កូរ៉េខាងត្បូងសាទរអាមេរិកដែលបានដាក់ទ័ណ្ឌកម្មថ្មីលើកូរ៉េខាងជើង
នៅថ្ងៃពុធ ទី១ មិថុនា សហរដ្ឋអាមេរិកបានប្រកាសឲ្យដឹងពីការដាក់ទ័ណ្ឌកម្មថ្មីប្រឆាំងនឹងកូរ៉េខាងជើងដែលបន្តផ្គើនសហគមន៍អន្តរជាតិតាមរយៈការសាកល្បងនុយក្លេអ៊ែរ និងការបាញ់គ្រាប់មីស៊ីលអន្តរទ្វីប។ ស្របគ្នានឹងទ័ណ្ឌកម្មថ្មីនោះ វ៉ាស៊ីតោនក៏បានបញ្ជូនទៅឲ្យក្រុមប្រឹក្សាសន្តិសុខអង្គការសហប្រជាជាតិនូវគម្រោងសេចក្តីថ្លែងការណ៍ថ្មីមួយថ្កោលទោសរបបក្រុងព្យុងយ៉ាងពីបទបាញ់សាកល្បងគ្រាប់មីស៊ីលអន្តរទ្វីបមិនបានសម្រេចកាលពីថ្ងៃទី១ មិថុនា។ កូរ៉េខាងត្បូងបានសាទរចំពោះវិធានការរបស់អាមេរិកពេលនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ទ័ណ្ឌកម្មថ្មីរបស់អាមេរិកលើកូរ៉េខាងជើងពេលនេះ គឺជាទ័ណ្ឌកម្មរបស់ក្រសួងសេដ្ឋកិច្ចអាមេរិកសំដៅបិទខ្ទប់ការបញ្ជូន និងការផ្ទេរលុយកាក់តាមប្រព័ន្ធធនាគារឆ្លងកាត់ទឹកដីអាមេរិកាំងរវាងស្ថាប័នហិរញ្ញវត្តុបរទេស និងស្ថាប័នហិរញ្ញវត្ថុកូរ៉េខាងជើង។ លោកអាដាម ស៊ូប៊ីន អនុរដ្ឋមន្រ្តីក្រសួងសេដ្ឋកិច្ចអាមេរិកទទួលបន្ទុកប្រយុទ្ធប្រឆាំងនឹងភេរវនិយមបានបញ្ជាក់នៅក្នុងសេចក្តីប្រកាសព័ត៌មានថា វិធានការដែលអាមេរិកបានសម្រេចពេលនេះជាវិធានការបំពេញបន្ថែមលើវិធានការដែលបានអនុម័តកន្លងមក និងថា លោកកំពុងរង់ចាំឲ្យមានការចាត់វិធានការដូចគ្នានេះពីរដ្ឋាភិបាល និងស្ថាប័នបរទេសផ្សេងទៀត។
នៅក្នុងសេចក្តីប្រកាសព័ត៌មានដដែល ក្រសួងសេដ្ឋកិច្ចអាមេរិកបានលំអិតបន្ថែមថា ទ័ណ្ឌកម្មហិរញ្ញវត្ថុថ្មីរបស់អាមេរិកប្រឆាំងកូរ៉េខាងជើងពេលនេះមានគោលដៅសំខាន់ពីរ ទី១ បិទខ្ទប់បណ្តាញហិរញ្ញវត្ថុបរទេសដែលកូរ៉េខាងជើងបានប្រើដើម្បីទទួលលុយយកទៅអភិវឌ្ឍន៍គ្រឿងសព្វាវុធប្រល័យលោក និងគ្រាប់មីស៊ីលអន្តរទ្វីប និងទី២ ទប់ស្កាត់រាល់សកម្មភាពហិរញ្ញវត្ថុរវាងស្ថាប័នហិរញ្ញវត្ថុបរទេស និងកូរ៉េខាងជើងដែលបានឆ្លងកាត់តាមបណ្តាញហិរញ្ញវត្ថុអាមេរិកាំង។
ក្រៅពីបានចាត់វិធានការបន្ថែមដាច់ដោយឡែករបស់ខ្លួន រដ្ឋបាលអាមេរិកក៏បានបញ្ជូនទៅកាន់ក្រុមប្រឹក្សាសន្តិសុខអង្គការសហប្រជាជាតិនូវសេចក្តីថ្លែងការណ៍ថ្មីមួយសំដៅថ្កោលទោសរបបក្រុងព្យុងយ៉ាងពីបទបាញ់សាកល្បងគ្រាប់មីស៊ីលអន្តរទ្វីបមិនបានសម្រេចកាលពីថ្ងៃទី១ មិថុនា។ នៅថ្ងៃនេះ កូរ៉េខាងត្បូង តាមរយៈក្រសួងការបរទេសបានសាទរចំពោះវិធានការថ្មីដាច់ដោយឡែករបស់អាមេរិកប្រឆាំងនឹងកូរ៉េខាងជើងពេលនេះ។ ទន្ទឹមគ្នានេះ ក្រសួងការបរទេសកូរ៉េខាងត្បូងក៏បានបន្ថែមថា រដ្ឋាភិបាលក្រុងសេអ៊ូលក៏នឹងបន្តចាត់វិធានការបន្ថែមដើម្បីដាក់គំនាបលើកូរ៉េខាងជើងឲ្យបោះបង់ចោលកម្មវិធីនុយក្លេអ៊ែររបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ