ជំនួបដ៏កម្ររវាងនាយករដ្ឋមន្ត្រីឥណ្ឌា និងប៉ាគីស្ថានត្រូវសាធារណៈមតិអបអរ
លោកណារិន្ទ្រម៉ូឌី នាយករដ្ឋមន្ត្រីឥណ្ឌា ដែលបានបង្ករការភ្ញាក់ផ្អើលទូទៅមួយ ដោយបានអញ្ជើញទៅជួលោក ណាវ៉ាហ្ស ហ្សារីហ្វ នាយករដ្ឋមន្ត្រីប៉ាគីស្ថាន កាលពីថ្ងៃទី២៥ធ្នូ។ នេះគឺជាជំនួប ដោយឥតមាននរណាដឹងមុនទាំងអស់ ហើយដែលវាបង្ហាញពីកាយវិការ ខិតចូលមកជិតគ្នា រវាងប្រទេសជិតខាងទាំងពីរ ដែលតែងតែគ្រហឹមដាក់គ្នា មិនចេះចប់ហើយ។ រឿងគួរឲ្យភ្ញាក់ផ្អើលនេះ បានធ្វើឲ្យសារព័ត៌មាន និងមតិសាធារណៈ នៃប្រជាជាតិទាំងពីរ អបអរសាទរជាខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ខុសពីទម្លាប់ ដែលប្រមុខរដ្ឋប្រទេសមួយតែងតែធ្វើ លោក នារិន្ទ្រម៉ូឌី បែរជាជ្រើសរើសយក ការធ្វើទស្សនកិច្ច ដ៏គួរឲ្យភ្ញាក់ផ្អើលមួយទៅកាន់ ប្រទេសប៉ាគីស្ថាន កាលពីថ្ងៃទី ២៥ធ្នូ។ វាមិនមែនជាទស្សនកិច្ចផ្លូវរដ្ឋ ដែលបានធ្វើនៅទីក្រុងអ៊ីស្លាម៉ាបាដអីទេ តែជាទស្សនកិច្ចមិនផ្លូវការ ដែលបានធ្វើឡើង នៅក្នុងគេហដ្ឋានរបស់លោកនាយករដ្ឋមន្ត្រីប៉ាគីស្ថាន ដោយមានវត្តមានក្រុមគ្រួសារ និងមិត្តភ័ក្តជិតស្និតរបស់លោកផងដែរ។ តាមពិត វាគឺជាពិធី បុណ្យខួបកំណើត របស់លោក ណាវ៉ាហ្ស ហ្សារីហ្វ និងពិធីមង្គលការ របស់ចៅស្រីលោក។
យ៉ាងណាក៏ដោយ អ្នកនាំពាក្យរដ្ឋាភិបាលប៉ាគីស្ថាន បានបរិយាយថា មេដឹកនាំទាំងពីរ បានអង្គុយនិយាយគ្នាយ៉ាងស្និទ្ធស្នាល ប្រៀបដូចជាមិត្តភ័ក្ត ដែលបែកគ្នារាប់សិបឆ្នាំ ដូច្នោះដែរ។ លោកណារិន្ទ្រ ម៉ូឌី ថែមទាំងឆ្លៀតនិយាយបញ្ជាក់ទៅលោក ណាវ៉ាហ្ស ហ្សារីហ្វ ទៀតផងថា លោក មិនដែលមិនជឿពីភាពស្មោះត្រង់របស់លោក ហ្សារីហ្វទេ។
ទោះបើខាងឥណ្ឌាអះអាងថា គឺលោកណារិន្ទ្រ ម៉ូឌីដែលជាអ្នកផ្តើមគំនិតដំបូង តែខាងប៉ាគីស្ថាន បាននិយាយថា ខាងគេជាអ្នកអញ្ជើញលោក នាយករដ្ឋមន្ត្រីឥណ្ឌា ហើយខាងគេបានត្រៀមរៀបចំសន្តិសុខការពារ ពីរបីថ្ងៃមុនម្លេះ។ នៅប៉ាគីស្ថានក៏ដូចជានៅឥណ្ឌា ដំណឹងនេះបានធ្វើឲ្យអ្នកសរសេរព័ត៌មាន អត់ទ្រាំមិនសរសើរមិនបាន អំពីកាយវិការល្អូកល្អឺននឹងគ្នា វាងមេដឹកនាំទាំងពីរ។ មតិសាធារណៈទូទៅ ក៏ដូច្នោះដែរ គឺពួកគេអបអរ ចំពោះកាយវិការនេះ ព្រោះវាបង្ហាញពីការខិតខំ ស្តារមិត្តភាព បញ្ចប់គំនំគុំគួន រវាងប្រទេសទាំងពីរ។
អ្នកវិភាគជាច្រើនយល់ថា នេះគឺជាការកែប្រែយុទ្ធសាស្រ្តថ្មី របស់លោក ណារិន្រ្ទម៉ូឌី ដើម្បីផ្សះផ្សារជាមួយប៉ាគីស្ថាន។ កាយវិការនេះបង្ហាញថា លោកនាយករដ្ឋមន្ត្រីឥណ្ឌា ដែលកន្លងមក មានចរិករឹងទទឹង មិនព្រមបន្ទន់ឥរិយាបទ ជាមួយប៉ាគីស្ថាន បានសុខចិត្តខាំមាត់សង្កត់ចិត្តហើយ ដើម្បីចរចាជាមួយប៉ាគីស្ថាន ទាក់ទិននឹងវិបត្តិនៅតំបន់កាហ្សមៀរ និងបញ្ហាភេរវកម្មអ៊ីស្លាមជ្រុលនិយម។
មុននេះ មិនដល់ប៉ុន្មានខែផង កងទ័ពប្រទេសទាំងពីរ បានបាញ់ផ្លោងគ្រាប់ដាក់គ្នាទៅវិញទៅមក។ តំបន់កាហ្សមៀរ ស្ថិតនៅភាគខាងជើងប្រទេសទាំងពីរ គឺជាប្រភពនៃជម្លោះដែនដី ដែលសត្រូវទាំងពីរដណ្តើមគ្នាកាន់កាប់ តាំងពីឆ្នាំ ១៩៤៧ម្លេះ។ ចាប់តាំងពីនោះមក សង្រ្គាមបានផ្ទុះឡើង ៣ដងរួចមកហើយ រវាងមហាអំណាចនុយក្លេអ៊ែរទាំងពីរ។ ជំនួបដោយគ្មានប្រាប់អ្នកណាមុន និងដែលមានលក្ខណៈមិនផ្លូវការនេះ គឺធ្វើឡើងក្នុងលក្ខណៈសាមញ្ញឯកជនជាបឋម មុននឹងឈានទៅដល់ការចរចា ជាលក្ខណៈផ្លូវរដ្ឋ ដែលនឹងត្រូវធ្វើឡើងនៅពាក់កណ្តាលខែមករា ឆ្នាំក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ