រដ្ឋមន្ត្រីការទូតអាមេរិក និងរុស្ស៊ី និយាយគ្នាថាដល់ពេលដែលត្រូវរកវិធីចរចា ជាមួយកូរ៉េខាងជើង
ចុះផ្សាយនៅថ្ងៃ៖
ស្តាប់ - ០៦:១៧
សំណុំរឿងកូរ៉េខាងជើង កំពុងតែដើរដល់ដំណាក់កាលថ្មីមួយទៀត គួរឲ្យមានសុទិដ្ឋិនិយម ដោយគេសង្កេតឃើញថា ភាគីទាំងអស់ ហាក់បានបន្ទន់ឥរិយាបថ ឈប់កំញើញគ្នាទៅវិញទៅមក។ បើតាមការឲ្យដឹង ពីសំណាក់ ក្រសួងការបរទេសរុស្ស៊ី បានឲ្យដឹងថា លោករដ្ឋមន្ត្រីការបរទេសសហរដ្ឋអាមេរិក និងលោករដ្ឋមន្រ្តីការបរទេសរុស្ស៊ី បាននិយាយគ្នាតាមទូរស័ព្ទ កាលពីថ្ងៃអង្គារ ទី២៦ ធ្នូ។ រដ្ឋមន្ត្រីទាំងពីរ បានប្រកាសគោលជំហររួមគ្នាថា ពេលនេះជាពេលសមស្របហើយ ដើម្បីបើកផ្លូវចរចា ជាមួយនិងកូរ៉េខាងជើង។
ឈប់គំរាម នាំគ្នាចរចាម្តង
បន្ទាប់ពីបានឡើងកំដៅ ហៀបនឹងឆេះក្លាយជាភ្លើងសង្រ្គាម វិបត្តិកូរ៉េខាងជើង កំពុងតែខិតទៅរកសញ្ញាណវិជ្ជមាន គួរឲ្យត្រេកអរ។ កាលពីប៉ុន្មានសប្តាហ៍មុននេះ រដ្ឋាភិបាលអាមេរិក បានប្រកាសផ្លាស់ប្តូរគោលជំហរ ដោយថាខ្លួនសុខចិត្តចរចា ជាមួយនឹងកូរ៉េខាងជើង។ ពោលគឺផ្ទុយពីគោលជំហរ ដែលលោកដូណាល់ ត្រាំ ធ្លាប់បានប្រកាស ថាចរចាជាមួយកូរ៉េខាងជើង នាំតែខាតពេល ហើយគាត់សន្យាថា នឹងកំទេចកូរ៉េខាងជើង ឲ្យក្លាយជាផេះតែម្តង។
ឥឡូវពេលនេះ យើងឃើញថា រដ្ឋាភិបាលអាមេរិក បានប្តូរចិត្ត ហើយដើរស្របជាមួយនឹងគោលជំហររបស់រុស្ស៊ី។ រដ្ឋមន្ត្រីការបរទេសប្រទេសទាំង២ បាននិយាយគ្នាតាមទូរស័ព្ទ កាលពីថ្ងៃអង្គារ ទី២៦ធ្នូ ស្តីពីបញ្ហានេះ។ ក្រសួងការបរទេសរុស្ស៊ី បានចេញលិខិតមួយនៅព្រឹកថ្ងៃពុធនេះ ដោយបានលើកឡើង ថា ភាគីអាមេរិក និងរុស្ស៊ី សូមប្រកាសរួមគ្នា ថ្កោលទោសទៅលើកម្មវិធីនុយក្លេអ៊ែរ និងបាលីស្ទីក របស់កូរ៉េខាងជើង។ ក៏ប៉ុន្តែភាគីទាំងពីរ បានយល់ឃើញដូចគ្នាថា វាដល់ពេលហើយ ដែលត្រូវតែ ផ្លាស់ប្តូរពាក្យសំដី ឈប់និយាយគំរាមតទៅទៀត ហើយងាកមកបើកយន្តការជាក់ស្តែងមួយ ដើម្បីចរចា ជាមួយកូរ៉េខាងជើង ឲ្យបានឆាប់ជាទីបំផុត។
បន្ថែមពីនេះ លោក Sergueï Lavrov រដ្ឋមន្ត្រីការបរទេសរុស្ស៊ីបានលើកឡើងថា ការដែលសហរដ្ឋអាមេរិក ប្រកាន់ជំហរតឹងតែង ហាឡើងគិតតែពីគំរាមកំទេច លើកទ័ពលើកអាវុធ មកកំញើញកូរ៉េខាងជើងនោះ គឺវាជារឿងមិនល្អទេ។ ច្រកចេញមានតែមួយគត់ គឺត្រូវតែចរចា។
បន្ថែមទណ្ឌកម្មសេដកិច្ចដើម្បីផ្កាប់ឆ្នាំងបាយកូរ៉េខាងជើង
ទណ្ឌកម្ម អាចហុចផលល្អ ជំរុញឲ្យភាគីកូរ៉េខាងជើងគ្មានជំរើស ត្រូវតែចូលខ្លួនចរចា ល្គិកណា ទណ្ឌកម្មនោះ វាយចំគោលដៅ ហើយមានប្រសិទ្ធិភាព។ទណ្ឌកម្មថ្មី ដែលសហរដ្ឋអាមេរិក បានដាក់ កាលពីថ្ងៃអង្គារម្សិលមិញនេះ គឺជាការអនុវត្តតាមទណ្ឌកម្មសេដ្ឋកិច្ច ដែលអង្គការសហប្រជាជាតិ បានសម្រេច កាលពីថ្ងៃសុក្រ សប្តាហ៍មុននេះ។
ទណ្ឌកម្មនេះ មានខ្លឹមសារជារួម គឺសំដៅ វាយប្រហារ ទៅលើប្រភពចំណូល ប្រភពហិរញ្ញវត្ថុ របស់កូរ៉េខាងជើង ព្រមទាំងទំនិញសម្ភារៈ ដែលប្រទេសនេះត្រូវការ យកទៅបំរើដល់កម្មវិធីនុយក្លេអ៊ែរ ដូចជាការនាំចូលប្រេងឥន្ធនៈជាដើម។
ប្រភពចំណូល គឺជំនួញរកស៊ី ដែលក្រុមហ៊ុនកូរ៉េខាងជើង មានជាមួយក្រុមហ៊ុនបរទេសមួយចំនួន។ ប្រភពមួយផ្នែកទៀត គឺបុគ្គលិកកម្មករកូរ៉េខាងជើង ដែលត្រូវរដ្ឋាភិបាលប្រទេសនេះ បញ្ជូនឲ្យទៅធ្វើការនៅប្រទេសក្រៅ ដើម្បីប្រមូលលុយយកមកឲ្យរដ្ឋាភិបាល។ ប្រភពចំណូលទាំងអស់នេះ គឺឆ្លងកាត់ធនាគារ ដែលមានបុគ្គលិក ឬអ្នកទទួលខុសត្រូវធនាគារ ជាជនជាតិកូរ៉េខាងជើង។ ដូច្នេះហើយបានជាគេ បានដាក់ទណ្ឌកម្មទៅលើមនុស្ស១៥នាក់ ដែលភាគច្រើន សុទ្ធតែធ្វើការ ក្នុងវិស័យធនាគារ។ អ្នកទាំង១៥នាក់នេះ ត្រូវគេបង្កកទ្រព្យសម្បត្តិ បិទខ្ទប់គណនីធនាគា ព្រមទាំងហាមមិនឲ្យមានវីហ្សាធ្វើដំណើរទៅណាទាំងអស់។
បើតាមប្រសាសន៍ របស់អ្នកនាំពាក្យក្រសួងហិរញ្ញវត្ថុអាមេរិក បានឲ្យដឹងថា ទណ្ឌកម្មបន្ថែមរបស់អាមេរិកនេះ គឺសំដៅលើមនុស្សពីរនាក់ ម្នាក់ឈ្មោះ Kim Jong Sik ម្នាក់ទៀត ឈ្មោះ Ri Pyong Chol ដែលអ្នកទាំងពីរនេះ សុទ្ធតែមានតួនាទីធំ ក្នុងការប្រមែរប្រមូលថវិកា យកទៅចំនាយលើកម្មវិធីផលិតអាវុធបាលីស្ទីក និងនុយក្លេអ៊ែរ។ ហើយមនុស្សទាំង២នាក់នេះ សុទ្ធតែមានឈ្មោះ ក្នុងចំណោមមនុស្សទាំង១៥នាក់ ដែលអង្គការសហប្រជាជាតិ បានសម្រេចដាក់ទណ្ឌកម្មដែរ។
ជាធម្មតាទេ កាលណាយើងចង់ឲ្យភាគីណាមួយ ងាកមករកយើង ជំរើសមានពីរ ទីមួយយកចិត្តគេ ទីពីរធ្វើឲ្យគេគ្មានជំរើស ឬក៏អាចប្រើជំរើសទាំងពីរព្រមគ្នាក៏ថាបាន។ ជាក់ស្តែងពេលនេះ អង្គការសហប្រជាជាតិ ក៏ដូចជាសហរដ្ឋអាមេរិក បានដាក់ទណ្ឌកម្ម សំដៅផ្កាប់ឆ្នាំងបាយ និងបិទទុយយោប្រេងឥទ្ធនៈទៅកូរ៉េខាងជើង តែទន្ទឹងនឹងនេះ គេបានបង្ហាញគោលជំហរ ត្រៀមខ្លួនបើកផ្លូវចរចា។
គ្មានជំរើសផ្សេង ទាំងអស់គ្នា
មកដល់ដំណាក់កាលនេះ បើយើងសង្កេតមើលទៅ ភាគីទាំងសងខាង ទាំងសហដ្ឋអាមេរិក ទាំងកូរ៉េខាងជើង សុទ្ធតែដឹងខ្លួនថាគ្មានជំរើសផ្សេង ក្រៅពីការចរចាទេ។ និយាយម្យ៉ាងទៀត ថា លោកដូណាល់ ត្រាំ ដែលធ្លាប់តែគំរាមកំទេចកូរ៉េខាងជើង ហាក់ដឹងខ្លួនថា មិនអាចធ្វើទៅបានទេ។ លោកត្រាំខ្លួនឯង បានចាត់ទុក គីម ជុងអ៊ុន ថាជាក្មេងឆ្គួតលីលា នឹងល្បែងនុយក្លេអ៊ែរ។ ដូច្នេះ ក្នុងន័យនេះ គឺមានន័យស្រាប់ទៅហើយថា លោកដូណាល់ ត្រាំ ត្រូវតែប្រយ័ត្ន មិនត្រូវសាកល្បង ជាមួយ គីម ជុងអ៊ុនទេ ព្រោះគីមជុងអ៊ុន ជាក្មេងឆ្គួតលីលា។
ដូច្នេះជំរើសសម្រាប់សហរដ្ឋអាមេរិក គឺត្រូវតែចរចា។ ចរចា មានន័យថា សហរដ្ឋអាមេរិក ត្រូវតែបង្ខំចិត្ត ទទួលស្គាល់ ថាកូរ៉េខាងជើង ជាមហាអំណាចនុយក្លេអ៊ែរ។ កន្លែងនេះហើយ ដែលគីម ជុងអ៊ុនចង់បាន គឺចង់ឲ្យគេទទួលស្គាល់ ថាខ្លួនឯងខ្លាំង។ បើគេទទួលស្គាល់ថាខ្លួនខ្លាំង អញ្ចឹង គេនឹងឈប់គំរាមកំញើញតទៅទៀត។
តាមពិតទៅ ការទទួលស្គាល់ថា កូរ៉េខាងជើង ជាមហាអំណាចនុយក្លេអ៊ែរ វាគឺជារឿងមួយពិបាកធ្វើណាស់ សម្រាប់មេដឹកនាំអាមេរិកមួយចំនួន ក៏ប៉ុន្តែសួរថា តើអាមេរិកអាចទៅហាមឃាត់ ទៅទប់ស្កាត់ ប្រទេសមួយ បានទេ? មិនអាចទេ ! ដូច្នេះ វាគ្មានជំរើសអ្វី ដែលត្រូវទទួលស្គាល់ការពិត ហើយរកវិធី បញ្ជៀសការប្រឈមមុខដាក់គ្នា វាប្រសើរជាជាង។ ការចរចា ស្តីពីការគ្រប់គ្រងកម្មវិធិនុយក្លេអ៊ែរស៊ីវីល និងលប់ចោលការផលិតអាវុធបរមាណូ បន្តិចម្តងៗ គឺជាជំរើស ដែលគ្រប់គ្នាទទួលស្គាល់ថា ត្រូវតែធ្វើ។ ហើយបើមើលស្ថានភាពពេលនេះ កូរ៉េខាងជើង ហាក់មិនប្រឆាំងនិងការចរចាទេ។
យ៉ាងណាមិញ របាយការណ៍របស់រដ្ឋមន្ត្រីក្រសួងបង្រួបបង្រួមជាតិកូរ៉េខាងត្បូង បានសរសេរ កាលពីថ្ងៃអង្គារម្សិលមិញនេះថា កូរ៉េខាងត្បូងកំពុងមានក្តីសង្ឃឹមជាខ្លាំង ថា កូរ៉េខាងជើង ប្រាកដជាបើកផ្លូវ យល់ព្រមចរចាជាមួយសហរដ្ឋអាមេរិក ស្តីពីការគ្រប់គ្រងកម្មវិធីនុយក្លេអ៊ែរ ក្នុងពេលខាងមុខនេះ។ ហើយកូរ៉េខាងត្បូងក៏នៅតែមានសង្ឃឹមថា កូរ៉េខាងជើង ប្រាកដជាបោះដៃ មកចាប់ដៃកូរ៉េខាងត្បូង ក្នុងពេលខាងមុខ។ យើងឃើញថា សុទិដ្ឋិនិយម និងក្តីសង្ឃឹម នៅតែមានពន្លឺ ដ៏រាបណា ភាគីទាំងអស់ យល់ពីតំរូវការរៀងខ្លួន ហើយព្រមធ្វើសម្បទានម្នាក់បន្តិច ដើម្បីនិយាយគ្នា ដោយសន្តិវិធី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ