ប្រមុខយោធាថៃប្តឹងមេដឹកនាំក្រុមអាវក្រហមពីបទជេរប្រមាថព្រះមហាក្សត្រ
នៅពេលយុទ្ធនាការឃោសនាបោះឆ្នោត កាន់តែខិតចូលមកដល់ ប្រមុខដឹកនាំយោធាថៃ លោកឧត្តមសេនីយ ប្រាយុត ចាន់អូចា បានព្រមាន នៅថ្ងៃពុធម្សិលមិញ ហាមមិនឲ្យគណបក្សនយោបាយថៃទាំងអស់ យកព្រះមហាក្សត្រថៃទៅនិយាយលូកឡំក្នុងការសួរដេញដោលនយោបាយ។ ក្នុងប្រទេសថៃ រាជានិយម គឺជារឿងដ៏រសើបបំផុត។ យោងតាមច្បាប់ព្រហ្មទណ្ឌថៃ អ្នកដែលហ៊ាននិយាយ ប៉ះពាល់ ឬប្រមាថព្រះចេស្តាព្រះមហាក្សត្រត្រូវកាត់ទោសជាប់គុក១៥ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
រាជានិយម គឺជាស្ថាប័នដែលខ្ពស់ជាងគេបំផុត និងខ្ពស់ នៅពីលើជម្លោះនយោបាយនានា ក្នុងប្រទេស។ ដូច្នេះ គណបក្សនយោបាយទាំងអស់មិនត្រូវយករាជានិយមទៅលូកឡំ ក្នុងយុទ្ធនាការឃោសនារកសំឡេងឆ្នោតរបស់ខ្លួនទេ។ និយាយឲ្យចំ គ្រប់គណបក្សទាំងអស់មិនត្រូវយកព្រះមហាក្សត្រមកធ្វើជាប្រធានបទ ដើម្បីនិយាយតសំដីគ្នា នោះទេ។ នេះជាការនិយាយព្រមានទុកមុនរបស់លោកឧត្តមសេនីយ ប្រាយុត ចាន់ អូចា។ ប្រមុខដឹកនាំយោធាថៃរូបនេះ បានបញ្ជាក់ថា កងទ័ពដែលស្ម័គ្រស្មោះ ដើរតាមព្រះរាជបល្ល័ង្ក នឹងចាត់គ្រប់វិធានការដើម្បីការពារមិនឲ្យមានការនិយាយប្រមាថព្រះចេស្តាព្រះមហាក្សត្រ។
ឧត្តមសេនីយប្រាយុត ចាន់អូចា អះអាងថា វិធាននេះមិនមែនធ្វើឡើងក្នុងហេតុផលនយោបាយទេ។ ប៉ុន្តែ គួរដឹងថា កាលពីសប្តាហ៍មុន ប្រមុខយោធាថៃបានធ្វើពាក្យបណ្តឹង រួចហើយ ប្តឹងមេដឹកនាំក្រុមអាវក្រហមបីនាក់ ពីបទនិយាយប៉ះពាល់ដល់ព្រះមហាក្សត្រ ក្នុងអំឡុងបាតុកម្មតវ៉ារបស់ពួកគេ កាលពីឆ្នាំមុន នៅទីក្រុងបាងកក។
កាលពីថ្ងៃអង្គារអាជ្ញាធរថៃបានកោះហៅមេដឹកនាំអាវក្រហម១៨នាក់ មកទទួលដឹងលឺពីការចោទប្រកាន់ទៅលើពួកគេ ពីបទចង់ធ្វើការរើបម្រះ និងប្រមាថរាជានិយម។
គណបក្សរណសិរ្សរួបរួមដើម្បីប្រជាធិបតេយ្យ និងប្រឆាំងរបបផ្តាច់កា ដែលគេស្គាល់ថា ជាអ្នកដឹកនាំចលនាក្រុមអាវក្រហម នៅក្នុងបាតុកម្មឆ្នាំមុន បានបដិសេធ និងថា គណបក្សមិនបានធ្វើអត្ថាធិប្បាយណាមួយ ប៉ះពាល់ដល់ព្រះមហាក្សត្រ ឬគ្រួសាររាជវង្សទេ។ គណបក្សមានភស្តុតាងគ្រប់គ្រាន់ និងត្រៀមខ្លួន ទៅបញ្ជាក់ពីភាពស្អាតស្អំរបស់ខ្លួន នៅតុលាការ។ ដោយខ្លាចនិយាយប៉ះពាល់ដល់រាជានិយម អំណឹះតទៅ គណបក្សនឹងមិនចេញមុខធ្វើអត្ថាធិប្បាយ ទាក់ទងនឹងបណ្តឹងជេរប្រមាថព្រះមហាក្សត្រ។ នេះបើតាមការអះអាងរបស់លោកណាថាវុធ សៃគួ មេដឹកនាំក្រុមអាវក្រហម។
ក្នុងប្រទេសថៃ ការនិយាយប៉ះពាល់ដល់ព្រះមហាក្សត្រ និងគ្រួសាររាជវង្ស ត្រូវចាត់ទុកជាបទឧក្រិដ្ឋ។ គេបានរកឃើញថា ក្នុងរយៈពេល ២៥ឆ្នាំ ចុងក្រោយនេះ បទឧក្រិដ្ឋប្រមាថព្រះមហាក្សត្រថៃបានកើនឡើងពី ៣ករណី ទៅដល់ ១០០ករណី។ ថ្មីៗនេះ នៅក្នុងខេត្តរ៉ាក់យ៉ង អាជ្ញាធរបានចាប់យុវជន ថៃម្នាក់ ដែលបានធ្វើអត្ថាធិប្បាយស្តីពីរាជានិយម ក្នុងវិបសៃត៍ Facebook។ យុវជនខាងលើបាននិយាយថា ខ្លួនជាក្រុមអាវក្រហមដែលបានចូលរួមតវ៉ាក្នុងក្រុងបាងកក ប៉ុន្តែ ខ្លួនមិនបាននិយាយរិះគន់ព្រះមហាក្សត្រដូចការចោទប្រកាន់ឡើយ។
ទាំងគណបក្សប្រឆាំង និងអ្នកការពារសិទ្ធិមនុស្សថៃ បារម្ភថា អ្នកមានអំណាចឆ្លៀតប្រើប្រាស់ច្បាប់ប្រមាថព្រះមហាក្សត្រដើម្បីបង្រ្កាបអ្នកប្រឆាំងនឹងខ្លួន។ តុលាការ ឬអាជ្ញាធរប៉ូលិសកម្រនឹងធ្វើការស៊ើបអង្កេតល្អិតល្អន់ ព្រោះខ្លាចគេចោទបន្តថា មិនធ្វើការគោរពដល់ព្រះមហាក្សត្រ។ គួរជម្រាបជូនថា ក្នុងព្រះជន្ម ៨២ ព្រះវស្សា ព្រះមហាក្សត្រ ភូមិបុល អាឌុលយ៉ាដេត ប្រជារាស្រ្តថៃ គោរពកោតខ្លាចខ្លាំង និងចាត់ទុក ជាបុគ្គលពាក់កណ្តាលព្រះអាទិទេព។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ