នាយករដ្ឋមន្ត្រីឥណ្ឌា-ប៉ាគីស្ថាន ជួបគ្នាដោយឥតគ្រោងទុក
នេះជាលើកទីមួយហើយ គិតតាំងពីជាង១០ឆ្នាំមក ដែលប្រមុខរដ្ឋាភិបាលឥណ្ឌា ចុះជាន់ទឹកដីប៉ាគីស្ថាន ! នៅថ្ងៃសុក្រទី ២៥ ធ្នូ ២០១៥នេះ នាយករដ្ឋមន្ត្រីឥណ្ឌា លោក ម៉ូឌី ដែលទើបបញ្ចប់ទស្សនកិច្ចផ្លូវការនៅរុស្ស៊ី និងទស្សនកិច្ចខ្លីនៅអាហ្វហ្កានីស្ថាន បានឆ្លៀតឆៀងចូលជួបនាយករដ្ឋមន្ត្រីប៉ាគីស្ថានដល់ផ្ទះ ដោយឥតគ្រោងទុក បង្កជាការភ្ញាក់ផ្អើលយ៉ាងខ្លាំងពីសំណាក់អ្នកតាមដាននយោបាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ជាទស្សនកិច្ចដែលគ្មានក្នុងរបៀបវារៈ និងជាជំនួបដែលមិនបានគ្រោងទុកទេ ! លោក ម៉ូឌី បានអញ្ជើញទៅដល់ក្រុងឡាអ័រ ប្រទេសប៉ាគីស្ថាន នៅថ្ងៃសុក្រនេះ ដោយមានលោក ណាវ៉ា ស្ហារីហ្វ នាយករដ្ឋមន្ត្រីប៉ាគីស្ថាន ម្ចាស់ផ្ទះ ដល់ព្រលានយន្តហោះ មុននឹងឡើងឧទ្ធម្ភាគចក្ររួមគ្នា ធ្វើដំណើរទៅគេហដ្ឋានលោកស្ហារីហ្វ ដើម្បីជួបពិភាក្សាគ្នាមួយទល់នឹងមួយ។ នេះបើតាមរូបភាពវីដេអូក្នុងកញ្ចក់ទូរទស្សន៍ជាតិប៉ាគីស្ថាន។
ប្រមុខដឹកនាំរដ្ឋាភិបាលទាំងពីរ ទំនងជាបានពិភាក្សាអំពីសំណុំរឿងទ្វេភាគីសំខាន់ ដូចជាវិបត្តិព្រំដែននៅតំបន់ហ៊ីម៉ាឡាយ៉ា ឬកាស្មៀ ដែលជាប្រភពជម្លោះដ៏តានតឹងបំផុតរវាងឥណ្ឌានិងប៉ាគីស្ថាន រហូតធា្លប់នាំប្រទេសជិតខាងទាំងពីរឱ្យធ្វើសង្គ្រាមនឹងគ្នាដល់ពីរដង។ ការប៉ះទង្គិចគ្នាជារឿយៗ តាមព្រំដែនបានរុញច្រានមហាអំណាចនុយក្លេអ៊ែរប្រចាំតំបន់ទាំងពីរ ឱ្យផ្អាកការចរចាដោះស្រាយវិបត្តិព្រំដែនកាស្មៀទាំងស្រុងកាលពីខែសីហា។ ទំនាក់ទំនងឥណ្ឌា-ប៉ាគីស្ថាន ធ្លាប់ដុនដាបកាន់តែខ្លាំង តាំងពីលោកម៉ូឌី អ្នកជាតិនិយមហិណ្ឌូ ឡើងកាន់អំណាចមក។ គឺទើបតែក្នុងឱកាសសន្និសីទអន្តរជាតិស្តីពីអាកាសធាតុនៅទីក្រុងប៉ារីសទេ ដែលថ្នាក់ដឹកនាំជាន់ខ្ពស់ឥណ្ឌាប៉ាគីស្ថានបានស្តីចូលគ្នាវិញ។
ស្រាប់តែនៅថ្ងៃនេះ ក្នុងដំណើរត្រលប់ពីទស្សនកិច្ចខ្លីនៅអាហ្វហ្កានីស្ថាន ដើម្បីសម្ពោធសភាថ្មី លោកម៉ូឌី បានសម្រេចចិត្តភ្លាមភ្លែត ដោយឥតព្រាងទុកចូលជួបសមភាគីប៉ាគីស្ថានដល់គេហដ្ឋាន។ នេះជាសញ្ញាដ៏ច្បាស់លាស់មួយ បញ្ជាក់ថាប្រទេសទាំងពីរអាចចាប់ដៃគ្នាដើម្បីសកម្មភាពនិងបានឆាប់រហ័ស ដោះស្រាយបញ្ហាផ្សេង ដូចយ៉ាងការជួយស្រោចស្រង់អាហ្វហ្កានីស្ថាន ...។ ប៉ុន្តែមិនមែនជារបត់ថ្មី និងការប្តូរផ្លាស់ជំហរនយោបាយឥណ្ឌាទេ។ នេះបើប្រភពស្និទ្ធនឹងនាយករដ្ឋមន្ត្រីឥណ្ឌា។
ទោះជាយ៉ាងដូច្នេះក្តី ក៏បក្សប្រឆាំងឥណ្ឌា បានធ្វើការរិះគន់ ដោយមិនសំចៃ ទង្វើរបស់លោកម៉ូឌី នៅថ្ងៃនេះ ព្រោះយល់ថាប៉ាគីស្ថានមិនប្តូរឥរិយាបថអ្វីដែលសក្តិសមនឹងទទួលបាននូវទំនាក់ទំនងដ៏កក់ក្តៅល្អូនល្អើនពីឥណ្ឌាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ