អាហ្វហ្កានីស្ថានស្វែងរកជំនួយយុទ្ធសាស្ត្រពីឥណ្ឌាដើម្បីទប់ទល់នឹងប៉ាគីស្ថាន
លោកប្រធានាធិបតីអាហ្វហ្កានីស្ថានហាមីឌការហ្សៃបានអញ្ជើញទៅ តាំងពីថ្ងៃអង្គារទី៤តុលាដើម្បីបំពេញទស្សនកិច្ចចំនួនពីរថ្ងៃនៅ ប្រទេសឥណ្ឌា។ ទាំងនេះក៏ដោយហេតុតែទីក្រុងកាប៊ូលនិងទីក្រុងញីវដែលីចង់ពង្រឹងដៃគូ យុទ្ធសាស្ត្ររវាងអាហ្វហ្កានីស្ថាន និងឥណ្ឌាដើម្បីទប់ទល់នឹងប្រទេសប៉ាគីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
នេះជាលើកទីពីរហើយដែលលោកប្រធានាធិបតីអាហ្វហ្កានីស្ថានហាមីឌការហ្សៃបានអញ្ជើញទៅរដ្ឋធានីឥណ្ឌាដើម្បីសុំជំនួយពីសម្ព័ន្ធមិត្តរបស់ខ្លួនក្នុងខណៈដែលប្រទេសអាហ្វហ្កានីស្ថានកំពុងត្រូវធ្វើការប្រឈមមុខទល់នឹងអំពើហិង្សាដ៏សែនឃោរឃៅ។
ទស្សនកិច្ចរបស់លោកហាមីឌការហ្សៃនេះធ្លាក់ចំពេលដែលទំនាក់ទំនងរវាងប្រទេសប៉ាគីស្ថាន អាហ្វហ្កានីស្ថាននិងសហរដ្ឋអាមេរិកកំពុងធ្លាក់ចុះដុនដាប។ ទាំងនេះពីរសប្តាហ៍ក្រោយពីមានឃាតកម្មទៅលើរូបលោកអតីតប្រធានាធិបតីអាហ្វហ្កានីស្ថាន Rabbani ហើយនិងពីរខែក្រោយពីមានឃាតកម្មទៅលើរូបប្អូនប្រុសរបស់លោកប្រធានាធិបតីអាហ្វហ្កានីស្ថានហាមីឌការហ្សៃនិងទីប្រឹក្សារបស់លោក។
ឃាតកម្មទាំងនោះបានត្រូវទីក្រុងកាប៊ូលនិងទីក្រុងវ៉ាស៊ីនតោនសន្និដ្ឋានថាជាស្នាដៃរបស់ពួក Haqqani ដែលជាសម្ព័ន្ធមិត្តរបស់ពួកតាលីបង់ គាំទ្រដោយប្រទេសប៉ាគីស្ថាន។
គួរបញ្ជាក់ថា ដោយលង់ខ្លួនទៅក្នុងភាពច្របូកច្របល់ខ្លាំង ប្រទេសអាហ្វហ្កានីស្ថានកំពុងស្វែងរកជំនួយយុទ្ធសាស្ត្រពីសំណាក់ប្រទេសសម្ព័ន្ធមិត្តជិតខាងដ៏សំខាន់ពោលគឺប្រទេសឥណ្ឌា ដើម្បីទប់ទល់នឹងការប៉ុនប៉ងមកពីប្រទេសប៉ាគីស្ថាន ក្នុងបំណងធ្វើឲ្យប្រទេសអាហ្វហ្កានីស្ថានស្គាល់អស្ថិរភាព។
រីឯអ្នកការទូតឥណ្ឌាវិញ ពួកគេបារម្ភខ្លាចក្រែងកើតមានភាពវឹកវរនៅប្រទេសអាហ្វហ្កានីស្ថានក្រោយពីទ័ពអាមេរិកាំងនិងទ័ពអូតង់ត្រូវដកខ្លួនថយនៅពេលបីឆ្នាំខាងមុខ។ ហេតុដូច្នេះហើយបានជា នៅថ្ងៃអង្គារម្សិលមិញប្រទេសអាហ្វហ្កានីស្ថាននិងប្រទេសឥណ្ឌាបានចុះហត្ថលេខាទៅលើកិច្ចព្រមព្រៀងដៃគូយុទ្ធសាស្ត្រនៅក្នុងវិស័យសេដ្ឋកិច្ចនិងវិស័យសន្តិសុខ។
ហើយលោកប្រធានាធិបតីអាហ្វហ្កានីស្ថានហាមីឌការហ្សៃត្រូវថ្លែងសុន្ទរកថាមួយនៅថ្ងៃពុធនេះ ស្ដីពីអនាគតនៃប្រទេសអាហ្វហ្កានីស្ថាននិងប្រទេសអាស៊ីប៉ែកខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ