តំបន់ដែលចិនលុកចូលយ៉ាងសកម្ម គឺ បេឡារុស្ស និង អ៊ុយក្រែន ដើម្បី ដណ្តើមយកឥទ្ធិពលពីរុស្ស៊ី តាមផ្លូវបញ្ចូលវិនិយោគ និង ផ្តល់ប្រាក់ឲ្យប្រទេសទាំងពីរខ្ចី “- នេះជាសេចក្តីសន្និដ្ឋានទាញយកដោយ ទស្សនាវដ្តីប្រចាំខែឈ្មោះ “VLAST” ប្រែមកថា ”អំណាច” លេខថ្ងៃនេះ ដែលចេញផ្សាយដោយ”បណ្ឌិតសភាវិទ្យាសាស្ត្ររុស្ស៊ី” ទាំង រំលឹកអំពី ដំណើរទស្សនកិច្ចប៉ុន្មានថ្ងៃមុន របស់ប្រធានរដ្ឋសភាចិន នៅប្រទេសបេឡារុស្ស និង ដោយ លើកយកមកចុះផ្សាយសំដី ពួកអ្នកការទូតចិនដែលថា ៖ មុខព្រួញនេះ ជាភាគមួយនៃ ”យុទ្ធសាស្ត្រយូរអង្វែង” របស់ចិន។
ចុះផ្សាយនៅថ្ងៃ៖ កែប្រែថ្ងៃទី៖
តាមទស្សនាវដ្តីរុស្ស៊ី “VLAST” នាកិច្ចចរចា ជាមួយលោកប្រធានាធិបតីបេឡារុស្ស Loukachenko លោកប្រធានរដ្ឋសភាចិន Wu Bangguo បានប្រកាសថា ទីក្រុងប៉េកាំងរំលែក ឥណទាន ទំហំ១.០០០លានដុល្លារអាមេរិក ឲ្យទៅបេឡារុស្សខ្ចី ក្នុងល័ក្ខខ័ណ្ឌធូរស្រាល ព្រមទាំង ប្រាក់ជំនួយ ៧០លានYuan ឫស្មើនឹង១១លាន$ សម្រាប់ពួកអ្នកប្រាជ្ញបេឡារុស្ស បំពេញការងារជាក់លាក់។
ចំពោះរឿងនេះ ប្រមុខរដ្ឋបេឡារុស្ស ថ្លែងដោយមោទនៈថា ៖ នៅនាទីណាក៏ដោយ ទីក្រុងប៉េកាំងជាមិត្ត តែងត្រៀមយក “ស្មាខ្លួន” ធ្វើជាបង្អែកគាំទ្រទីក្រុងMinsk។ គាត់សង្កត់ធ្ងន់ ថា “ ឥណទានដ៏ធូរថ្លៃ ទាំងពាន់ៗលានដុល្លារ និងវិនិយោគត្រង់ផ្ទាល់ ពីខាងចិន សព្វថ្ងៃ ជួយ ប្រកបដោយផ្លែផ្កា ដល់ការធ្វើទំនើបកម្មសេដ្ឋកិច្ចបេឡារុស្ស ដល់ការលើកយកមកអនុវត្ត នូវ បច្ចេកវិជ្ជាឈានមុខ។
ធនធានដែលរំលែកនេះ គឺ នឹងប្រើដើម្បីសង់ ស្ថានីយវារីអគ្គិសនី ដើម្បី កែឲ្យទំនើបឡើង រោងចក្រផលិតក្រដាស ព្រមទាំងដើម្បី បង្កើតប្រព័ន្ធផ្កាយរណបទូរគមនាគមន៍នៅបេឡារុស្ស។
ទន្ទឹមនឹងបេឡារុស្ស ប្រទេសអ៊ុយក្រែនក៏ស្ថិតនៅក្នុង មណ្ឌលនៃផលប្រយោជន៍ប្រទេសចិន ដែរ។ កាលពីខែមិថុនា លោកប្រធានាធិបតីចិន Hu Jintao ក្នុងដំណើរទស្សនកិច្ចថ្នាក់រដ្ឋ នៅអ៊ុយក្រែន បានចុះជាមួយលោកប្រធានាធិបតីអ៊ុយក្រែន Viktor Yanoukovitch គឺ ៖ សេចក្តីថ្លែងការណ៍រួម ដែលប្រកាសអ៊ុយក្រែនថាជា “ ដៃគូយុទ្ធសាស្ត្រ “ របស់ សាធារណរដ្ឋប្រជាមានិតចិន។ តាមការកត់សម្គាល់នៃទស្សនាវដ្តីរុស្ស៊ី “VLAST” ក្នុងចំណោមប្រទេសនៃអតីតសហភាពសូវៀត មានតែ រុស្ស៊ី និង កាហ្សាក់ស្ថានប៉ុណ្ណោះ ដែលជាដៃគូយុទ្ធសាស្ត្ររបស់ អ៊ុយក្រែន។
ស្របនិងកិច្ចសន្យាចុះកាលណោះ ចិនបញ្ចូលវិនិយោគ២.០០០លាន$ ទៅក្នុងការសង់ ខ្សែ ផ្លូវដែកសម្រាប់រថភ្លើងល្បឿនលឿន និង សំណង់នានានៃវិស័យថាមពលនៅអ៊ុយក្រែន។ ទីក្រុង Kiev ពីចំណែកខ្លួន ជួយពង្រឹងអានុភាពយោធារបស់ចិន។
មន្ត្រីមិនបញ្ចេញឈ្មោះ នៃក្រសួងការបរទេសចិន បានថ្លែងមកទស្សនាវដ្តីរុស្ស៊ី“VLAST” ថា ៖ ការដែលប៉េកាំងបន្តលុកចូល ក្នុងប្រទេសដែលរមែងត្រូវចាត់ទុក ជាតំបន់ក្រោមឥទ្ធិពលរុស្ស៊ី គឺជាភាគមួយនៃ “យុទ្ធសាស្ត្រយូរអង្វែង” របស់ចិន។ ប្រទេសបែបយ៉ាង បេឡារុស្ស អ៊ុយក្រែន ម៉ុលដាវី តែងត្រូវការនូវវិនិយោគកាន់តែច្រើនឡើងៗ ពីខាងចិន សម្រាប់ការអភិវឌ្ឍន៍ខ្លួន៕