តុលាការកូរ៉េខាងត្បូង បើកសវនាការករណីស្ត្រីភៀសខ្លួនកូរ៉េខាងជើង១២នាក់
ករណីស្ត្រីជនជាតិកូរ៉េខាងជើង១២ នាក់ ដែលជាបុគ្គលិកក្នុងភោជនីយដ្ឋានកូរ៉េខាងជើងមួយ នៅក្នុងប្រទេសចិនបានធ្វើដំណើរមកដល់កូរ៉េខាងត្បូង កាលពីខែមេសាកន្លងទៅនេះ បានធ្វើឲ្យសារព័ត៌មានជាតិកូរ៉េខាងត្បូង និងអន្តរជាតិ បានចុះផ្សាយយ៉ាងគគ្រិកគគ្រេង។ កូរ៉េខាងជើង បានធ្វើការចោទប្រកាន់ថា ក្រុមនគរបាលសម្ងាត់កូរ៉េខាងត្បូង បានចាប់ពង្រត់ស្ត្រីកូរ៉េខាងជើងទាំងនោះ។ នៅថ្ងៃអង្គារទី២១ មិថុនានេះ តុលាការកូរ៉េខាងត្បូង ក្រុងសេអ៊ូល បានបើកសវនាការ ដើម្បីពិនិត្យមើល លើបទចោទប្រកាន់ ដែលសមាគមមេធាវីការពារសិទ្ធិមនុស្សមួយក្រុម បានចោទប្រកាន់ទៅលើក្រុមនគរបាលសម្ងាត់កូរ៉េខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:២៤
រត់ម្តង១៣នាក់៖
កាលពីថ្ងៃទី១៣មេសា អាជ្ញាធរកូរ៉េខាងត្បូងបានប្រកាសថា មានស្ត្រីជនជាតិកូរ៉េខាងជើង១២នាក់ និងបុរសម្នាក់ បានធ្វើដំណើរទៅដល់ក្រុងសេអ៊ូល។ អ្នកទាំង១៣នាក់ បានប្រាប់អាជ្ញាធរកូរ៉េខាងត្បូងថា ពួកខ្លួន បានរត់គេចចេញពីភោជនីយដ្ឋានកូរ៉េខាងជើងមួយកន្លែង ដែលមានទីតាំងនៅប្រទេសចិន ហើយបានធ្វើដំណើរទៅដល់ប្រទេសថៃ មុននឹងបានមកដល់កូរ៉េខាងត្បូង។ គេមិនដឹងថាភោជនីយដ្ឋានកូរ៉េខាងជើងនោះ ឈ្មោះអី នៅត្រង់ណាឲ្យប្រាកដទេ តែបើតាមការស្មាន គឺប្រហែលជានៅក្រុងកំពង់ផែ Ningbo ក្នុងខេត្ត Zhejiang របស់ចិន ក្បែរក្រុងសៀងហៃ។
បើយោងតាមការបញ្ជាក់របស់អាជ្ញាធរកូរ៉េខាងត្បូង ជនភៀសខ្លួនកូរ៉េខាងជើងទាំង១៣នាក់នេះ បានចាកចេញពីប្រទេសចិន កាលពីថ្ងៃទី ៧មេសា ហើយបានមកដល់ក្រុងសេអ៊ូល នៅថ្ងៃទី៨មេសា ដើម្បីសុំសិទ្ធិជ្រកកោន។
ការសែតក្នុងស្រុក ក៏ដូចជាសារព័ត៌មានអន្តរជាតិនានា បានចុះផ្សាយដំណឹងនេះ ឡើងសុះសាយ រហូតខាងកូរ៉េខាងជើងចេញលិខិតមួយថ្កោលទោស កូរ៉េខាងត្បូងថា បានប្រើប្រាស់នគរបាលសម្ងាត់របស់ខ្លួន ទៅចាប់ពង្រត់មនុស្សទាំង១៣នាក់នេះ ពីប្រទេសចិន។ ក្នុងលិខិតថ្កោលទោសរបស់ព្យុងយ៉ាង ក៏មានសរសេរបន្ទោសដោយប្រយោលថា រដ្ឋអំណាចចិន បានចូលដៃចូលជើងជាមួយកូរ៉េខាងត្បូង ដើម្បីពង្រត់ជនជាតិកូរ៉េខាងជើងទាំង១៣នាក់នេះ។ តែយ៉ាងណាក៏ដោយ ខាងក្រសួងការបរទេសចិន បានឆ្លើយតបថា មនុស្សទាំង១៣នាក់នេះ មានក្រដាសស្នាម ត្រឹមត្រូវតាមច្បាប់។ ដូចេ្នះ ពួកគេមានសិទ្ធិធ្វើដំណើរជាធម្មតា គ្មាននរណាអាចហាមឃាត់បានឡើយ។
តែបើយើងគិតទៅ គឺវាច្បាស់ណាស់ ថាពួកគេប្រាកដជាមិនមានលទ្ធភាពជិះយន្តហោះពីចិន មកដល់ថៃ រួចពីថៃទៅសេអ៊ូលបានទេ បើសិនជាគ្មានការជួយអន្តរាគមន៍ពីអាជ្ញាធរកូរ៉េខាងត្បូង។ ហើយមួយវិញទៀត គេមិនជឿថា កូរ៉េខាងជើងទៅល្ងង់ឲ្យមនុស្សទាំង១៣នាក់នេះ កាន់លិខិតឆ្លងដែនដែរ។ ដូច្នេះមានន័យថា អាចអាជ្ញាធរកូរ៉េខាងត្បូង ដែលជាអ្នករត់ការ ធ្វើលិខិតឆ្លងដែន ដើម្បីឲ្យមនុស្សទាំង១៣នាក់នេះ អាចធ្វើដំណើរបាន៕
កូរ៉េខាងជើងចោទថា កូរ៉េខាងត្បូងចាប់ពង្រត់៖
ករណីនេះ បានក្លាយជាបណ្តឹងទៅដល់តុលាការ ដោយសារកូរ៉េខាងជើង បានទាមទារឲ្យបញ្ជូនមនុស្សទាំង១៣នាក់នេះ ប្រគល់ទៅឲ្យកូរ៉េខាងជើងវិញជាបន្ទាន់។ តែអាជ្ញាធរកូរ៉េខាងត្បូងបានធ្វើមិនដឹងមិនឮ។ ក្រោយមកកូរ៉េខាងជើងបានទាំងថតផ្សាយវីដេអូ បង្ហាញពីក្រុមគ្រួសាររបស់ស្ត្រីទាំង១២នាក់នេះ ដែលទទូចចង់មកជួបនៅកូរ៉េខាងត្បូង។ តែកូរ៉េខាងត្បូងបដិសេធទៀត ដោយអះអាងថា កន្លែងស្នាក់នៅរបស់ស្ត្រីភៀសខ្លួនទាំងនោះ ត្រូវទុកជាការសម្ងាត់ ខ្លាចក្រែងមានគេញសម្ងាត់របស់កូរ៉េខាងជើង មកលបសម្លាប់។
បន្ទាប់មកទៀត កូរ៉េខាងជើងបាន ស្នើរឲ្យអង្គការមួយដែលមានមូលដ្ឋាននៅកូរ៉េខាងត្បូង ឈ្មោះសមាគមមេធាវី ដើម្បីសង្គមប្រជាធិបតេយ្យ ឲ្យធ្វើជាតំណាងក្រុមគ្រួសារស្ត្រីកូរ៉េខាងជើងទាំង១២នាក់ ដើម្បីដាក់ពាក្យប្តឹងទៅតុលាការ។ បណ្តឹងនេះ គឺប្តឹងដោយផ្ទាល់ទៅនគរបាលសម្ងាត់ជាតិកូរ៉េខាងត្បូង ពីបទចាប់ពង្រត់ជនជាតិកូរ៉េខាងជើង។
ក្រុមមេធាវី ដែលជាដើមបណ្តឹង បានទាមទារឲ្យស្ត្រីទាំង១២នាក់ ចូលមកបំភ្លឺនៅចំពោះមុខតុលាការ ក៏ប៉ុន្តែ មុនបើកសវនាការនេះ រដ្ឋាភិបាលកូរ៉េខាងត្បូងបានប្រកាសថា ស្រ្តីទាំង១២នាក់ ត្រូវស្ថិតក្នុងការការពាររបស់នគរបាលសម្ងាត់ ហើយក្នុងកាលៈទេសៈនេះ ពួកគេកំពុងសំងំលាក់ខ្លួន ដើម្បីធានាសុវត្ថិភាព មុននឹងចាប់ផ្តើមទួលអនុវត្តនីតិវិធីធ្វើសមាហរណកម្ម ដើម្បីរស់ក្នុងសង្គមកូរ៉េខាងត្បូង។ ត្រង់ចំណុចនេះហើយ ដែលខាងដើមបណ្តឹងគេចោទថា កូរ៉េខាងត្បូង បានចាប់ពង្រត់ជនជាតិកូរ៉េខាងជើងពីចិន រួចចាប់ឃុំខ្លួនទុកទៀត តែខាងកូរ៉េខាងត្បូង គេបដិសេធវិញថា គេមិនឃុំទេ តែជាការការពារសន្តិសុខ។
តាមធម្មតា ក្នុងករណីដែលមានជនភៀសខ្លួនរត់ពីកូរ៉េខាងជើងមកម្តងៗ គឺអាជ្ញាធរកូរ៉េខាងត្បូង មាននីតិវិធីតាមដានយ៉ាងម៉ដ្ឋចត់ ដូចជាការសាកសួរចម្លើយ ដើម្បីចៀសវាងក្រែងថាជននោះ ជាគេញសម្ងាត់ ដែលរបបព្យុងយ៉ាងបញ្ជូនមក។ បន្ទាប់មកទៀត ពេលដែលរកឃើញថាអ្នករត់មក គឺជាជនភៀសខ្លួនពិតប្រាកដហើយ កូរ៉េខាងត្បូងនឹងផ្តល់កន្លែងស្នាក់នៅ នឹងមានការជួយទំនុកបំរុង បង្ហាញពីរបៀបរស់នៅ ក្នុងសង្គមទំនើប ព្រោះថាសម្រាប់ប្រជាជនដែលរត់ចេញពីកូរ៉េខាងជើង គឺថាសូម្បីតែទូរស័ព្ទដៃ ក៏មិនធ្លាប់ស្គាល់ផងទេ។
មិនមែនតែអ្នកក្រលំបាកទេដែលរត់ អ្នកស្ថិតក្នុងឋានៈសមរម្យក៏រត់ដែរ៖
មានករណីរត់គេចរបស់ប្រជាជនកូរ៉េខាងជើងជារឿយៗ។ គ្រាន់តែកន្លងមក គឺជាប្រជាជនដែលក្រីក្រតោកយ៉ាកបំផុត ដែលរស់នៅក្បែរព្រំដែន ដែលហ៊ានប្រថុយរត់។ ករណីបុគ្គលិកភោជនីយដ្ឋានរត់បែបនេះកម្រណាស់ ព្រោះថាបុគ្គលិកភោជនីយដ្ឋាន ដែលកូរ៉េខាងជើងបញ្ជូនឲ្យទៅធ្វើការនៅក្រៅប្រទេស គឺជាទូទៅ សុទ្ធតែមកពីក្រុមគ្រួសារកម្មាភិបាល ដែលស្មោះស្ម័គ្រជាមួយរបបព្យុងយ៉ាងណាស់ ហើយកត្តាជីវភាពទៀតសោត ក៏មិនមែនក្រតោកយ៉ាកលំបាក ដូចប្រជាជនធម្មតាទូទៅទេ។ អ្នកដែលត្រូវបក្សកុម្មុយនីស្តិ បញ្ជូនទៅឲ្យធ្វើការនៅក្រៅប្រទេស គឺមានន័យថា អ្នកនោះសំណាងហើយ។
តែនេះសបង្ហាញថា មិនមែនសូម្បីតែប្រជាជនក្រីក្រខ្លាំងទេ ដែលអត់ទ្រាំលែងបាននឹងរបបកៀបសង្កត់ ផ្តាច់ការរបស់ពួកកុម្មុយនីស្តិព្យុងយ៉ាង សូម្បីតែអ្នកមានជីវភាពសមរម្យ ក៏នាំគ្នារត់ដែរ។ កន្លងមក ធ្លាប់មានមនុស្សតែម្នាក់គត់ ដែលមានតំណែងកំពូល ក្នុងបក្សកុម្មុយនីស្តិកូរ៉េខាងជើង ដែលបានរត់មកកូរ៉េខាងត្បូង គឺលោកHwang Jang Yop នៅឆ្នាំ១៩៩៧។ លោកម្នាក់នេះ គឺជាអតីប្រធានសភាសន្និបាទកំពូលរបស់បក្សកុម្មុយនីស្តិកូរ៉េខាងជើង។ រាល់ថ្ងៃនេះ តាមតួលេខផ្លូវការ គឺមានអ្នករត់គេចខ្លួន សរុបប្រហែលជា៣ម៉ឺននាក់ហើយ ដែលមករស់នៅកូរ៉េខាងត្បូង។
មួយឆ្នាំកើបលុយ១០លានដុល្លារ ដោយសារភោជនីយដ្ឋាន៖
យោងតាមការប៉ាន់ស្មាន របស់ភ្នាក់ងារសម្ងាត់កូរ៉េខាងត្បូង របបផ្តាច់ការកូរ៉េខាងជើង មានភោជនីយដ្ឋានចំនួនប្រមាណ១៣០ នៅតាមបណ្តាប្រទេសប្រហែល១២ប្រទេស ក្នុងនោះសំបូរជាងគេគឺនៅចិន។ តាមការស្មាន មួយឆ្នាំៗ បក្សកុម្មុនីស្តិកូរ៉េខាងជើង ប្រមូលលុយបានប្រហែលជា១០លានដុល្លារអាមេរិក ពីភោជនីដ្ឋានទាំងនោះ ហើយបុគ្គលិក បានត្រឹមតែហូបចុក នឹងស្នាក់នៅជុំគ្នា តែគ្មានប្រាក់ខែទេ។ តែពេលដែលបានចេញមកដល់ក្រៅ ទើបប្រជាជនទាំងនោះ ដឹងការពិត ពីការរីកចំរើន របស់កូរ៉េខាងត្បូង ជាទូទៅគឺតាមរយៈរឿងភាគកូរ៉េខាងត្បូង ដែលចាក់ផ្សាយតាមទូរទស្សន៍ចិន ទើបអ្នកខ្លះបានសម្រេចចិត្តរត់។
តែបើគិតពីឆ្នាំ២០១១មក ចំនួនអ្នករត់គេច បានថយចុះ ដោយសារតែមានការរិតបន្តឹងខ្លាំង ពីអាជ្ញាធរព្យុងយ៉ាង ហើយភោជនីយដ្ឋាន ក៏មានបិទជាបន្តបន្ទាប់ដែរ ដោយសារមានការត្រួតពិនិត្យយ៉ាងខ្លាំង ក្រោយការដាក់ទណ្ឌកម្មរបស់អង្គការសហប្រជាជាតិ ដើម្បីបិទផ្លូវរកលុយរបស់របបកុម្មុយនីស្តិព្យុងយ៉ាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ