អាមេរិកពន្លឿនការបញ្ជូនអាវុធឱ្យអ៊ីរ៉ាក់ អង្គការរដ្ឋអ៊ីស្លាមសម្រុកកាន់ខ្លាំងនៅស៊ីរី
ការបញ្ជូនអាវុធទៅឱ្យអ៊ីរ៉ាក់ នឹងត្រូវតែបន្តធ្វើ “ដោយឥតដាច់ និងកាន់តែញាប់” ! នេះជាប្រសាសន៍របស់លោក ចូ បៃដិន អនុប្រធានាធិបតីអាមេរិក ទៅកាន់នាយករដ្ឋមន្ត្រីអ៊ីរ៉ាក់លោក ហៃដឺ អាល់-អាបាឌី នាល្ងាចថ្ងៃសុក្រម្សិលមិញ ខណៈដែលពួកអង្គការរដ្ឋអ៊ីស្លាមកំពុងបើកយុទ្ធនាការវាយលុកខ្លាំងនៅភាគខាងលិចអ៊ីរ៉ាក់ផង និងកំពុងរុលព្រមទាំងដណ្តើមទីតាំងសំខាន់ ក្នុងទឹកដីស៊ីរី។
ចុះផ្សាយនៅថ្ងៃ៖
ស្តាប់ - ០២:០២
ជាអាវុធធុនធ្ងន់ ជាគ្រាប់រំសេវគ្រប់ធុន ឬជាស្បៀងសម្រាប់យោធា ជំនួយយោធាអាមេរិកទាំងនេះ នឹងត្រូវបន្តបញ្ជូនទៅឱ្យអ៊ីរ៉ាក់ ដោយឥតដាច់ ដោយល្បឿនលឿនជាងមុន ក្នុងក្របខ័ណ្ឌប្រយុទ្ធប្រឆាំងនឹងពួកអង្គការរដ្ឋអ៊ីស្លាម។ ជាងនេះទៅទៀត តាមរយៈកិច្ចសន្ទនាតាមទូរស័ព្ទ លោកអនុប្រធានាធិបតីអាមេរិក ចូ បៃដិន បានថ្លែងអំណរគុណនាយករដ្ឋមន្ត្រីអ៊ីរ៉ាក់ ដែលបានដើរតួនាទីជាមេដឹកនាំដ៏រឹងមាំសម្រាប់ស្ថិរភាពនយោបាយអ៊ីរ៉ាក់ និងបានសន្យាគាំទ្ររដ្ឋាភិបាលនេះ ដើម្បីយកឈ្នះឱ្យលើពួកអង្គការរដ្ឋអ៊ីស្លាម។
សេចក្តីសម្រេចចិត្តនេះធ្លាក់មកជួនចំពេល ដែលអង្គការរដ្ឋអ៊ីស្លាមកំពុងវាយសម្រុកខ្លាំងលើមុខព្រួញសមរភូមិពីរ។ កាលពីថ្ងៃសុក្រទី ១៥ឧសភា ពួកអ៊ីស្លាមជ្រុលនិយមនេះបានប្រកាសចូលកាន់កាប់ស្ទើរតែទាំងស្រុងក្រុងរ៉ាម៉ាឌី ក្រុងដ៏សំខាន់មួយនៅភាគកណ្តាលប្រទេស ចម្ងាយប្រមាណតែ១០០គីឡូម៉ែត្រប៉ុណ្ណោះពីរដ្ឋធានីបាកដាត។ ជាបរាជ័យមួយសម្រាប់រដ្ឋាភិបាលអ៊ីរ៉ាក់ ដែលសន្យាបើកប្រតិបត្តិការធំវាយបកវិញ។
ពួកជីហាតរដ្ឋអ៊ីស្លាមក៏កំពុងរុលទៅមុខខ្លាំងដែរនៅស៊ីរី ដោយស្ថិតនៅចម្ងាយប្រមាណតែមួយគីឡូម៉ែត្រពីតំបន់រតនភណ្ឌបូរាណវិទ្យាPalmyre ចំណាស់ជាងពីរពាន់ឆ្នាំដែលជាបានចុះឈ្មោះចូលក្នុងបញ្ជីបេតកភណ្ឌពិភពលោកកាលពីឆ្នាំ១៩៨០។ អង្គការយូណេស្កូមានការព្រួយបារម្ភយ៉ាងខ្លាំង ខ្លាចក្រុងបូរាណស៊ីរីនេះត្រូវហិនហោចដូចករណីប្រាសាទបូរាណនានានៅអ៊ីរ៉ាក់ ព្រោះថា ពួកជ្រុលនិយមរដ្ឋអ៊ីស្លាមមានយុទ្ធសាស្ត្របំផ្លិចបំផ្លាញ បំបាត់ឱ្យខ្ទេចតំណាងវប្បធម៌អរិយធម៌អន្តរជាតិ។ យូណេស្កូនឹងប្រកាសអាសន្នទៅកាន់អង្គការសហប្រជាជាតិ និងបានអំពាវនាវឱ្យសហគមន៍អន្តរជាតិទាំងមូលប្រមូលផ្តុំកម្លាំងគ្នាប្រឆាំងនឹងសោកនាដកម្មនេះ។
បើតាមអង្កការក្រៅរដ្ឋាភិបាលស៊ីរី ការប្រយុទ្ធគ្នាមានសន្ធឹកកាន់តែខ្លាំង នៅថ្ងៃសៅរ៍នេះ រវាងកងកម្លាំងយោធារដ្ឋាភិបាលស៊ីរីរបស់លោកបាស្ហារអាល់អាសាទ និងពួកអង្គការរដ្ឋអ៊ីស្លាមដែលមានមុខព្រួញដណ្តើមយកក្រុងបូរាណ ប៉ាលមៀរ។៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ