អាជ្ញាធរថៃពង្រឹងសន្តិសុខ បន្ទាប់ពីមានការបំផ្ទុះគ្រាប់បែកនៅបាងកក
នាយករដ្ឋមន្ត្រីថៃ ទើបបានចេញបទបញ្ជាឲ្យចាត់វិធានការពង្រឹងសន្តិសុខឲ្យបានមធ្យ័តនៅគ្រប់ទិសទីជាពិសេសនៅតាមទីកន្លែងសាធារណៈនានាក្នុងទីក្រុងបាងកក បន្ទាប់ពីមានការផ្ទុះគ្រាប់បែកឆ្នៃពីរគ្រាប់កាលពីយប់ម្សិលមិញ។ ឧប្បត្តិហេតុនេះ បានរំលឹកឲ្យគេនឹកឃើញទៅដល់ស្ថានភាពវឹកវរនានានៅមុនពេលមានរដ្ឋប្រហារយោធាកាលពីខែឧសភាឆ្នាំ២០១៤។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
នៅយប់ថ្ងៃអាទិត្យម្សិលមិញ គ្រាប់បែកឆ្នៃពីរគ្រាប់ដែលមានកម្លាំងខ្សោយ បានផ្ទុះនៅជិតមណ្ឌលពាណិជ្ជកម្មដ៏ធំមួយនៅទីក្រុងបាងកក ជាហេតុបណ្តាលឲ្យអ្នកដំណើរពីរនាក់ ត្រូវរងរបួសស្រាល។ គ្រាប់បែកឆៃ្នទាំងពីរគ្រាប់នេះ ត្រូវបានគេបង្កប់លាក់នៅពីខាងក្រោយប្រដាប់កែកម្លាំងអគ្គីសនីឬត្រង់ស្វ័រម៉ាទ័រ នេះបើតាមការអះអាងរបស់ប៉ូលីសថៃ បា្រប់ដល់ទីភ្នាក់ងារព័ត៌មានបារាំង AFP។
ក្នុងពេលនេះអាជ្ញាធរថៃ នៅមិនទាន់ស្រែកចោទប្រកាន់ទៅលើភាគីខាងណាមួយនៅឡើយទេ ក៏ប៉ុន្តែរដ្ឋមន្ត្រីក្រសួងមហាផ្ទៃ បានអះអាងបញ្ជាក់ថា” ការផ្ទុះគ្រាប់បែកយប់មិញ គឺមានគោលដៅគ្រាន់តែបង្កនូវ ភាពវឹកវរនៅក្នុងប្រទេសតែប៉ុណ្ណោះ ។ ម្យ៉ាងទៀត អាជ្ញាធរថៃក៏មិនបានភ្ជាប់ហេតុការណ៍ម្សិលមិញទៅនឹងស្ថានភាពតានតឹងនៅខាងផ្នែកនយោបាយនាពេលបច្ចុប្បន្ននេះទេ។ ក៏ប៉ុន្តែ នៅខណៈនេះ របបសឹក កំពុងតែប្រឈមមុខនឹងការទិះតៀនរិះគន់ដែលកាន់តែមានច្រើនឡើងៗនៅក្នុងប្រទេស ជាពិសេសការមានៈរបស់អាជ្ញាធរថៃក្នុងការបន្តទុកច្បាប់អាជ្ញាសឹក ក្រោយពីរដ្ឋប្រហារយោធាកាលពីខែឧសភាកន្លងមក។
ច្បាប់អាជ្ញាសឹកដែលហាមប្រាម រាល់ការកែណប្រជុំគ្នាទាំងខាងផ្នែកនយោបាយនិងទាំងការទិះតៀនប្រឆាំងរដ្ឋប្រហារ។ លើសពីនេះ របបសឹក បានវាយបង្ក្រាបជាប់ មិនឲ្យមានការងើបប្រឆាំងណាមួយនៅក្នុងប្រទេសឡើយបើទោះបីជាមានទ្រង់ទ្រាយបែបណាក្តី។
ដោយឡែក យោងតាមរបាយការណ៍ដ៏សំខាន់របស់ក្រុមមេធាវីថៃ បំរើការនៅក្នុង អង្គការក្រៅរដ្ឋាភិបាលដែលចេញផ្សាយនៅថ្ងៃចន្ទនេះបានឲ្យដឹងថា “ចាប់តាំងពីរបបសឹក ក្តោបក្តាប់អំណាចនៅក្នុងប្រទេសមក មានជនយ៉ាងតិច ៦៦៦នាក់ ត្រូវបានពួកយោធា កោះហៅសួរចម្លើយ។ ចំណែកជនចំនួន ១៣៤ នាក់ទៀត ត្រូវបានចាប់ខ្លួននៅពេលធ្វើបាតុកម្មដោយសន្តិភាព រីឯ ជនយ៉ាងតិច ៣៦២ នាក់ផ្សេងទៀត-ត្រូវបានអាជ្ញាធរថៃចាប់ខ្លួនដោយមូលហេតុនយោបាយ។ ក្រៅពីនេះ ជនយ៉ាងតិច ៣៦នាក់ត្រូវជាប់បណ្តឹងរបស់តុលាការ ពីបទឧក្រឹដ្ឋកម្មប្រមាថព្រះចេស្តារាជ្យវង្សថៃ និងដែលអាចជាប់ពន្ធនាគាររហូតដល់១៥ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ