប្រព្រឹត្តបទឧក្រិដ្ឋប្រឆាំងនឹងអ្នកកាន់សាសនាអ៊ីស្លាម និងមនុស្សលោកទាំងមូល »។ អ្នកស៊ើបអង្កេតកំពុងស្វែងចង់ដឹងថា តើសារទាំងអស់នេះជាសារដែលខ្មាន់កាំភ្លើងបានសរសេរដោយដៃឯង និងបានបង្ហោះដោយខ្លួនឯងមែន ឬយ៉ាងណា?។ ពិតណាស់ខណៈនេះ គេនៅមិនអាចសន្និដ្ឋាន និងនិយាយអ្វីឲ្យបានច្រើនជាងនេះទេ។ តែគេសង្កេតឃើញមានប្រតិកម្មព្រោងព្រាតខុសគ្នាពីមជ្ឈដ្ឋានអ្នកនយោបាយអាមេរិកគ្រប់និន្នាការ។
តែអ្វីដែលក្រុមអ្នកសាធារណរដ្ឋ និងអ្នកប្រជាធិបតេយ្យបានឯកភាពគ្នានោះ គឺសុំឲ្យមានការពិនិត្យមើលឡើងវិញនូវកិច្ចសហប្រតិបត្តិការយោធារវាងអាមេរិក និងអារ៉ាប៊ីសាអូឌីត។ គួរបញ្ជាក់ថាជាមួយនឹងកិច្ចសហប្រតិបត្តិការមួយនេះ មានទាហានអារ៉ាប៊ីសាអូឌីតជាច្រើនរយនាក់ក្នុង១ឆ្នាំៗបានចេញទៅហ្វឹកហ្វឺននៅសាលាទាហានអាមេរិកាំង។ អ្នកសាធារណរដ្ឋភាគច្រើនបានយល់ឃើញថា អារ៉ាប៊ីសាអូឌីតជាសម្ព័ន្ធមិត្តម្នាក់ តែអ្វីដែលបានកើតមាននៅ Florida ពេលនេះជារឿងអាក្រក់ដែលគេគួរព្យួរកិច្ចសហប្រតិបត្តិការយោធារវាងអាមេរិក និងអារ៉ាប៊ីសាអូឌីតមួយរយៈសិន។ លោក Lindsey Graham សមាជិកព្រឹទ្ធសភាមកពីបក្សសាធារណរដ្ឋ និងជាមនុស្សជំនិតម្នាក់លោកដូណាល់ ត្រាំបានយល់ឃើញថា ដរាបណាគេមិនទាន់មានការពិតជុំវិញព្រឹត្តិការណ៍បាញ់រះនៅ Florida ទេ ដរាបនោះគេមិនអាចបន្តកិច្ចសហប្រតិបត្តិការយោធានោះបានឡើយ។
ចំណែកទីប្រឹក្សាសន្តិសុខជាតិនៃសេតវិមានលោក Robert O’Brien ហ៊ានទាំងសង្ស័យថា ទង្វើរបស់ខ្មាន់កាំភ្លើងមានរូបភាពជាអំពើភេរវនិយម។ សម្រាប់រដ្ឋមន្រ្តីក្រសួងការពារជាតិលោក Mark Esper វិញ លោកបានចេញមុខការពារកម្មវិធីហ្វឹកហ្វឺនទាហានបរទេសរបស់អាមេរិក តែស្នើឲ្យពិនិត្យឡើងវិញនូវនីតិវិធីត្រួតពិនិត្យលើជនបរទេសដែលចូលហ្វឹកហ្វឺនក្នុងទឹកដីអាមេរិកាំង។ លោក Esper បានគូសបញ្ជាក់ថា កម្មវិធីរបស់អាមេរិកមួយនេះជាកម្មវិធីដែលគូប្រជែងអាមេរិកគ្មានទេ ដូចយ៉ាងរុស្ស៊ី ឬចិនជាដើម។ ខុសពីគណបក្សសាធារណរដ្ឋ គណបក្សប្រជាធិបតេយ្យដែលជាបក្សប្រឆាំងបានបរិហារត្រង់លើនយោបាយរបស់រដ្ឋបាលលោកដូណាល់ ត្រាំចំពោះអារ៉ាប៊ីសាអូឌីត។« ទំនាក់ទំនងដែលយើងកំពុងមានជាមួយអារ៉ាប៊ីសាអូឌីតជារឿងមិនអាចទទួលយកបានទេ » នេះជាការបញ្ជាក់របស់លោក Cory Booker បេក្ខជនប្រធានាធិបតីមកពីបក្សប្រជាធិបតេយ្យសម្រាប់ការបោះឆ្នោតប្រធានាធិបតីនៅឆ្នាំ ២០២០។
ពិតណាស់ អាមេរិក និងអារ៉ាប៊ីសាអូឌីតជាសម្ព័ន្ធមិត្តប្រវត្តិសាស្រ្តដែលគ្មាននរណាអាចបំបែកបានទេ។ តែគេត្រូវហ៊ានទទួលស្គាល់ថា មិត្តមួយគូនេះក៏ធ្លាប់ថ្នាំងថ្នាក់ អាក់អន់ស្រពន់ចិត្តនឹងគ្នាមិនតិចដែរនៅក្នុងសំណុំរឿងទ្វេភាគីក៏ដូចជាសំណុំរឿងអន្តរជាតិមួយចំនួន។ តែរឿងរ៉ាវដែលបាន និងកំពុងបន្តដក់ជាប់ក្នុងអារម្មណ៍ពលរដ្ឋអាមេរិកាំងទូទៅមិនអាចបំភ្លេចបាននោះ គឺព្រឹត្តិការណ៍មហាភេរវកម្មថ្ងៃ១១ កញ្ញា ២០០១។ កាលណោះ ភេរវជនអត្តឃាតទំាង ១៩នាក់ដែលបានបើកយន្តហោះទៅទម្លាក់ខ្លួនកម្ទេចក្នុងទីក្រុងវ៉ាស៊ីនតោន និងទៅបុកអាគារពាណិជ្ជកម្មពិភពលោក « World Trade Center » ទាំងពីរក្នុងទីក្រុងញូយ៉ក មាន ១៥នាក់ជាជនជាតិអារ៉ាប៊ីសាអូឌីត។
ដូច្នេះវាជារឿងមួយធម្មតាដែលព្រឹត្តិការណ៍បាញ់ប្រហារបង្កឡើងដោយជនជាតិអារ៉ាប៊ីសាអូឌីតពេលនេះ ជារឿងមួយដ៏រសើបខ្លាំងណាស់នៅក្នុងមជ្ឈដ្ឋាននយោបាយ និងមហាជនអាមេរិកាំងទូទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ