ប្រធានាធិបតីកូរ៉េខាងត្បូង ទៅជួបលោកដូណាល់ ត្រាំ និយាយពីបញ្ហាកូរ៉េខាងជើង
ចុះផ្សាយនៅថ្ងៃ៖
ស្តាប់ - ០៦:៤៦
លោកប្រធានាធិបតីកូរ៉េខាងត្បូង មូន ជែអ៊ីន ទើបបានអញ្ជើញទៅដល់ទីក្រុងវ៉ាស៊ីនតោន សហរដ្ឋអាមេរិក ដើម្បីជួបសន្ទនាគ្នា ជាមួយលោកដូណាល់ ត្រាំ។ នេះគឺជាដំណើរទស្សនកិច្ច នៅសហរដ្ឋអាមេរិក លើកទីមួយហើយ របស់លោកប្រធានាធិបតីថ្មីកូរ៉េខាងត្បូង។ គម្រោងជជែកគ្នា ដ៏សំខាន់បំផុតនោះ គឺសំណុំរឿងនុយក្លេអ៊ែរកូរ៉េខាងជើង។ លោក មូន ជែអ៊ីន ត្រូវបានគេមើលឃើញថា មានគោលជំហរ ខុសពីលោកស្រីប៉ាក់ គុនហេ ដែលចាំតែស្តាប់តាមរដ្ឋាភិបាលអាមេរិក។
សំណុំរឿងនុយក្លេអ៊ែរ កូរ៉េខាងជើង គឺជាសំណុំរឿងធំបំផុត ដែលជំរុញ ឲ្យលោក មូន ជែអ៊ីន ទៅជួបលោកដូណាល់ ត្រាំនៅថ្ងៃ ទី២៩ មិថុនា នេះ ថ្វីត្បិតតែទន្ទឹមគ្នានេះ លោកប្រធានាធិបតីកូរ៉េខាងត្បូង បានឆ្លៀតដឹកនាំការប្រជុំរវាងអ្នកជំនួញកូរ៉េខាងត្បូង និងអ្នកជំនួញអាមេរិក។
បើគិតគ្រាន់តែចាប់ពីថ្ងៃដែលលោក មូន ជែអ៊ីន បានឡើងកាន់តំណែង នៅដើមខែឧសភា ឆ្នាំ២០១៧នេះ កូរ៉េខាងជើង បានធ្វើការសាកល្បង មីស៊ីលបាលីស្ទីក និងនុយក្លេអ៊ែរ ៥ដងមកហើយ។ មិនថា សម្រាប់លោកដូណាល់ ត្រាំ ឬសម្រាប់លោកមូន ជែអ៊ីនទេ សំណុំរឿងនុយក្លេងអ៊ែរកូរ៉េខាងជើង គឺជារឿងបន្ទាន់ និងគ្រោះថ្នាក់បំផុត។ គីម ជុនអ៊ុន មេដឹកនាំផ្តាច់ការកូរ៉េខាងជើង បានគំរាមដោយត្រង់ៗតែម្តង ថាគេនឹងកម្ទេចកូរ៉េខាងត្បូង និងសហរដ្ឋអាមេរិក។
ល្មមដល់ពេល ដែលកូរ៉េខាងត្បូង ត្រូវហ៊ាននិយាយថា “ទេ” ជាមួយអាមេរិក!
លោកប្រធានាធិបតីថ្មីរបស់កូរ៉េខាងត្បូង មានគោលជំហរ មិនសូវស្របជាមួយរដ្ឋាភិបាលលោកដូណាល់ ត្រាំប៉ុន្មានទេ។ ពោលគឺវាខុសពីកាលជំនាន់លោកស្រី ប៉ាក់ គុនហេ ដែលត្រូវគេរិះគន់ថា ចាំតែញាក់ទៅតាមការចាក់ របស់អាមេរិក។ លោក មូន ជែអ៊ីន ពេលដែលបានចូលកាន់តំណែងភ្លាម បាននិយាយថា លោកត្រៀមខ្លួន ទៅជួបនិយាយដោយផ្ទាល់ ជាមួយគីម ជុងអ៊ុន មុននឹងទៅជួបលោក ដូណាល់ ត្រាំ ទៀតផង។
លោក មូន ជែអ៊ីន ក៏បានទាំងសរសេរក្នុងសៀវភៅរបស់លោក ថា “វាល្មមដល់ពេលហើយ ដែលកូរ៉េខាងត្បូង ត្រូវហ៊ានឆ្លើយថាទេខ្លះ ជាមួយនឹងអាមេរិក មិនត្រូវចេះតែហៃអើ តាមអាមេរិករហូតនោះទេ”។ គឺក្នុងន័យនេះហើយ ទើបបានជារដ្ឋាភិបាលលោក មូន ជែអ៊ីន បានសម្រេចផ្អាក ការដាក់តាំងប្រព័ន្ធខែលមីស៊ីលរបស់អាមេរិក នៅលើដីកូរ៉េខាងត្បូង។
ជួបលោកដូណាល់ ត្រាំ ដើម្បីលួងចិត្ត
ទីបំផុត ថ្វីបើបានបង្ហាញគោលជំហរ រឹងរូសខ្លះ ជាមួយអាមេរិក លោក មូន ជែអ៊ីន បានសម្រេចទៅជួបលោកដូណាល់ ត្រាំ មុននឹងជួប គីម ជុងអ៊ុន។ បើតាមការវិភាគ លោកមូន ជែអ៊ីន បានទទួលការដាក់សម្ពាធខ្លះ ពីក្រុមអ្នកនយោបាយអភិរក្សនិយមកូរ៉េខាងត្បូង ដែលមិនចង់ធ្វើឲ្យលោកដូណាល់ ត្រាំ ខឹងមួរម៉ៅខ្លាំង។ ជាងនេះទៅទៀត មរណៈភាពរបស់និស្សិតអាមេរិកឈ្មោះ Otto Warmbier ដែលត្រូវបានកូរ៉េខាងជើងធ្វើទារុណកម្មនោះ កំពុងតែធ្វើឲ្យរដ្ឋាភិបាលអាមេរិក ខឹងកូរ៉េខាងជើងកាន់តែខ្លាំង។
ដូច្នេះ ជំនួបនេះ វាហាក់បីដូចជាការ លួងចិត្តលោកត្រាំ និង អះអាងប្រាប់គ្រប់មជ្ឈដ្ឋានថា សម្ព័ន្ធមិត្តអាមេរិកនិងកូរ៉េខាងត្បូង មិនមានស្នាមប្រេះស្រាំទេ។ ជាមួយគ្នានេះ លោក មូន ជែអ៊ីន ចង់ទប់រដ្ឋាភិបាលអាមេរិក កុំឲ្យធ្វើអ្វីដោយតក់ក្រហល់ ជាមួយកូរ៉េខាងជើង។
ច្រកចេញដោយសន្តិវិធី ពីរដំណាក់កាល របស់លោក មូន ជែអ៊ីន
ក្នុងសំណុំរឿងកូរ៉េខាងជើងនេះ គោលជំហររបស់លោក មូន ជែអ៊ីន គឺប្រើធម៌ត្រជាក់ តាមរយៈការចរចា ជាជាងការប្រើវិធីសាស្ត្រគំរាមកំញើញ តួយ៉ាងដូចជាការធ្វើសមយុទ្ធយោធា បញ្ចេញសាច់ដុំ ឬដាក់តាំងប្រព័ន្ធខែលមីស៊ីលជាដើម។ គាត់ធ្លាប់ប្រាប់អ្នកកាសែតថា គេអាចបញ្ជៀសការប្រឈូមមុខដាក់គ្នា កំញើញគ្នាបាន មិនមែនគ្មានមធ្យោបាយឯណា!
បើសំឡឹងមើលទៅ ទស្សនវិស័យរបស់ លោកមូន ជែអ៊ីន គឺវាផ្ទុយពីចក្ខុវិស័យរបស់រដ្ឋាភិបាលលោកដូណាល់ ត្រាំ។ កន្លងមកលោក Jim Mattis រដ្ឋមន្ត្រីក្រសួងការពារជាតិអាមេរិក ធ្លាប់បានគំរាមថា ជម្រើសប្រើកម្លាំងវាយបកទៅកូរ៉េខាងជើង គឺជាជម្រើសដែលគេអាចយកមកពិចារណាបានគ្រប់ពេល។ យ៉ាងណាមិញ ការបញ្ជូននាវា ផ្ទុកយន្តហោះចម្បាំងអាមេរិក យ៉ាងតក់ក្រហល់កាលពីពាក់កណ្តាលខែ ឧសភា គឺជាសកម្មភាពមួយ បង្ហាញថា រដ្ឋាភិបាលលោកដូណាល់ ត្រាំ ហ៊ានថា គឺហ៊ានធ្វើ។
បើតាមការចុះផ្សាយរបស់បណ្តាញព័ត៌មានកូរ៉េខាងត្បូងជាច្រើន នៅក្នុងពេលជួបជាមួយលោកដូណាល់ ត្រាំនៅថ្ងៃនេះ លោកមូន ជែអ៊ីន មានសំណើរមួយ ដើម្បីដោះស្រាយវិបត្តិនុយក្លេអ៊ែរកូរ៉េខាងជើង។ សំណើរនោះមានពីរតំណាក់កាល។ ដំណាក់កាលទីមួយ គឺការកាត់បន្ថយទាំងសងខាង។ ពោលគឺ ត្រូវនិយាយជាមួយកូរ៉េខាងជើង ឲ្យបញ្ឈប់ ឬកាត់បន្ថយ ការសាកល្បងមីស៊ីល និងនុយក្លេអ៊ែរ ហើយទន្ទឹមគ្នានោះ អាមេរិក និងកូរ៉េខាងត្បូង ឯនេះក៏ត្រូវកាត់បន្ថយការធ្វើសមយុទ្ធយោធាដែរ។ បន្ទាប់មកទៀត ដំណាក់កាលទីពីរ គឺការឈានទៅរុះរើ ចោលទាំងស្រុង នូវកម្មវិធីនុយក្លេអ៊ែរ របស់កូរ៉េខាងជើង ជាថ្នូរនឹងការបើកឲ្យមានចំណងការទូតឡើងវិញ ព្រមជាមួយនឹងជំនួយអភិវឌ្ឍន៍សេដ្ឋកិច្ច។
ចិនប្រើគ្រប់មធ្យោបាយ ដើម្បីបញ្ចៀសសង្គ្រាម
បើយើង លើកចំណុច រឿងដាក់តាំងប្រព័ន្ធខែលមីស៊ីលមួយមកនិយាយ យើងអាចនិយាយបានថា ចិនបានដាក់សំពាធទៅលើកូរ៉េខាងត្បូង។ សម្រាប់ចិន ការដាក់តាំងប្រព័ន្ធខែលមីស៊ីល អាមេរិក នៅក្បែរមាត់ច្រកទ្វារផ្ទះរបស់ខ្លួន គឺជារឿងមួយគ្រោះថ្នាក់ណាស់។ ចិនបានប្រើសំពាធសេដ្ឋកិច្ច ចាប់បង្ខំឲ្យកូរ៉េខាងត្បូង ពិចារណាឡើងវិញ។
ដូចយើងបានដឹងស្រាប់ ចិន បានពន្យុះឲ្យមានបាតុកម្មប្រឆាំងកូរ៉េខាងត្បូង ដុតហាងទំនិញកូរ៉េខាងត្បូង បិទមិនឲ្យនាំទំនិញកូរ៉េខាងត្បូងចូល ហើយបិទមិនឲ្យមានទេសចរណ៍ចិន ទៅលេងកូរ៉េខាងត្បូងទៀត។ អាចថាវាគាប់ជួន ដែលលោកប្រធានាធិបតីថ្មីកូរ៉េខាងត្បូង មានបំណងមិនសូវចង់ស្តាប់បង្គាប់របស់អាមេរិកស្រាប់ផង ក៏បានជាបញ្ជាឲ្យផ្អាក ការដាក់តាំងប្រព័ន្ធខែលមីស៊ីលនេះ។ បញ្ហាប្រព័ន្ធខែលមីស៊ីលនេះ ក៏នឹងត្រូវយកមកនិយាយគ្នា នៅក្នុងជំនួបនេះដែរ បើតាមការស្មាន។
និយាយជារួម ទាំងចិន ទាំងកូរ៉េខាងត្បូង សុទ្ធតែជាអ្នកខាតធំ បើសិន ជាអាមេរិកប្រើធម៌ក្តៅ ដាក់កូរ៉េខាងជើង។ កូរ៉េខាងត្បូង ស្ថិតនៅជួរមុខគេ ក្នុងសមរភូមិនេះ បើសិនជាកើតសង្រ្គាមមែន។ ចំណែកចិនវិញ ក៏គឺជាអ្នកខាតធំ ព្រោះអន្តរាគមន៍យោធាអាមេរិក ក្នុងតំបន់នេះ និងកែប្រែយុទ្ធសាស្ត្រវាទីរបស់ចិនទាំងស្រុង។ អាមេរិក នឹងឆក់ឱកាសនេះ វិលមកធ្វើជាបងធំ ក្នុងតំបន់អាស៊ីប៉ាស៊ីហ្វិក។ ដូច្នេះហើយ បានជាចិន ធ្វើគ្រប់យ៉ាង ដើម្បីដាក់សំពាធលើកូរ៉េខាងជើង ហើយទន្ទឹមគ្នានេះ ជំរុញកូរ៉េខាងត្បូង ឲ្យទៅអូសទាញលោកដូណាល់ ត្រាំ កុំឲ្យប្រើកំលាំង។
America First !
បើអាមេរិក យល់ព្រមកាត់បន្ថយសមយុទ្ធយោធា ក្នុងតំបន់នេះ មានន័យថាឥទ្ធិពលយោធាអាមេរិក ក៏នឹងថយបន្តិចម្តងៗ ទុកឱកាសឲ្យចិនវិញម្តង។ តែសួរថា លោកដូណាល់ ត្រាំសុខចិត្តទេ? ថ្មីៗនេះទៀត និស្សិតអាមេរិក ដែលកូរ៉េខាងជើងបានធ្វើទារុណកម្ម ហើយស្លាប់ក្រោយដោះលែងមកវិញនោះ បានធ្វើឲ្យលោកដូណាល់ ត្រាំខឹងខ្លាំងណាស់។ យើងគ្រប់គ្នា ធ្លាប់បានឮសម្តីលោកត្រាំហើយ “ America First !” កូរ៉េខាងជើងគំរាមអាមេរិក ដូច្នេះអាមេរិក អាច ប្រើកំលាំងលើកូរ៉េខាងជើងវិញមែន ដោយមិនខ្វល់ថា អ្នកណាខាតឬចំណេញទេ។ សំខាន់គឺ ក្នុងក្រសែរភ្នែកលោកត្រាំ ប្រយោជន៍របស់អាមេរិក ធំជាងគេបង្អស់ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ