សម្តីសមាជិកសភាបារាំង លោក អេរិក វឺត ដែលចាត់ទុកលោកម៉ាក្រុង ថាមាន”ចរិកជាខ្មែរ” ធ្វើឲ្យមានការខឹងសម្បារ
លោក អេរិក វឺត អតីតរដ្ឋមន្ត្រីក្រសួងហិរញ្ញវត្ថុ និងជាសមាជិកសភាបារាំង បានបង្ករឲ្យមានការខឹងសម្បារ ជាខ្លាំង នៅតាមបណ្តាញសង្គម ពីសំណាក់ប្រជាជនខ្មែរ ទាំងនៅកម្ពុជា ទាំងនៅបារាំង បន្ទាប់ពីលោកម្នាក់នេះ បាននិយាយថា លោកប្រធានាធិបតីម៉ាក្រុង មានអត្តចរិកជាខ្មែរ ពោលគឺឃោរឃៅ គ្មានមេត្តាធម៌ ចំពោះលោក ម៉ានុយអែល វ៉ាល់ស៍។ មានការទាមទារ ឲ្យលោក អេរិក វឺត ធ្វើការសុំទោសជាសាធារណៈ ចំពោះសម្តីម៉ាក់ងាយ មកលើប្រជាជនខ្មែរនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ថ្លែងក្នុងបទសម្ភាសន៍ពេលព្រឹក កាលពីថ្ងៃពុធ ទី១០ ឧសភា នៅវិទ្យុEurope1 លោកអេរិក វឺត (Eric Woerth) បាននិយាយថា លោក អេម៉ានុយអែល ម៉ាក្រុង មានចរិកពុំគប្បី ទៅលើលោកម៉ានុយអែល វ៉ាល់ស៍ ដែលបានមកប្រគល់ខ្លួន សុំឈរឈ្មោះក្នុងបញ្ជីឈ្មោះបេក្ខជនបោះឆ្នោតសភារបស់បក្សលោកម៉ាក្រុង។ លោក អេរិក វឺត បានបន្ថែមថា ចរិកលោកម៉ាក្រុងនេះ គឺមានលក្ខណៈជាខ្មែរ ពោលគឺជាអត្តចរិក មិនថ្លៃថ្នូរ គ្មានមេត្តាធម៌ ជាន់ពន្លិច និងមិនទុកកិត្តិយសឲ្យគ្នា។
សម្តីប៉ុន្មានម៉ាត់របស់លោក អេរិក វឺត នេះ បានបង្ករជាការខឹងសម្បារ នៅតាមបណ្តាញសង្គម ពីសំណាក់ ប្រជាជនខ្មែរមួយចំនួន ទាំងរស់នៅប្រទេសបារាំង និងនៅក្នុងស្រុក ព្រមទាំងពីសំណាក់ ប្រជាជនបារាំងមួយចំនួន ដែលជាអ្នកស្គាល់ និងស្រលាញ់ប្រទេសកម្ពុជា។
ជាការពិតទៅ គេអាចកាត់យល់បាន ថាលោកអេរិក វឺត ចង់សំដៅទៅដល់ របបខ្មែរក្រហម ក៏ប៉ុន្តែការប្រើពាក្យមិនពេញលេញ បែបនេះ បានបង្ករឲ្យមានការភ័ន្តច្រឡំ ហើយសម្រាប់មតិមួយចំនួនធំ វាគឺជាការមើលងាយ ដល់ជាតិសាសន៍ខ្មែរមួយទាំងមូលតែម្តង។ លោក ចែម វីដយ៉ា ឯកអគ្គទូតកម្ពុជា ប្រចាំប្រទេសបារាំង បានសរសេរលិខិតមួយ ផ្ញើរទៅកាន់លោក អេរិក វឺត នៅថ្ងៃទី ១១ ឧសភា ដើម្បីសុំការពន្យល់ និងទាមទារឲ្យលោក អេរិក វឺត ធ្វើការសុំទោសជាសាធារណៈដល់ប្រជាជនខ្មែរ។
ដោយឡែក លោក ហ្លូរីយ៉ង់ បូអេម (Florian Bohême) បេក្ខជនឈរឈ្មោះសមាជិកសភាបារាំង មកពីបក្សឆ្វេងនិយម ក៏បានធ្វើលិខិតមួយថ្កោលទោសចំពោះសម្តីរបស់លោក អេរិក វឺតផងដែរ ដោយបានចាត់ទុកថា គឺសម្តីរបស់លោកអេរិក វឺត ទៅវិញទេ ដែលមិនថ្លៃថ្នូរ មិនសមជាអ្នកនយោបាយ និងជាអ្នកចេះដឹងបារាំងមួយរូប។
នៅល្ងាចថ្ងៃទី ១១ ឧសភា គេបានឃើញលោក អេរិក វឺត បានសរសេរសារ នៅលើទំព័រហ្វេសប៊ុក របស់លោក ដោយបានសរសេរថា លោកមានការសោកស្តាយ និងសុំទោស បើសិនសម្តីរបស់លោក បានធ្វើឲ្យប៉ះពាល់ផ្លូវចិត្តមនុស្សមួយចំនួន។ លោកបន្តថា សម្តីរបស់លោក ជាសម្តីដែលមិនបានត្រៀមទុកមុន ហើយលោកមិនបានសំដៅលើប្រជាជនទេ គឺលោកសំដៅលើទំព័រប្រវត្តិសាស្ត្រ មួយដំណាក់កាលប៉ុណ្ណោះ។ ម្យ៉ាងទៀត លោកបន្ថែមថា ពាក្យថា ចិរកជាខ្មែរ នេះ គឺត្រូវបានអ្នកនយោបាយបារាំងខ្លះ យកមកនិយាយទាំងមិនសមបែបនេះ ជាយូរមកហើយ។
សារសុំទោស នៅលើហ្វេសប៊ុក របស់លោកអេរិក វឺត នៅមិនទាន់អាចរំងាប់ការខឹងសម្បាររបស់មនុស្សមួយចំនួននៅឡើយទេ ដោយគេទាមទារឲ្យលោក ប្រកាសសុំទោសជាផ្លូវការទាមវិទ្យុ។ វិទ្យុបារាំងអន្តរជាតិ បានព្យាយាមទាក់ទងទៅលោក អេរិក វឺត នៅថ្ងៃទី១៣ ឧសភានេះ ដើម្បីសុំការបំភ្លឺ តែមិនអាចទាក់ទងបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ