ធនាគារពិភពលោកព្រមានពីការកើនឡើងតម្លៃរូបិយវត្ថុក្នុងតំបន់អាស៊ី
នៅថ្ងៃអង្គារ ទី១៩ តុលានេះ ធនាគារពិភពលោកបានទាញសញ្ញាអាសន្នស្តីពីការកើនឡើងនូវតម្លៃរូបិយវត្ថុនៅក្នុងបណ្តាប្រទេសអាស៊ីមួយចំនួន។ បើយោងតាមធនាគារពិភពលោក កំណើនតម្លៃរូបិយវត្ថុដែលនឹងអាចគំរាមលើវិស័យនំាចេញ និងធ្វើឲ្យប៉ះពាល់ដល់កំណើនសេដ្ឋកិច្ចពិភពលោក។
ចុះផ្សាយនៅថ្ងៃ៖
សេចក្តីរាយការណ៍របស់ គួច គន្ធារ៉ា
ដោយមិននិយាយពីប្រទេសកូរ៉េខាងត្បូង និងជប៉ុន ធនាគារពិភពលោកបានសម្តែងការព្រួយបារម្ភពីកំណើនតម្លៃរូបិយវត្ថុនៅក្នុងបណ្តាប្រទេសអាស៊ីជាទូទៅ ពិសេសប្រទេសអាស៊ីបូព៌ា។ នៅក្នុងរបាយការណ៍មួយស្តីពីស្ថានភាពសេដ្ឋកិច្ចនៅអាស៊ីបូព៌ាចេញផ្សាយថ្ងៃអង្គារ ទី១៩ តុលានេះ ធនាគារពិភពលោកបានពន្យល់បកស្រាយពីការកើនឡើងតម្លៃរូបិយវត្ថុក្នុងស្រុក ដែលបណ្តាលមកពីមានការហូរចូលមូលធនបរទេសយ៉ាងច្រើនសម្បើម។
ការហូរចូលមូលធនបរទេសយ៉ាងច្រើនសម្បើមទៅក្នុងប្រទេសអាស៊ី ដោយសារតែអត្រាការប្រាក់នៅក្នុងបណ្តាប្រទេសកំពុងអភិវឌ្ឍន៍មានតម្លៃទាប និងក្រុមអ្នកវិនិយោគមានទំនុកទុកចិត្តលើស្ថានភាពសុខភាពសេដ្ឋកិច្ចនៅអាស៊ី ជាងនៅក្នុងប្រទេសផ្សេងទៀត។
យោងតាមធនាគារពិភពលោក ការហូរចូលមូលធនបរទេសយ៉ាងច្រើនសម្បើមទៅក្នុងប្រទេសអាស៊ីនារយៈពេលប៉ុន្មានឆ្នំាចុងក្រោយនេះ បានធ្វើឲ្យតម្លៃរូបិយវត្ថុក្នុងតំបន់អាស៊ីកើនពី ១០ ទៅ ១៥% បើប្រៀបនឹងមុនពេលមានវិបត្តិសេដ្ឋកិច្ចពិភពលោកក្នុងឆ្នំា ២០០៨។
នៅក្នុងចំណោមរូបិយវត្ថុនៅអាស៊ីបូព៌ា ធនាគារពិភពលោកបានលើកឡើងនូវតម្លៃប្រាក់យ័នរបស់ចិនដែលបានកើនប្រមាណ ៤% បើប្រៀបនឹងតម្លៃរូបិយវត្ថុនៃប្រទេសដៃគូពាណិជ្ជកម្មរបស់ចិន គិតតំាងពីដើមឆ្នំា ២០១០។
សហរដ្ឋអាមេរិកតែងតែបានចោទប្រទេសចិនថា បានលូកដៃចូលអន្តរាគមន៍ទប់កុំឲ្យប្រាក់យ័នរបស់ខ្លួនឡើង ចុះទៅតាមតម្លៃទីផ្សារ។ ចំណែកអ្នកខ្លះទៀតយល់ឃើញថា ការដែលមានប្រទេសខ្លះព្យាយាមរក្សាតម្លៃប្រាក់របស់ខ្លួនឲ្យនៅទាបជាងតម្លៃទីផ្សារ ក្នុងបំណងបង្កើនលើវិស័យនំាចេញរបស់ខ្លួននោះ នឹងនំាឲ្យផ្ទុះចេញនូវសង្រ្គាមរូបិយវត្ថុក្នុងពិភពលោកនៅថ្ងៃណាមួយជាមិនខាន។
ធនាគារពិភពលោកបានកត់សម្គាល់ឃើញថា ស្ថានភាពនៃវិស័យនំាចេញក្នុងតំបន់អាស៊ីបូព៌ានៅតែល្អ តែការដែលមានប្រទេសមួយចំនួនបន្តលូកដៃចូលអន្តរាគមន៍ទប់កុំឲ្យប្រាក់របស់ខ្លួនឡើង ចុះទៅតាមតម្លៃទីផ្សារនោះ នឹងអាចនំាឲ្យកំណើនសេដ្ឋកិច្ចរបស់ប្រទេសនោះថយចុះ ដែលជាឧបសគ្កចំពោះការងើបឡើងវិញនៃកំណើនសេដ្ឋកិច្ចពិភពលោក។
បច្ចុប្បន្ននេះ បណ្តាប្រទេសនៅអាស៊ីអាគ្នេយ៍ និងប្រទេសចិនត្រូវបានគេចាត់ទុកជាក្បាលរថភ្លើងអូសទាញសេដ្ឋកិច្ចពិភពលោក ជាមួយនឹងអត្រាកំណើនសេដ្ឋកិច្ចប្រមាណជា ៨,៩% ក្នុងឆ្នំា ២០១០។ ទោះបីយ៉ាងនេះក្តី ធនាគារពិភពលោកបានអំពាវនាវឲ្យគ្រប់ប្រទេសទំាងអស់នៅក្នុងតំបន់ រួមសហការគ្នាដើម្បីស្វែងរកដំណោះស្រាយរួម។
យ៉ាងណាក៏ដោយ សំណុំរឿងអត្រាប្តូរប្រាក់ត្រូវបានគេចាត់ទុកជាប្រធានបទមួយ នៅក្នុងរបៀបវារៈនៃជំនួបកំពូល G២០នៃបណ្តាប្រទេសមហាអំណាចសេដ្ឋកិច្ចពិភពលោក និងបណ្តាប្រទេសដែលកំពុងមានសេដ្ឋកិច្ចជឿនលឿនដែលគ្រោងរៀបចំនៅក្នុងប្រទេសកូរ៉េខាងត្បូងនាខែវិច្ឆិកាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ