ថៃ៖របបសឹកគំរាមព្រមានប្រឆំាងរាល់បាតុកម្មគំាទ្រត្រកូលស្ហ៊ីណាវ៉ាត់
នៅរសៀលថ្ងៃអង្គារ ទី៦ មករា លោកប្រមុខរបបសឹកដែលកំពុងកាន់អំណាចក្នុងប្រទេសថៃសព្វថ្ងៃ ប្រាយុទ្ធ ចាន់អូចាបានព្រមានថា លោកនឹងចាត់វិធានការចាស់ដៃបង្រ្កាបលើបាតុកម្មគ្រប់រូបភាពដែលសំដៅគំាទ្រលោកស្រីនាយករដ្ឋមន្រ្តីធ្លាក់ពីអំណាចយីងឡាក់។ ការព្រមានរបស់មនុស្សខ្លំាងក្រុងបាងកកពេលនេះបានធ្វើឡើង ប៉ុន្មានថ្ងៃមុននឹងសភាបើកកិច្ចប្រជុំដើម្បីសិក្សាពីលទ្ធភាពរារំាងលោកស្រីយីងឡាក់មិនឲ្យធ្វើនយោបាយរយៈពេល ៥ឆ្នំា។
ចុះផ្សាយនៅថ្ងៃ៖
ស្តាប់ - ០២:១២
« គឺនឹងគ្មានក្បួនបាតុកម្មទេ ពួកគេមិនអាចធ្វើបាតុកម្មបានឡើយ » នេះជាការថ្លែងរបស់មនុស្សខ្លំាងក្រុងបាងកកលោកប្រាយុទ្ធ ចាន់អូចាដោយលោកបានលើកឡើងពីច្បាប់អាជ្ញាសឹកដែលបានចូលជាធរមានតំាងពីថ្ងៃរដ្ឋប្រហារយោធា ទី២២ ឧសភា ឆ្នំា ២០១៤។ គឺជាច្បាប់ដែលហាមមិនឲ្យមានការជួបជុំនយោបាយ។ ការថ្លែងព្រមានរបស់លោកចាន់អូចាពេលនេះបានធ្វើឡើង ២ថ្ងៃ មុនសភាផ្តើមសិក្សាពិនិត្យពីលទ្ធភាពក្នុងការរារំាងលោកស្រីអតីតនាយករដ្ឋមន្រ្តីយីងឡាក់មិនឲ្យធ្វើនយោបាយរយៈពេល ៥ឆ្នំា។ តាមគម្រោង សភានឹងត្រូវអនុម័តលើសេចក្តីសម្រេចចិត្តមួយនៅមុនដំណាច់ខែមករានេះ។ បើយោងតាមអនុប្រធានរដ្ឋសភា គឺក្នុងរង្វង់ថ្ងៃទី២២ ឬ ២៣ មករា។ តែរដ្ឋអំណាចកំពុងបារម្ភពីការផ្ទុះចេញនូវក្បួនបាតុកម្មគំាទ្រត្រកូលស្ហ៊ីណាវ៉ាត់ និយាយជារួម និងលោកស្រីយីងឡាក់ និយាយដោយឡែក។ តែឧត្តមសេនីយចាន់អូចាបានព្រមានទុកជាមុនថា បើពួកគេមិនគោរពសេចក្តីសម្រេចរបស់រដ្ឋសភា និងហ៊ានចុះផ្លូវធ្វើបាតុកម្ម រដ្ឋអំណាចនឹងចាត់វិធានការចាស់ដៃ។
ក្រុមមេធាវីការពារលោកស្រីយីងឡាក់បានប្រកាសឲ្យដឹងថា លោកស្រីយីងឡាក់នឹងទៅកាន់រដ្ឋសភានៅព្រឹកថ្ងៃសុក្រ ទី៩ មករាដើម្បីការពារខ្លួន។ គឺជាអន្តរាគមន៍ដែលគ្រប់គ្នាកំពុងទន្ទឹងរង់ចំា បន្ទាប់ពីលោកស្រីបានស្ថិតនៅស្ងៀមស្ងាត់អស់រយៈពេលជាច្រើនខែកន្លងមក។ អ្នកវិភាគជនជាតិថៃម្នាក់នៅសកលវិទ្យាល័យក្រុងក្យូតូ ប្រទេសជប៉ុនបានគូសបញ្ជាក់ថា បើរបបសឹកចង់កំចាត់លោកស្រីយីងឡាក់ចេញពីឆាកនយោបាយ គឺគេអាចធ្វើបាន តែទន្ទឹមគ្នានេះ របបសឹកក៏ដឹងថា មិនមែនជារឿងងាយស្រួលប៉ុន្មានទេ ដោយសារតែលោកស្រីយីងឡាក់នៅតែមានកម្រិតប្រជាប្រិយភាពខ្ពស់។
គួររម្លឹកជូនឡើងវិញថា នីតិវិធីប្រឆំាងលោកស្រីយីងឡាក់នៅរដ្ឋសភាពេលនេះបានធ្វើឡើង ក្រោយពីគណៈកម្មការប្រឆំាងអំពើពុករលួយបានចោទលោកស្រីយីងឡាក់ពេលលោកស្រីកាន់អំណាចពីបទធ្វេសប្រហែសនៅក្នុងកម្មវិធីឧបត្ថម្ភធនដល់ប្រជាកសិករដោយរដ្ឋយល់ព្រមទិញអង្ករក្នុងតម្លៃថ្លៃជាងតម្លៃទីផ្សាររហូតដល់ទៅ ៥០%។ យ៉ាងណាក៏ដោយ នីតិវិធីប្រឆំាងលោកស្រីយីងឡាក់ពីសំណាក់របបសឹកពេលនេះ ជាសក្ខីកម្មបន្ថែមដែលបញ្ជាក់ពីការពុះចែកសង្គមថៃកាន់តែជ្រៅរវាងក្រុមអ្នកគំាទ្រ និងក្រុមអ្នកប្រឆំាងនឹងត្រកូលស្ហ៊ីណាវ៉ាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ