ស្តេចម៉ាស្សាថៃ ដែលធ្លាប់ជាតំណាងរាស្ត្រ ត្រូវតុលាការដាក់គុក២ឆ្នាំ
សេដ្ឋីថៃម្នាក់ដែលមានងារហៅក្រៅថា ជាស្តេចម៉ាស្សា ហើយក៏ធ្លាប់ជាតំណាងរាស្ត្រក្នុងសភាផងនោះ ត្រូវបានតុលាការថៃផ្តន្ទាទោស ឲ្យជាប់ពន្ធនាគារ២ឆ្នាំ ក្នុងបទចោទប្រកាន់ថាបានប្រើប្រាស់កំលាំងខុសច្បាប់ បំផ្លាញទ្រព្យសម្បត្តិ៝ឯកជន។ នេះជាលើកទីមួយហើយ ដែលអ្នកនយោបាយថៃម្នាក់ ត្រូវបានតុលាការកាត់ទោស ហើយបញ្ជូនទៅពន្ធធនាគារភ្លាមៗបែបនេះ។ នៅពីក្រោយការកាត់ទោសនេះ ច្បាស់ណាស់ថាវាមានហេតុផលនយោបាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
លោក ឈូវីដ កាម៉ុលវិសិទ្ធ អាយុ៥៥ឆ្នាំ ត្រូវបានមជ្ឈដ្ឋានថៃទូទៅ ស្គាល់ថាជាស្តេចម៉ាស្សា ដោយសារតែលោកសេដ្ឋីរូបនេះ បានកសាងទ្រព្យសម្បត្តិនិងកេរ្តិ៍ឈ្មោះ ក្នុងរបរបើកហាងម៉ាស្សា។ ភាពជោគជ័យ និងប្រជាប្រិយភាពបានជម្រុញឲ្យលោក បើកគណបក្សនយោបាយមួយ ដែលមានឈ្មោះថា គណបក្សរ៉ាក់ប្រថេតថៃ នៅឆ្នាំ២០០៥។ លោក បានជាប់ឈ្មោះជាតំណាងរាស្រ្តក្នុងសភាដល់ទៅពីរអាណត្តិឯណោះ។
នៅថ្ងៃព្រហស្បតិ៍ទី ២៨ មករានេះ តុលាការកំពូលក្រុងបាងកក បានចេញសាលដីកាកាត់ទោសស្តេចម៉ាស្សានេះ ឲ្យជាប់គុក២ឆ្នាំ។ លោកត្រូវបានគេបញ្ជូនទៅដាក់ពន្ធធនាគាភ្លាមៗ ក្រោយបិទសវនាការ។ លោក ឈូវីដ កាម៉ុលវិសិទ្ធ បានសារភាពទទួលកំហុស ចំពោះបទចោទប្រកាន់ដែលចោទថាបានប្រើប្រាស់ កំលាំងខុសច្បាប់ បំផ្លេចបំផ្លាញទ្រព្យសម្បត្តិឯកជន។ យោងតាមការចុះផ្សាយរបស់កាសែតថៃ នេះជារឿងវិវាទដីធ្លី ដែលសេដ្ឋីម៉ាស្សាបានទិញ ហើយបានជួលមនុស្សជាង៤០នាក់ ទៅវាយបំផ្លាញហាងលក់ភេសជ្ជៈដែលមានទីតាំង នៅលើដីមានជម្លោះ។
បើយើងស្តាប់មួយភ្លែត នេះគ្រាន់តែជាការកាត់ទោសធម្មតា តែប៉ុណ្ណោះ។ ក៏ប៉ុន្តែធាតុពិត របបយោធាថៃកំពុងតែបោសសម្អាតអ្នកនយោបាយណា ដែលមានឥទ្ធិពល និងដែលមានមាត់ចេចចូច ឧស្សាហ៍និយាយរិះគន់រដ្ឋាភិបាល។ លោក ឈូវីដ កាម៉ុលវិសិទ្ធ ធ្លាប់ត្រូវគេស្គាល់ថាអ្នកមិនសូវចេះតមមាត់តមក ក្នុងការរិះគន់ទេ។ លោកម្នាក់នេះតែងតែហ៊ានរិះគន់ ក្រុមមន្ត្រីប៉ូលីសពុករលួយថៃ ដែលជម្រិតទារប្រាក់ ពីអ្នករកស៊ីស្លូតត្រង់។
យ៉ាងណាមិញ ការប្រើប្រព័ន្ធតុលាការ កាត់ទោសអ្នកនយោបាយបែបនេះ មិនមែនជាលើកទីមួយទេ។ លោក ថាក់ស៊ីន ត្រូវបានតុលាការចោទពីបទពុករលួយ នៅឆ្នាំ២០០៦។ ក្រោយមកលោកស្រីយីងឡាក់ អតីតនាយករដ្ឋមន្ត្រី ក៏ត្រូវតុលាការចោទប្រកាន់ផងដែរ។ ប៉ុន្តែអ្វីដែលមិនធ្លាប់មាន គឺនេះជាលើកដំបូងហើយ ដែលអ្នកនយោបាយត្រូវចាប់ដាក់គុក ព្រោះថាទាំងលោកថាក់ស៊ីន និងទាំងប្អូនស្រីលោក នៅមិនទាន់ត្រូវបានគេចាប់ដាក់គុកនៅឡើយទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ