ន័រវែសរំលើករឿងសម្លាប់រង្គាលពួកឧទ្ទាមតាមូលនៅសេរីលង្កា
មេដឹកនាំរបស់ចលនាឧទ្ទាមខ្លារំដោះអេឡាំតាមូល ត្រូវបានទាហានរដ្ឋាភិបាលប្រហារជីវិត នៅខែឧសភា ឆ្នាំ ២០០៩ កន្លងទៅ ក្នុងពេលដែលប្រទេសន័រវែស អតីតប្រទេសអន្តរការីទទួលបន្ទុកដោះស្រាយជម្លោះនៅសេរីលង្កា បានបញ្ចុះបញ្ចូលឲ្យពួកឧទ្ទាមទម្លាក់អាវុធចុះចូលដោយសម្រួល។ នេះបើយោងតាមការអះអាងរបស់អ្នកនយោបាយជាន់ខ្ពស់ន័រវែសទៅកាន់ សារព័ត៌មានសេរីលង្កា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
“មេឧទ្ទាមតាមូល ត្រូវបានកងទ័ពរដ្ឋាភិបាលសម្លាប់ បន្ទាប់ពីបានសុំចុះចូល”! ការចោទប្រកាន់នេះ ត្រូវបានអង្គការការពារសិទ្ធិមនុស្ស ចាប់សើរើមើលឡើងវិញ និងត្រូវបានរដ្ឋមន្ត្រីក្រសួងអភិវឌ្ឍន៍អន្តរជាតិ ចាប់អារម្មណ៍បន្ថែមនៅថ្ងៃអាទិត្យទី ២៧ មិថុនា ឆ្នាំ២០១០ ម្សិលមិញ។
រដ្ឋមន្រ្តីន័រវែស បានអះអាងទៅកាន់អ្នកយកព័ត៌មានសេរីលង្កា ដែលកំពុងស្ថិតក្នុងក្រុងអូស្លូ ប្រទេសន័រវែសថា កាលពីខែឧសភា ឆ្នាំ ២០០៩ ន័រវែស បានខិតខំធ្វើគ្រប់បែបយ៉ាងដើម្បីបញ្ចុះបញ្ចូលពួកឧទ្ទាមតាមូលឲ្យចុះចាញ់ ដោយសម្រួល។ ប៉ុន្តែពីរបីម៉ោងក្រោយមក ស្រាប់តែគេឲ្យដំណឹងមកលោកថា មេដឹកនាំដដែលទាំងនោះត្រូវបានកងទ័ពសេរីលង្កាប្រហារជីវិត។
ក្នុងន័យនេះ ប្រទេសន័រវែសចង់រំលឹកបញ្ជាក់ ពីចេតនារបស់ន័រវែស បានរៀបចំឲ្យមេដឹកនាំពួកឧទ្ទាមតាមូលទាំងអស់ព្រមចុះចាញ់ដោយសន្តិវិធី ប៉ុន្តែមេបញ្ជាការកងទ័ពរដ្ឋាភិបាលសេរីលង្កាបានច្រានចោលសំណើប្រទេសន័រវែសទៅវិញ។ ដោយជ្រើសរើសការប្រើកម្លាំង យោធាសេរីលង្កាបានប្រកាសពីជ័យជំនះរបស់ខ្លួនលើពួកឧទ្ទាម និងបានប្រកាសបិទបញ្ចប់រាល់ការប៉ុនប៉ងទាមទារចង់ផ្តាច់ទឹកដីពីសំណាក់ពួកតាមូល។
ប្រសាសន៍របស់លោករដ្ឋមន្រ្តីនៅថ្ងៃម្សិលមិញនេះ បានធ្វើឲ្យគេគិតថា ជោគជ័យរបស់កងទ័ពរដ្ឋាភិបាលសេរីលង្កា បានរំលោភសិទ្ធិមនុស្សយ៉ាងធ្ងន់ធ្ងរ។ ហើយដើម្បីទទួលបានពន្លឺយុត្តិធម៌ ទើបលោកអគ្គលេខាធិការអង្គការសហប្រជាជាតិ បាន គីមូន បានប្រកាសតែងតាំងកាលពីថ្ងៃអង្គារសប្តាហ៍មុន អ្នកអង្កេតការណ៍បីរូបឲ្យធ្វើការនៅសេរីលង្កា ប៉ុន្តែបេសកជនទាំងបីរូបនេះ មិនត្រូវបានរដ្ឋាភិបាលសេរីលង្កាអនុញ្ញាតឲ្យចូលក្នុងទឹកដីសេរីលង្កាទេ នាពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ