កងទ័ពអេហ្ស៊ីព្ទប្រកាសគាំទ្រផែនការលោកមូបារ៉ាក់ធ្វើឲ្យបាតុករផ្ទុះកំហឹង
ចុះផ្សាយនៅថ្ងៃ៖
ស្តាប់ - ០៦:០៣
នៅថ្ងៃសុក្រ ១១ កុម្ភៈ ២០១១នេះ កងទ័ពអេហ្ស៊ីព្ទបានចេញសេចក្តីប្រកាសព័ត៌មានមួយ សន្យាថា កងទ័ពនឹងធានាឲ្យមានកំណែទម្រង់ប្រជាធិបតេយ្យ ហើយអំពាវនាវឲ្យក្រុមប្រឆាំងបញ្ឈប់ការធ្វើបាតុកម្ម។ សេចក្តីប្រកាសនេះត្រូវបានធ្វើឡើងមួយថ្ងៃ ក្រោយពីលោកមូបារ៉ាក់ប្រកាសផ្ទេរអំណាចឲ្យអនុប្រធានាធិបតី ក៏ប៉ុន្តែ បដិសេធមិនចុះចេញពីតំណែង។ ពួកបាតុករប្រឆាំងរាប់ម៉ឺននាក់ នៅតែបន្តប្រមូលផ្តុំគ្នាទាមទារឲ្យលោកមូបារ៉ាក់ចុះចេញពីតំណែង។
កាលពីថ្ងៃព្រហស្បតិ៍ ម្សិលមិញ កងទ័ពអេហ្ស៊ីព្ទបានចេញសេចក្តីប្រកាសព័ត៌មានទី១ ដោយបញ្ជាក់ថា កងទ័ពនឹងចាត់វិធានការ ដើម្បីឆ្លើយតបនឹងការទាមទាររបស់ចលនាប្រឆាំង។ ការប្រកាសបែបនេះបានធ្វើឲ្យក្រុមបាតុករប្រឆាំងយល់ថា កងទ័ពកំពុងរៀបចំធ្វើរដ្ឋប្រហារទម្លាក់លោកមូបារ៉ាក់។
នាយករដ្ឋមន្រ្តីអេហ្ស៊ីព្ទក៏បានបង្ហើបឲ្យដឹងផងដែរថា លោកមូបារ៉ាក់អាចនឹងចុះចេញពីតំណែង។ ទីភ្នាក់ងារស៊ើបការសម្ងាត់របស់អាមេរិក (CIA) ក៏បានបញ្ចេញព័ត៌មានដូចគ្នានេះដែរ។ ក្រុមប្រឆាំងជាច្រើនក៏បាននាំគ្នាមកប្រមូលផ្តុំគ្នានៅ “ទីលានសេរីភាព” ដើម្បីចាំស្តាប់សេចក្តីថ្លែងការណ៍របស់លោកមូបារ៉ាក់ ដោយរំពឹងថា លោកមូបារ៉ាក់នឹងប្រកាសលាឈប់។
ក៏ប៉ុន្តែ នៅក្នុងសេចក្តីថ្លែងការណ៍តាមទូរទស្សន៍ នៅយប់ថ្ងៃព្រហស្បតិ៍ លោកមូបារ៉ាក់បានប្រកាសថា លោកនឹងមិនចុះចេញពីតំណែងនោះទេ។ លោកគ្រាន់តែសម្រេចផ្ទេរអំណាចខ្លះទៅឲ្យលោកស៊ូលេម៉ាន់ ដែលជាអនុប្រធានាធិបតី។
ការប្រកាសនេះបានធ្វើឲ្យបាតុករប្រឆាំងផ្ទុះកំហឹងកាន់តែខ្លាំង ហើយបានប្រកាសថា នឹងធ្វើបាតុកម្មប្រឆាំងឲ្យកាន់តែធំឡើងថែមទៀត នៅថ្ងៃសុក្រនេះ ក្រោយពីការសូត្រធម៌ពេលព្រឹកចប់។
នៅព្រឹកថ្ងៃសុក្រ នៅពេលដែលបាតុករប្រឆាំងរាប់ម៉ឺននាក់ កំពុងសូត្រធម៌ នៅទីលានសេរីភាព កងទ័ពបានចេញសេចក្តីប្រកាសលើកទី២ អំពាវនាវឲ្យពួកបាតុករបញ្ឈប់បាតុកម្ម ហើយត្រឡប់ទៅផ្ទះសម្បែងវិញ ដោយកងទ័ពចេញមុខធានាថា នឹងរៀបចំធ្វើកំណែទម្រង់ ឆ្ពោះទៅធ្វើការបោះឆ្នោតដោយសេរី និងយុត្តិធម៌។ ការប្រកាសនេះបានធ្វើឲ្យបាតុករប្រឆាំងផ្ទុះកំហឹងកាន់តែខ្លាំងឡើងថែមទៀត ព្រោះគេយល់ថា កងទ័ពកំពុងតែគាំទ្រឲ្យលោកមូបារ៉ាក់បន្តកាន់តំណែងតទៅទៀត។
ពួកបាតុករប្រឆាំងគ្រោងចាកចេញពីទីលានសេរីភាព ហើយចូលកាន់កាប់វិមានប្រធានាធិបតី នៅថ្ងៃសុក្រនេះ។ ជាមួយនឹងកំហឹង ដែលកំពុងតែពុះកញ្ជ្រោលដល់កំពូល ពួកបាតុករអាចនឹងត្រូវប៉ះទង្គិចជាមួយទាហាន ដែលត្រូវបានគេដាក់ពង្រាយការពារវិមានប្រធានាធិបតី។
កន្លងមក កងទ័ពធ្លាប់បានសន្យាថា នឹងមិនប្រើកម្លាំងទៅលើបាតុករ។ ក៏ប៉ុន្តែ ប្រសិនបើបាតុករចាប់ផ្តើមងាកមកប្រឆាំងនឹងកងទ័ព ហើយធ្វើឲ្យអំណាចរបស់កងទ័ពត្រូវរង្គោះរង្គើ តើកងទ័ពអេហ្ស៊ីព្ទនឹងនៅតែនៅស្ងៀមមិនប្រើកម្លាំងរហូតដល់ត្រឹមណា? នៅពេលនេះ បដិវត្តន៍អេហ្ស៊ីព្ទកំពុងតែឈានចូលដល់ដំណាក់កាលមួយដ៏គ្រោះថ្នាក់បំផុត គឺការប្រឈមមុខដាក់គ្នារវាងចលនាប្រឆាំង និងកងទ័ព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ