ថៃ៖មន្រ្តីប៉ូលិសជាន់ខ្ពស់ម្នាក់បានសុំសិទ្ធិជ្រកកោណនយោបាយក្នុងប្រទេសអូស្រា្តលី
នៅក្នុងប្រទេសថៃ មន្រ្តីប៉ូលិសជាន់ខ្ពស់ម្នាក់លោកប៉ាវីន ប៉ុងស៊ីរិនដែលទទួលបន្ទុកការស៊ើបអង្កេតក្នុងរឿងរត់ពន្ធជនអន្តោប្រវេសន៍ជាប់ពាក់ព័ន្ធនឹងមន្រ្តីដឹកនាំកំពូលៗបានប្រកាសឲ្យដឹងនៅថ្ងៃព្រហស្បតិ៍ ទី១០ ធ្នូនេះថា លោកកំពុងដាក់ពាក្យសុំសិទ្ធិជ្រកកោណនយោបាយនៅក្នុងប្រទេសអូស្រ្តាលី។ មូលហេតុនៃការសុំសិទ្ធិជ្រកកោណនយោបាយមកពីលោកបារម្ភអំពីជីវិតរបស់លោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
គឺតាមរយៈសារមួយផ្ញើពីបរទេសដែលលោកប៉ាវីន ប៉ុងស៊ីរិនបានពន្យល់បកស្រាយប្រាប់ AFP ថា រស់នៅក្នុងប្រទេសថៃសព្វថ្ងៃបានក្លាយជារឿងគ្រោះថ្នាក់បំផុត និងថា គ្មាននរណាម្នាក់អាចការពារជីវិតលោកបានទេ។ យ៉ាងណាក៏ដោយនៅពេលនេះ គេនៅមិនទាន់ទទួលបានព័ត៌មានបញ្ជាក់ពីរដ្ឋាភិបាលអូស្រ្តាលីទាក់ទងនឹងការសុំសិទ្ធិជ្រកកោណនយោបាយរបស់មន្រ្តីប៉ូលិសជាន់ខ្ពស់រូបនោះនៅឡើយទេ តែសារព័ត៌មានក្នុងស្រុកបានឲ្យដឹងថា លោកប៉ាវីន ប៉ុងស៊ីរិនកំពុងស្ថិតក្នុងទឹកដីអូស្តា្រលីរួចទៅហើយ។
គួរជម្រាបជូនថា អស់រយៈពេលជាច្រើនឆ្នាំដែលក្រុមអង្គការក្រៅរដ្ឋាភិបាលបានចេញមុខបរិហារពីទង្វើជួញដូរមនុស្សក្នុងប្រទេសថៃ។ តែគឺទើបនៅក្រោយការរកឃើញរណ្តៅកប់សពរួមក្នុងព្រៃស្ថិតប៉ែកខាងត្បូងនាខែឧសភាកន្លងមកទេដែលរឿងអាស្រូវមួយនេះបានបែកធ្លាយយ៉ាងខ្ចរខ្ចាយ។ នៅពេលនោះ លោកប៉ាវីន ប៉ុងស៊ីរិនត្រូវបានតែងតាំងជាអ្នកដឹកនាំការស៊ើបអង្កេតដោយលោកបានផ្តោតលើការរួមផ្សំគំនិតរបស់មន្រ្តីជាន់ខ្ពស់ក្នុងជួរប៉ូលិស និងកងទ័ព។ តែគួរឲ្យភ្ញាក់ផ្អើល ការស៊ើបអង្កេតបែរជាត្រូវបានក្រសួងមហាផ្ទៃប្រកាសបិទបញ្ចប់យ៉ាងទាន់ហន់ចាប់ពីខែតុលា។
នៅក្នុងបទសម្ភាសន៍មួយក្នុងខែវិច្ឆិកា លោកប៉ាវីន ប៉ុងស៊ីរិនបានសម្តែងការសោកស្តាយដែលក្រុមស៊ើបអង្កេតរបស់លោកត្រូវបានគេបិទរហ័សពេក និងថា នៅមានជនសង្ស័យជាច្រើនដែលជាប់ពាក់ព័ន្ធនឹងរឿងជួញដូរមនុស្សកំពុងបន្តមានសេរីភាព។ គឺនៅក្រោយបទសម្ភាសន៍នោះឯងដែលលោកប៉ាវីន ប៉ុងស៊ីរិនបានទទួលការគំរាមកំហែងដល់ជីវិត។ លោកប៉ាវីន ប៉ុងស៊ីរិនបានបន្ថែមថា ទោះបីជាមានការបើកសវនាការកាត់ទោសជនជាប់ចោទជាច្រើនរូបក្នុងខែវិច្ឆិកា ពិសេសឧត្តមសេនីយម៉ាណា កុងប៉ានពីបទបានរៀបចំរឿងជួញដូរមនុស្សក៏ដោយ ក៏បណ្តាញជួញដូរមនុស្សនៅមិនទាន់បានគាស់រំលើងទាំងស្រុងទេ។
គួរបញ្ជាក់ថា អស់ជាច្រើនឆ្នាំមកហើយដែលក្រុមអង្គការក្រៅរដ្ឋាភិបាលបានចោទមន្រ្តីប៉ូលិស និងទាហានពីបទបិទភ្នែក និងថែមទាំងបានរួមគំនិតនៅក្នុងរឿងជួញដូរមនុស្សទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ