ចិន៖ កំណើនសេដ្ឋកិច្ចធ្លាក់ស្រុតចុះនៅក្នុងបរិបទអន្តរជាតិដុនដាប
អត្រានៃកំណើនសេដ្ឋកិច្ចចិនបានធ្លាក់ស្រុតចុះមកនៅ៩,១%នៅត្រីមាសទី៣ឆ្នាំ២០១១ ក្នុងខណៈដែលការនាំចេញរបស់ប្រទេសចិនចាប់ផ្តើមជួបនឹងការធ្លាក់ស្រុតចុះ ដោយហេតុតែមានវិបត្តិសេដ្ឋកិច្ចនៅអឺរ៉ុបនិងនៅសហរដ្ឋអាមេរិក ហើយទីក្រុងប៉េកាំងនៅតែប្រយុទ្ធទប់ទល់នឹងបញ្ហាទំនិញឡើងថ្លៃ ដោយពុំបោះបង់ចោលឡើយ “នយោបាយឥណទានត្បិតត្បៀត”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
កំណើនសេដ្ឋកិច្ចចិនកំពុងធ្វើការប្រឈមមុខទល់នឹងស្ថានភាពមួយដ៏សែនស្មុគស្មាញ ទាំងនៅលើវិស័យក្រៅប្រទេសនិងក្នុងប្រទេស។ បើយោងតាមតួលេខរបស់ការិយាល័យជាតិខាងស្ថិតិបានឲ្យដឹងថា អត្រានៃកំណើនសេដ្ឋកិច្ចនៃមហាអំណាចសេដ្ឋកិច្ចទីពីរពិភពលោកដែលធ្លាប់តែមាន១០,៤%នៅឆ្នាំ២០១០ ៩,៧%នៅត្រីមាសទី១ឆ្នាំ២០១១ និង៩,៥%នៅត្រីមាសទី២ បានធ្លាក់មកនៅ៩,១%នៅត្រីមាសទី៣ឆ្នាំ២០១១នេះ។
ដើម្បីប្រយុទ្ធប្រឆាំងនឹងបញ្ហាទំនិញឡើងថ្លៃដែលមានអត្រាដល់ទៅ៦,១%នៅខែកញ្ញាឆ្នាំ២០១១ រដ្ឋាភិបាលចិនបានអនុវត្តតាំងពីឆ្នាំទៅម៉្លេះនូវ “នយោបាយឥណទានត្បិតត្បៀត” ដោយបានដំឡើងអត្រាការប្រាក់នាំមុខ។
រីឯវិស័យនាំទំនិញចិនចេញទៅលក់ក្រៅប្រទេសវិញ កំពុងស្គាល់ការធ្លាក់ស្រុតចុះ ដោយហេតុតែអឺរ៉ុបនិងសហរដ្ឋអាមេរិកដែលជាទីផ្សារដ៏សំខាន់របស់ចិនកំពុងជួបនឹងវិបត្តិហិរញ្ញវត្ថុនិងវិបត្តិសេដ្ឋកិច្ចដ៏ធ្ងន់ធ្ងរ។ ហើយកត្តាអវិជ្ជមានមួយទៀតគឺតម្លៃប្រាក់យ័នចិនចេះតែឡើងថ្លៃពុំឈប់ឈរនៅចំពោះមុខប្រាក់ដុល្លារអាមេរិកនិងប្រាក់អឺរ៉ូរបស់អឺរ៉ុប។ ជាក់ស្តែងក្នុងរយៈពេល១ឆ្នាំចុងក្រោយនេះ ប្រាក់យ័នចិនបានឡើងថ្លៃប្រមាណ៧%នៅចំពោះមុខប្រាក់ដុល្លារអាមេរិក។
បន្ថែមពីលើនេះ អ្នកដឹកនាំចិនគ្មានគម្រោងការនឹងប្តូរប្រែនយោបាយសេដ្ឋកិច្ចរបស់គេឡើយ ដោយគេយល់ថា “វិធានការក្តោបក្តាប់ម៉ាក្រូ-សេដ្ឋកិច្ច”បច្ចុប្បន្នជាវិធានការត្រឹមត្រូវសម្រាប់រក្សាឲ្យមានស្ថិរភាព។
គួរកត់សម្គាល់ថា ក្បាលម៉ាស៊ីនសេដ្ឋកិច្ចនៃប្រទេសមហាអំណាចសេដ្ឋកិច្ចទីពីរពិភពលោកបានត្រូវជួយអូសទាញដោយកំណើនវិនិយោគដែលបានកើនឡើង២៤,៩%ក្នុងរយៈពេល៩ខែចុងក្រោយនេះ។ ទីភ្នាក់ងារវិភាគហានិភ័យឈ្មោះ Moody’s បានបង្ហាញឲ្យដឹងថា វិស័យអចលនទ្រព្យចិនបានទទួលការគាំទ្រពីសំណាក់កម្មវិធីសាធារណៈដែលសាងសង់លំនៅដ្ឋានមានតម្លៃថោកៗជាច្រើនសម្រាប់ប្រជាពលរដ្ឋចិន។ ក៏ប៉ុន្តែការបោះទុនធ្វើវិនិយោគក្នុងវិស័យអយស្ម័យយានបានជួបនឹងបញ្ហា ដោយហេតុតែមានរឿងអាស្រូវទាក់ទិននឹងបញ្ហាពុករលួយហើយនិងបញ្ហាគ្រោះថ្នាក់អយស្ម័យយានដែលបានកើតមាននារយៈពេលប៉ុន្មានខែចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ