មហោស្រពភាពយន្តអាស៊ីអន្តរជាតិលើកទី ១៧
ប្រទេសកម្ពុជា និងកូរ៉េខាងត្បូង ជាភ្ញៀវកិត្តិយសនៃមហោស្រពភាពយន្តអាស៊ីអន្តរជាតិលើកទី១៧ ដែលកំពុងប្រព្រឹត្តទៅនៅក្រុង វឺហ្សូល ភាគខាងកើតប្រទេសបារាំង។ មហោស្រពភាពយន្តអាស៊ីអន្តរជាតិ ជាមហោស្រពភាពយន្តអឺរ៉ុបដ៏ចំណាស់មួយ និងដែលឧទ្ទិសដល់គ្រប់ខ្សែភាពយន្តមកពីតំបន់ដើមបូព៌ា និងមកពីទ្វីបអាស៊ីទាំងមូល។ នៅឆ្នាំ២០១០ មហោស្រពនេះ ជាទីណាត់របស់ផលិតករភាពយន្តអាស៊ីនៅក្នុងទ្វីបអឺរ៉ុប ដោយបានទាក់ទាញភ្ញៀវមកទស្សនាភាពយន្តបានប្រមាណជាង ២៦០០០នាក់។
ចុះផ្សាយនៅថ្ងៃ៖
សេចក្តីរាយការណ៍របស់ អៀង សុខម៉ិញ ពី Vesoul
ចាប់កំណើតនៅឆ្នាំ១៩៩៥ មហោស្រពភាពយន្តអាស៊ីអន្តរជាតិ FICA លើកទី១៧នេះ ប្រព្រឹត្តទៅ ពី ថ្ងៃទី ៨ ដល់ ១៥ កុម្ភៈ ២០១១ នៅក្រុងវឺហ្សូល ដោយមានបញ្ចាំងជូនទស្សនិកជនទស្សនានូវខ្សែភាពយន្តចំនួន៩០ ដែលសុទ្ធសឹងជាភាពយន្តកម្រៗ និងភាពយន្តថ្មីប្លែកៗ។ ខ្សែភាពយន្តកម្រប្លែក ដែលឆ្លើយតបទាំងស្រុងទៅនឹងកម្មវត្ថុពិតរបស់មហោស្រពភាពយន្តក្នុងបុព្វហេតុស្រាវជ្រាវ និងការពារបេតិកភណ្ឌក្នុងវិស័យភាពយន្ត។
ភាពយន្តដែលត្រូវយកមកចាក់បញ្ចាំងក្នុងឱកាសមហោស្រពលើកទី១៧នេះមាន៦ផ្នែក៖
- មុខមាត់នៃភាពយន្តអាស៊ីសម័យទំនើប
o ភាពយន្តខ្នាតវែង
o ភាពយន្តឯកសារ
-ភាពយន្តដែលមានប្រធានបទ ៖ គ្រួសារអាស៊ី
-ភាពយន្តកូរ៉េ ចន្លោះឆ្នាំ ១៩៤៥ ដល់២០០០
-ភាពយន្តនៃបណ្តាប្រទេសនិយាយភាសាបារាំងនៅអាស៊ី
-ភាពយន្តគំនូរជីវចលជប៉ុន
-ភាពយន្តសម្រាប់ទស្សនិកជនវ័យក្មេង
ក្នុងចំណោមខ្សែភាពយន្តទាំង ៩០នោះ មាន២៣ ជាភាពយន្តខ្នាតវែង ជាភាពយន្តឯកសារសមិទ្ធិករជនជាតិខ្មែរ និងបារាំង ស្តីពីប្រទេសកម្ពុជា ពីជនជាតិខ្មែរ ។ល។ និង ។ល។
នៅក្នុងឱកាសមហោស្រពនេះ លោក ឬទ្ធី ប៉ាន់ សមិទ្ធិករភាពយន្តខ្មែរ បានទទួលពានរង្វាន់ ស៊ីក្លូមាសកិត្តិយស សម្រាប់ស្នាដៃផលិតភាពយន្តរបស់លោកទាំងអស់ ជាមួយនឹងសមិទ្ធិករកូរ៉េ លោក លី ម្យ៉ុងសេ។
នៅថ្ងៃសៅរ៍ទី១២កុម្ភៈនេះ ជាថ្ងៃកិត្តិយសរបស់កម្ពុជា។ កម្មវិធីពិសេស “ទិវាភាពយន្តខ្មែរ និងកូរ៉េខាងត្បូង" កម្មវិធីតុមូល ជួបជុំពិភាក្សាជាមួយអ្នកឯកទេសភាពយន្ត អ្នកសម្តែងខ្មែរ សមិទ្ធិករ និងកម្មវិធីវប្បធម៌ ត្រូវបានរៀបចំឡើង ដើម្បីឧទ្ទិសដល់ភាពយន្តខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ