ប្រអប់ខ្មៅរបស់យន្តហោះ Air Asia ត្រូវបានស្រង់ចេញពីសមុទ្រ
ប្រអប់ខ្មៅ សម្រាប់ថតទិន្នន័យជើងហោះហើរ របស់ យន្តហោះAirAsia ត្រូវបានគេស្រង់ចេញមកហើយ នៅព្រឹកថ្ងៃចន្ទនេះ។ ប្រអប់ខ្មៅថតទិន្នន័យជើងហោះហើរនេះគឺជាផ្នែកមួយនៃប្រអប់ខ្មៅ ដែលថតរាល់ទិន្នន័យហោះហើរទាំងអស់របស់រយន្តហោះ ហើយអី្វដែលក្រុមអ្នកជួយសង្គ្រោះកំពុងស្វែងរកបន្ថែមទៀតនោះគឺ ជាប្រអប់ខ្មៅ សម្រាប់ថតសំលេង ក្នុងបន្ទប់បើកបរយន្តហោះ ឬជាភាសាអង់គ្លេសហៅថា ‘’Cockpit voice recorder។ នេះបើតាមការឲ្យដឹងពីប្រធានក្រុមស្វែងរក និងជួយសង្គ្រោះជាតិ របស់ឥណ្ឌូនេស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
នៅថ្ងៃចន្ទទី១២មករានេះ ឧបករណ៍ថតទិន្នន័យជើងហោះហើរ របស់យន្តហោះ AirAsia ត្រូវបានក្រុមអ្នកមុជទឹកនៃកងទ័ពជើងទឹកឥណ្ឌូណេស៊ីស្រង់ចេញពីបាតសមុទ្រ ជម្រៅប្រមាណជាង ៣០ម៉ែត្រ។ សូមបញ្ជាក់ថាឧបករណ៍ថតទិន្នន័យជើងហោះហើរនេះ គឺជាផ្នែកមួយនៃប្រអប់ខ្មៅ ដែលថតរាល់ទិន្នន័យហោះហើរទាំងអស់របស់យន្តហោះ។
ការស្វែងរកប្រអប់ខ្មៅ ដែលបានចំណាយពេលអស់រយៈពេល២សប្តាហ៍ ហើយត្រូវជួបប្រទះនឹងភាព ស្មុគស្មាញយ៉ាងច្រើន ដោយសារតែស្ថានភាពអាកាសធាតុ មិនអំណោយផល នៅពេលនេះ បានចាប់ផ្តើមមានពន្លឺនៃក្តីសង្ឃឹមហើយ។ ក្តីសង្ឃឹម ដោយសារតែនៅព្រឹកថ្ងៃចន្ទនេះ ក្រុមអ្នករុករក អាចស្រង់បានផ្នែកមួយនៃប្រអប់ខ្មៅ របស់យន្តហោះ AirAsia ដែលបានធ្លាក់ នោះគឺឧបករណ៍សម្រាប់ថតទិន្នន័យជើងហោះហើរ របស់យន្តហោះនេះ។
ការរកឃើញនេះ អាចផ្ដល់ពន្លឺខ្លះដល់ការស្រាវជ្រាវពីមូលហេតុនៃការធ្លាក់របស់យន្តហោះ AirAsia នេះបាន។ យ៉ាងណាក៏ដោយ ក្រុមអ្នកជ្រមុជទឹក នៅតែបន្តប្រតិបត្តិការស្វែងរករបស់ខ្លួនតទៅទៀត នោះគឺជាឧបករណ៍ថតសំលេងក្នុងបន្ទប់បើកបរយន្តហោះ Cockpit Voice Recorder។
គួរជម្រាបជូនថា ជាទូទៅ គ្រប់យន្តហោះដឹកអ្នកដំណើរទាំងអស់តែងតែមានប្រអប់ខ្មៅចំនួនពីរ គឺប្រអប់ខ្មៅមួយ សម្រាប់ថតសំឡេង នៅក្នុងបន្ទប់បើកបរ និងប្រអប់ខ្មៅមួយទៀត សម្រាប់ថតទិន្នន័យសំខាន់ៗទាក់ទងនឹងការហោះហើររបស់យន្តហោះ។ ប្រអប់ខ្មៅទាំងពីរនេះ ដែលតាមពិតមានពណ៌ទឹកក្រូច គឺជាឧបករណ៍ដ៏សំខាន់បំផុត សម្រាប់ការស៊ើបអង្កេតរកឲ្យឃើញនូវលក្ខខណ្ឌ និងមូលហេតុ ដែលនាំឲ្យយន្តហោះ AirAsia ជើងហោះហើរលេខ QZ8501ត្រូវធ្លាក់ នៅពាក់កណ្តាលផ្លូវ ក្នុងពេលកំពុងហោះហើរពីឥណ្ឌូណេស៊ី ទៅកាន់សិង្ហបុរី កាលពីថ្ងៃអាទិត្យ ទី២៨ធ្នូ ឆ្នាំ២០១៤ កន្លងទៅ។
គិតត្រឹមល្ងាចថ្ងៃអាទិត្យម្សិលមិញ នៅក្នុងប្រតិបត្តិការស្វែងរកយន្តហោះ ដែលមានការចូលរួមពីសំណាក់នាវាមុជទឹកមកពីប្រទេសជាច្រើន រួមមានទាំងអាមេរិក និងចិនផងនោះ គេបានរកឃើញ និងស្រង់ចេញពីទឹកនូវសាកសពអ្នកដំណើរចំនួន ៤៨នាក់ ក្នុងចំណោមអ្នកដំណើរទាំង ១៦២នាក់។ មន្ត្រីជាន់ខ្ពស់ឥណ្ឌូណេស៊ីបានអះអាងថា សាកសពភាគច្រើនទំនងជាជាប់នៅក្នុងតួយន្តហោះ ដែលគេទើបនឹងរកឃើញជាមួយប្រអប់ខ្មៅ នៅថ្ងៃអាទិត្យនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ