តំណាងរាស្រ្តថៃម្នាក់នៃគណបក្សភឿថៃដែលស្និទ្ធនឹងលោក ថាក់ស៊ីន ទទួលរងការបាញ់ប្រហារ
នៅយប់ថ្ងៃអង្គារ ទី១០ ឧសភាម្សិលមិញ លោក ប្រាឆា ប្រាសូបឌី តំណាងរាស្ត្រម្នាក់នៃគណបក្សភឿថៃដែលស្និទ្ធនឹងលោកអតីតនាយករដ្ឋមន្រ្តីថៃ ថាក់ស៊ីន ត្រូវបានជនប្រដាប់អាវុធ ២នាក់ជិះម៉ូតូបាញ់ទៅលើរថយន្តដែលលោកកំពុងជិះ។ លោក ប្រាឆា ប្រាសូបឌី បានត្រូវរបួសចំខ្នង និងកំពុងសម្រាកព្យាបាលក្នុងមន្ទីរពេទ្យ។ ខណៈនេះ ប៉ូលិសកំពុងបើកការស៊ើបអង្កេតមួយដើម្បីចង់ដឹងថា តើរឿងនេះ ជារឿងផ្ទាល់ខ្លួន ឬមួយក៏ជារឿងនយោបាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
សរុបទៅ មានគ្រាប់កំាភ្លើងចំនួន ៩គ្រាប់ដែលជនប្រដាប់អាវុធទំាង ២នាក់បានបាញ់ទៅលើរថយន្តដែលលោក ប្រាឆា ប្រាសូបឌីកំពុងជិះ តែមាន១គ្រាប់គត់ដែលលោកបានទទួលនៅចំកណ្តាលខ្នង។ ឧប្បត្តិហេតុនេះបានកើតមានឡើងនៅក្នុងខេត្ត សាមុត ប្រាកន ខេត្តមួយស្ថិតនៅជាយក្រុងបាងកក និងដែលលោក ប្រាឆា ប្រាសូបឌីជាតំណាងរាស្រ្តនៃគណបក្សភឿថៃប្រចំាមណ្ឌលនោះ។ នៅថ្ងៃនេះ មន្រ្តីនគរបាលប្រចំាខេត្តសាមុត ប្រាកនបានបញ្ជាក់ថា គេនៅមិនទាន់ដឹងពីមូលហេតុនៃការបាញ់ប្រហារទៅលើតំណាងរាស្រ្តរូបនោះនៅឡើយទេ ពិសេសថាតើវាជារឿងផ្ទាល់ខ្លួន ឬមួយជារឿងនយោបាយ។ អ្វីដែលគេដឹង អំពើហិង្សាលើអ្នកនយោបាយនៃបក្សប្រឆំាងពេលនេះបានកើតមានឡើង បន្ទាប់ពីរដ្ឋាភិបាលក្រុងបាងកកបានប្រកាសរំលាយរដ្ឋសភាកាលពី២ថ្ងៃមុន និងគ្រោងរៀបចំការបោះឆ្នោតសភាមុនកាលកំណត់នៅថ្ងៃទី ៣ កក្កដាខាងមុខ។
អ្នកនំាពាក្យនៃគណបក្សភឿថៃបានអះអាងថា លោក ប្រាឆា ប្រាសូបឌីក៏មានបំណងឈរឈ្មោះជាថ្មីនៅក្នុងខេត្តសាមុត ប្រាកនដែរ តែអ្នកនំាពាក្យនៃគណបក្សភឿថៃរូបនេះនៅមិនទាន់ហ៊ានសន្និដ្ឋានទេ ថាតើការវាយប្រហារលើរូបលោក ប្រាឆា ប្រាសូបឌី មានជាប់ពាក់ព័ន្ធនឹងរឿងនយោបាយនោះ ឬទេ ?។ តែលោក ស៊ូថេប ថូស៊ូបាន ឧបនាយករដ្ឋមន្រ្តីទទួលបន្ទុកផ្នែកសន្តិសុខជាតិបានលើកឡើងពីមូលហេតុនយោបាយ។ មូលហេតុនយោបាយដែលលោក ស៊ូថេប ថូស៊ូបាន នៅមិនទាន់ដឹងថា តើវាជាប់ពាក់ព័ន្ធនឹងនយោបាយថ្នាក់ជាតិ ឬថ្នាក់ខេត្តនោះទេ។
យ៉ាងណាក៏ដោយ ចាប់ពីពេលនេះ ដល់ថ្ងៃរៀបចំបោះឆ្នោត លោក ស៊ូថេប ថូស៊ូបាន បានដាក់ចេញនូវវិធានការមួយចំនួនដល់កម្លំាងប៉ូលិស ដើម្បីពង្រឹងសន្តិសុខបន្ថែមនៅតាមបណ្តាខេត្តមួយចំនួន និងបង្កើនបន្ថែម ការ ការពារសុវត្ថិភាពដល់អ្នកនយោបាយ។
ជាង ១ខែ មុនការបោះឆ្នោតឈានចូលមកដល់ មានគណបក្សពីរដែលកំពុងប្រជែងគ្នា គឺគណបក្សភឿថៃ ដែលជាគណបក្សប្រឆំាងដឹកនំាដោយក្រុមជំនិតរបស់លោកអតីតនាយករដ្ឋមន្រ្តីថៃ ថាក់ស៊ីន កំពុងភៀសខ្លួនរស់នៅបរទេស និងគណបក្សប្រជាធិបតេយ្យរបស់លោកនាយករដ្ឋមន្រ្តី អាប់ភីស៊ីតបច្ចុប្បន្ន។ បើយោងតាមលទ្ធផលនៃការស្ទង់មតិមួយចំនួនឲ្យដឹងថា គណបក្សភឿថៃអាចនឹងឈ្នះគណបក្សប្រជាធិបតេយ្យ។ គណបក្សប្រជាធិបតេយ្យរបស់លោក អាប់ភីស៊ីតដែលមិនធ្លាប់បានឈ្នះឆ្នោតជាផ្លូវការម្តងណាទេ តំាងពីជិត ២០ឆ្នំាកន្លងទៅនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ