ក្រុមអ្នកមុជទឹកឥណ្ឌូណេស៊ី កំពុងរុករកសាកសពថ្មីៗទៀតនៅក្នុងគ្រោះថ្នាក់ធ្លាក់យន្តហោះAir Asia
ក្រុមអ្នកមុជទឹកឥណ្ឌូណេស៊ី បានចាប់ផ្តើមធ្វើការងារពិនិត្យពិច្ច័យយ៉ាងមធ្យ័តបំផុតនៅថ្ងៃព្រហស្បតិ៍នេះ នៅទីកន្លែងដែលមានតួយន្តហោះ AirAsia ក្នុងក្តីរំពឹងរកឃើញសាកសពជនរងគ្រោះថ្មីៗទៀត ដែលមកទល់ពេលនេះ គេទើបស្រង់បាន៥០នាក់ប៉ុណ្ណោះ។សូមរំលឹកថា យន្តហោះ AirAsia ដែលដឹកអ្នកដំណើរ១៦២នាក់ បានទទួលរងគ្រោះធ្លាក់ចូលសមុទ្រកាលពីថ្ងៃ២៨ធ្នូកន្លងទៅនិងបណ្តាលឲ្យអ្នកជិះលើយន្តហោះស្លាប់ទាំងអស់គ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
បន្ទាប់ពីប្រតិបត្តិការតាមស្វែងរកសាកសពអ្នកជិះយន្តហោះ AirAsia អស់រយៈពេលជាច្រើនថ្ងៃប្រឈមនឹងអាកាសធាតុមិនអំណោយផល នៅទីបំផុត នាវាធំនៃកងទ័ពជើងទឹកសិង្ហបូរី បានកំណត់រកឃើញទីកន្លែងដែលមានតួយន្តហោះ AirAsia នៅថ្ងៃពុធម្សិលមិញ។
ក្រុមអ្នកមុជទឹកសមុទ្រមុនគេ១៥រូប បានមុជចុះទៅបាតសមុទ្រនៅថ្ងៃព្រហស្បតិ៍នេះ ដើម្បីពិនិត្យរុករកកន្លែងតួយន្តហោះ។ ជាបឋម ក្រុមនេះ នឹងធ្វើការវាយតម្លៃចំនួនសាកសពជនរងគ្រោះដែលកំពុងតែនៅជាប់ក្នុងតួយន្តហោះ AirAsia-នេះជាការថ្លែងបញ្ជាក់របស់ អ្នកទទួលខុសត្រូវឥណ្ឌូណេស៊ីមា្នក់នៃទីភ្នាក់ងារស្រាវជ្រាវនិងសង្គ្រោះក្នុងសោកនាដកម្មធ្លាក់យន្តហោះ AirAsia ។
ក្រុមអ្នកមុជទឹកសមុទ្រថ្មីមួយក្រុមទៀតដែលមានគ្នាជាង១០០នាក់នឹងមកចូលរួមការងារជាមួយក្រុមទីមួយដើម្បីប្រមែប្រមូលស្រង់សាកសពចេញពីទឹកសមុទ្រ ដោយរំពឹងទុកថា ពួកគេអាចនឹងស្រង់យកបានសាកសពយ៉ាងច្រើន បើអាចធ្វើទៅរួច។ មកដល់ពេលនេះ គេទើបនឹងស្រង់បានសាកសពជនរងគ្រោះចំនួនតែ៥០នាក់ប៉ុណ្ណោះ។
អ្នកទទួលខុសត្រូវនៃទីភ្នាក់ងារស្រាវជ្រាវនិងជំនួយសង្គ្រោះខាងចាត់ចែងការងារនៅក្នុងសោកនាដកម្ម បានបញ្ជាក់ទៀតថា « ប្រសិនបើ ក្រុមអ្នកមុជទឹកសមុទ្រ យល់ថាពួកគេមានការពិបាកខ្លាំងក្នុងការប្រមែប្រមូលសាកសពចេញពីទឹកសមុទ្រ ក្រុមជំនួយសង្គ្រោះ អាចនឹងធ្វើការប៉ុនប៉ងស្រង់យកតួយន្តហោះទាំងមូលតែម្តងដែលមានប្រវែង២៦ម៉ែត្រចេញពីទឹកសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ