សហរដ្ឋអាមេរិកសម្រេចបញ្ជូនកម្លំាងយោធា ៤៥០ នាក់បន្ថែមទៀតទៅអ៊ីរ៉ាក់
ចុះផ្សាយនៅថ្ងៃ៖
ស្តាប់ - ០៤:១៨
លោកប្រធានាធិបតី បារ៉ាក់ អូបាម៉ា បានសំរេចចិត្តអនុញ្ញាតបញ្ជូនកងទ័ពអាមេរិកចំនួន ៤៥០ នាក់បន្ថែមទៀត ដើម្បីស្រោចស្រង់ស្ថានភាពនៅប្រទេសអ៊ីរ៉ាក់ ក្នុងសង្គ្រាមប្រឆាំងក្រុមជីហាតរបស់អង្គការរដ្ឋអ៊ីស្លាម។ រដ្ឋបាលលោកអូបាម៉ាបានប្រកាសធានាថា ការបន្ថែមកំលាំងថ្មីនេះមិនមែនជាការផ្លាស់ប្តូរយុទ្ធសាស្ត្រយោធាទេ ហើយ កំលាំងយោធាបន្ថែមនេះមិនមែនសំរាប់ធ្វើប្រតិបត្តិការប្រយុទ្ធលើដីទេ។ បេសកកម្មចំបងគឺ ផ្តល់ការហ្វឹកហ្វឺន និងផ្តល់ប្រឹក្សាយោបល់ដល់កងយោធាអ៊ីរ៉ាក់។ សេចក្តីសំរេចចិត្ត របស់លោកប្រធានាធិបតីសហរដ្ឋអាមេរិកនេះគឺ ក្រោយពីទីក្រុងយុទ្ធសាស្ត្រមួយចំនួននៅអ៊ីរ៉ាក់បានធ្លាក់ក្នុងដៃរបស់ពួកជីហាត កាលពីប៉ុន្មានសប្តាហ៍មុននេះ។
បីសប្តាហ៍ក្រោយពីទីក្រុង Ramadi ស្ថិតនៅចំងាយប្រមាណ ១១០ គីឡូម៉ែត្រ ភាគខាងលិចទីក្រុងបាដាដ ធ្លាក់ក្រោមការគ្រប់គ្រងរបស់ពួកជីហាតអង្គការរដ្ឋអ៊ីស្លាម លោកប្រធានាធិបតី បារ៉ាក់ អូបាម៉ា បានសំរេចចិត្តបញ្ជូនកំលាំងយោធាចំនួន ៤៥០ នាក់បន្ថែមទៀត ដើម្បីពង្រឹងស្ថានភាព។ នេះជាសេចក្តីសំរេចចិត្តដ៏ប្រយ័ត្នប្រយែងបំផុតរបស់លោកប្រធានាធិបតីអាមេរិក ដោយគ្មានការផ្លាស់ប្តូរយុទ្ធសាស្រ្តសង្គ្រាមឡើយ។
គិតមកដល់ពេលនេះ ចំនួនយោធាអាមេរិកបានកើនឡើងដល់ ៣ ៥៥០ នាក់ហើយ នៅប្រទេសអ៊ីរ៉ាក់ ដើម្បីពន្លឿនការបណ្តុះបណ្តាលផ្នែកយោធា ដល់ទាហានអ៊ីរ៉ាក់ ជាពិសេសកំលាំងនិកាយស៊ុយនីត។ ក្រៅពីបន្ថែមកំលាំងយោធា លោកប្រធានាធិបតី អូបាម៉ា ក៏បានអនុញ្ញាតបញ្ជូនសំភារៈយោធាមួយចំនួនទៀត ដើម្បីគាំទ្រកងយោធាអ៊ីរ៉ាក់ ក្នុងនោះរួមមានទាហានរបស់ជនជាតិគួដ និងកងកំលាំងកុលសម្ព័ន្ធក្នុងស្រុកផ្សេងៗទៀត។
ផ្តល់ការហ្វឹកហ្វឺន និងប្រឹក្សាយោបល់ផែ្នកយោធា
កំលាំងទាហានបន្ថែមថ្មីនេះនឹងត្រូវបណ្តុះបណ្តាលកងទាហានអ៊ីរ៉ាក់ នៅមូលដ្ឋានយោធា Al-Taqadoum ក្នុងខេត្ត Al-Anbar ក្នុងគោលដៅធ្វើយ៉ាងណាដើម្បីវាយដណ្តើមយកទីក្រុង Ramadi អោយបានមកវិញ ក្នុងពេលឆាប់ៗខាងមុខនេះ។ រហូតមកដល់ពេលនេះ សហរដ្ឋអាមេរិក និងសម្ព័ន្ធមិត្តអន្តរជាតិ ដែលដឹកនាំការវាយប្រហារតាមផ្លូវអាកាសនៅប្រទេសអ៊ីរ៉ាក់ និងស៊ីរី បានបណ្តុះបណ្តាលទាហានអ៊ីរ៉ាក់ចំនួន ៩ ពាន់នាក់។ ទាហានអ៊ីរ៉ាក់ចំនួន ៣ ពាន់នាក់ផេ្សងទៀត កំពុងទទួលការហ្វឹកហ្វឺន មុននឹងត្រូវបានបញ្ជូនទៅកាន់សមរភូមិប្រយុទ្ធប្រឆាំងពួកជីហាតជ្រុលនិយម របស់អង្គការរដ្ឋអ៊ីស្លាម។
បច្ចុប្បន្ននេះ ទាហានអ៊ីរ៉ាក់ ដែលទទួលបានការបណ្តុះបណ្តាល ត្រូវបានដាក់ពង្រាយនៅតាមទីតាំងខែ្សត្រៀម ក្បែរទីក្រុង Samarra ភាគខាងជើងទីក្រុងបាដាដ កៀកគ្នាជាមួយកំលាំងទាហានជនជាតិគួក និងនៅទីក្រុង Al-Karmah ក្នុងខេត្ត Al-Anbar ដែលសំបូរអ្នកកាន់សាសនាអ៊ីស្លាម និកាយស៊ុយនីត។ អស់រយៈពេលជាច្រើនខែមកហើយ រដ្ឋាភិបាលអាមេរិកព្យាយាមបញ្ចុះបញ្ចូលអោយកុលសម្ព័ន្ធនិកាយស៊ុយនីតចូលរួមប្រយុទ្ធ រុញច្រានពួកជីហាតចេញពីទឹកដីអ៊ីរ៉ាក់។
បទពិសោធន៍ដូចឆ្នាំ ២០០៦
សហរដ្ឋអាមេរិកចង់យកគំរូតាមបទពិសោធន៍កាលពីឆ្នាំ ២០០៦ ដែលកាលនោះទាហានកុលសម្ព័ន្ធស៊ុយនីតបានចូលរួមប្រយុទ្ធ ក្នុងសង្គ្រាមប្រឆាំងពួកអាល់កៃដា នៅក្នុងប្រទេសអ៊ីរ៉ាក់។ ក្នុងសន្និសីទកាសែត ក្រោយជំនួបប្រជុំប្រទេសមហាអំណាចទាំង ៧ ក្នុងប្រទេសអាល្លឺម៉ង់ កាលពីសប្តាហ៍មុន លោកប្រធានាធិបតី អូបាម៉ា បានពន្យល់ថា ប្រសិនបើគ្មានការចូលរួមពីកំលាំងប្រយុទ្ធរបស់កុលសម្ព័ន្ធក្នុងស្រុកទេ វាជាការលំបាកណាស់ដែលអាចរក្សាការពារទីតាំង ឬទឹកដីបានយូរអង្វែង។
ដូចនេះ ជាការចាំបាច់ដែលកំលាំងស៊ុយនីតត្រូវតែចូលរួមប្រយុទ្ធជាមួយកំលាំងទាហានអ៊ីរ៉ាក់។ ជុំវិញសំណួរទាក់ទងនឹងការបង្កើនទាហានអាមេរិកបន្ថែមទៀតនាពេលអនាគត ក្នុងប្រទេសអ៊ីរ៉ាក់ លោក Ben Rhodes ទីប្រឹក្សារបស់លោក អូបាម៉ា បានអោយដឹងថា សហរដ្ឋអាមេរិកមិនបានទាត់ចោលគំនិតនេះទេ។ សហរដ្ឋអាមេរិកនឹងពិនិត្យមើលយុទ្ធសាស្រ្តយោធារបស់ខ្លួនជាទៀងទាត់ និងបន្ថែម ឬបន្ថយកំលាំងយោធា អាស្រ័យទៅតាមស្ថានភាពជាក់ស្តែងនៅអ៊ីរ៉ាក់។
តើយុទ្ធសាស្រ្តសង្គ្រាមរបស់លោកអូបាម៉ា មានប្រសិទ្ធិភាពដែរឬទេ?
តាមរយៈក្រសួងការពារជាតិរបស់ខ្លួន សហរដ្ឋអាមេរិកបានបញ្ជាក់ជាថ្មីម្តងទៀតថា ក្នុងសង្គ្រាមប្រឆាំងពួកជីហាតអង្គការរដ្ឋអ៊ីស្លាម អាមេរិកនឹងមិនបញ្ជូនកងកំលាំងប្រយុទ្ធផ្ទាល់ដីឡើយ។ ពោលគឺ កងយោធាអាមេរិក រួមជាមួយសម្ព័ន្ធមិត្តអន្តរជាតិមានតួនាទីផ្តល់ការហ្វឹកហ្វឺនដល់កងយោធាអ៊ីរ៉ាក់ និងដឹកនាំការវាយប្រហារតាមផ្លូវអាកាសតែប៉ុណ្ណោះ។ ចំណែក ប្រតិបត្តិការវាយប្រហារនៅលើដីវិញគឺ ជាភារកិច្ចរបស់កងយោធាអ៊ីរ៉ាក់ទាំងស្រុង។
បរាជ័យទីក្រុង Ramadi ធ្លាក់ក្នុងកណ្តាប់ដៃពួកជីហាត បានបង្កើតអោយមានភាពតានតឹងគ្នា រវាងរដ្ឋាភិបាលសហរដ្ឋអាមេរិក និងអ៊ីរ៉ាក់។ លោក Ashton Carter រដ្ឋមន្រ្តីក្រសួងការពារជាតិអាមេរិកបានបង្ហាញមន្ទិលសង្ស័យ ដោយឥតលាក់លៀមថា តើកំលាំងទាហានអ៊ីរ៉ាក់មានឆន្ទៈចង់ប្រយុទ្ធពិតបា្រកដដែរឬទេ? ក្រោយជំនួបជាមួយលោកនាយករដ្ឋមន្រ្តីអ៊ីរ៉ាក់ Haider al-Abadi កាលពីសប្តាហ៍មុន លោកប្រធានាធិបតី អូបាម៉ា ក៏បានអះអាងថា ជំនួយគាំពាររបស់សហរដ្ឋអាមេរិកដល់ទាហានអ៊ីរ៉ាក់មិនមែនត្រឹមតែសំរាប់ប្រយុទ្ធការពារខ្លួនប៉ុណ្ណោះទេ ប៉ុន្តែ សហរដ្ឋអាមេរិកចង់ឃើញទាហានអ៊ីរ៉ាក់អាចដឹកនាំការវាយប្រហារដោយខ្លួនឯង ដើម្បីកំទេចពួកជីហាត។
សព្វថ្ងៃនេះ យុទ្ធសាស្រ្តសង្គ្រាមប្រឆាំងពួកជីហាត របស់លោកប្រធានាធិបតី អូបាម៉ា កំពុងទទួលរងការរិះគន់ឥតសំចៃ ពីសំណាក់គូប្រជែងមកពីគណបក្សសាធារណរដ្ឋផង និងពីសមាជិកគណបក្សប្រជាធិបតេយ្យគ្នាឯងផង។ អ្នកខ្លះយល់ឃើញថា លោក អូបាម៉ា រួញរា ស្ទាក់ស្ទើរ មិនហ៊ានបញ្ជូនកំលាំងប្រយុទ្ធទៅប្រទេសអ៊ីរ៉ាក់។ យុទ្ធសាស្រ្តបច្ចុប្បន្នហាក់គ្មានបានផ្លែផ្កាបន្តិចសោះ ខណៈពេលដែលសកម្មជនប្រយុទ្ធជីហាតចេះតែរុលទៅមុខ កាន់កាប់បានទីតាំងសំខាន់ៗមួយចំនួន។
ប៉ុន្តែ ទោះបីជាយ៉ាងណាក៏ដោយ តាមរយៈអនុរដ្ឋមន្រ្តីការបរទេស Antony Blinken រដ្ឋាភិបាលរបស់លោក អូបាម៉ាបាននិយាយការពារថា យុទ្ធសាស្ត្ររបស់សម្ព័ន្ធមិត្តអន្តរជាតិបានធ្វើអោយអង្គការរដ្ឋអ៊ីស្លាមបាត់បង់ការគ្រប់គ្រងចំនួន ២៥% ក្នុងប្រទេសអ៊ីរ៉ាក់។ ម៉្យាងទៀត ពួកជីហាតចំនួន ១ ម៉ឺននាក់ត្រូវបានសំលាប់ ក្នុងរយៈពេលមួយឆ្នាំចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ