ពួកប្រទេស Brics មកជួយពួកប្រទេសចាយលុយ អឺរ៉ូ ?
នៅថ្ងៃព្រហស្បតិ៍ទី២២កញ្ញានេះ មូលនិធិរូបិយវត្ថុអន្តរជាតិហៅកាត់ថាFMI ត្រូវបើកសន្និបាត នៅទីស្នាក់ការរបស់ខ្លួន ក្នុងទីក្រុងវ៉ាស៊ីនតោន សហរដ្ឋអាមេរិក។ សន្និបាតនៃស្ថាប័នអន្តរជាតិមួយនេះប្រព្រឹត្តទៅ ក្នុងពេលមួយដែលតំបន់ចាយលុយអឺរ៉ូកំពុងលង់ខ្លួនក្នុងវិបត្តិហិរញ្ញវត្ថុធ្ងន់ធ្ងរ ដ្បិតជំពាក់បំណុលគេវ័ណ្ឌក។ នៅក្នុងបរិបទបែបនេះ បណ្តាប្រទេសBrics ពោលគឺប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូងដែលមានសេដ្ឋកិច្ចលូតលាស់ខ្លាំងជាងគេ អាចនឹងសម្រេចចិត្តជួយទិញមូលបត្របំណុលរបស់តំបន់ចាយលុយអឺរ៉ូ។ សម្រាប់ប្រទេសមហាអំណាចសេដ្ឋកិច្ចថ្មីថ្មោងទាំងនេះ ការទិញភាគហ៊ុនរបស់ប្រទេសចាយលុយអឺរ៉ូអាចនឹងនាំមកនូវប្រយោជន៍សេដ្ឋកិច្ចនិងនយោបាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:២០
វិបត្តិនៅក្នុងតំបន់ចាយលុយអឺរ៉ូ គឺជាប្រធានបទសំខាន់ជាងគេបង្អស់មួយនៃសន្និបាតរបស់មូលនិធិរូបិយវត្ថុអន្តរជាតិFMI ដែលផ្តើមឡើងនៅថ្ងៃព្រហស្បតិ៍ទី២២កញ្ញានេះ។ ពីព្រោះទោះបីជាក្នុងខណៈនេះ វិបត្តិសេដ្ឋកិច្ចកំពុងយាយី តែតំបន់ចាយលុយអឺរ៉ូក៏ដោយ ក៏បណ្តាប្រទេសមានសេដ្ឋកិច្ចកំពុងលូតលាស់ដែលគេហៅថាក្រុម២០ប្រទេសឬ G20 បារម្ភខ្លាំងឡើងៗខ្លាចវិបត្តិសេដ្ឋកិច្ចអឺរ៉ុបរីករាលដាលឆ្លងពាសពេញពិភពលោក។
អ៊ីចឹងហើយបានជានៅក្រៅក្របខ័ណ្ឌសន្និបាតរបស់FMI នឹងមានរៀបចំឡើងនូវកិច្ចប្រជុំពីរផ្សេងទៀត។ ទីមួយ ជាជំនួបរវាងបណ្តារដ្ឋមន្រ្តីក្រសួងហិរញ្ញវត្ថុនៃក្រុមG20 និងទីពីរជាជំនួបរវាងបណ្តារដ្ឋមន្ត្រីក្រសួងហិរញ្ញវត្ថុនៃប្រទេសBrics ពោលគឺបណ្តាប្រទេសដែលមានសេដ្ឋកិច្ចកំពុងលូតលាស់ខ្លាំងជាងគេ នោះគឺប្រេស៊ីល រុស្ស៊ី ឥណ្ឌា ចិននិងអាហ្វ្រិកខាងត្បូង។
តើប្រទេសBrics អាចនឹងសម្រេចធ្វើអ្វីខ្លះ? តើប្រទេសBricsដែលសុទ្ធសឹងជាប្រទេសមហាអំណាចសេដ្ឋកិច្ចថ្មីថ្មោងអាចនឹងមូលមតិគ្នាដើម្បីជួយស្រោចស្រង់តំបន់ចាយលុយអឺរ៉ូដែរឬទេ? ទាំងអស់នេះ សុទ្ធសឹងជាសំណួរដែលម្នាក់ៗរង់ចាំអ៊ុតមើលចម្លើយ។
Brics អាចនឹងជួយទិញមូលបត្របំណុល
ប្រេស៊ីល រុស្ស៊ី ឥណ្ឌា អាហ្វ្រិកខាងត្បូងនិងជាពិសេសចិនជាប្រទេសដែលមានលុយច្រើនសន្ធឹកសន្ធាប់នៅក្នុងដៃ គឺជាសរុបប្រមាណ៤រយ៣០ម៉ឺនលានដុល្លារ ក្នុងនោះ៣ភាគ៤ឋិតនៅក្នុងដៃរបស់ប្រទេសចិន។ ម្ល៉ោះហើយ ប្រទេសទាំងនេះអាចនឹងជួយទិញមូលបត្របំណុលរបស់ប្រទេសអឺរ៉ុបណាដែលហៀបនឹងក្ស័យធន ដូចជាក្រិក អ៊ីតាលី និងអេស្ប៉ាញជាដើម។ ហើយនេះគឺជាគំនិតដែលផ្តួចផ្តើមឡើងដោយប្រទេសប្រេស៊ីល។ ប្រេស៊ីលចង់ឲ្យបណ្តាប្រទេសBrics មូលមតិគ្នាទិញយក អ្នកនេះបន្តិច អ្នកនោះបន្តិច មូលបត្របំណុលរបស់ប្រទេសអឺរ៉ុបណាដែលជំពាក់លុយគេវ័ណ្ឌក។ ដើម្បីបញ្ចុះបញ្ចូលចិន ឥណ្ឌា រុស្ស៊ីនិងអាហ្វ្រិកខាងត្បូងឲ្យធ្វើបែបនេះ ប្រេស៊ីល ពន្យល់ថា តំបន់ចាយលុយអឺរ៉ូសុទ្ធសឹងជាអតិថិជនសំខាន់ៗ បានន័យថាសុទ្ធសឹងជាប្រទេសដែលទិញផលិតផលមកពីចិន ពីឥណ្ឌាឬពីប្រេស៊ីល ម្ល៉ោះហើយជួយតំបន់ចាយលុយអឺរ៉ូ គឺជួយខ្លួនឯង គឺជួយខ្ទប់កុំឲ្យវិបត្តិសេដ្ឋកិច្ចធ្លាយចេញពីទ្វីបអឺរ៉ុប រួចហើយរីករាលដាលពាសពេញពិភពលោក គឺជួយធ្វើយ៉ាងណាកុំឲ្យសេដ្ឋកិច្ចពិភពលោកដើរថយក្រោយ ជាថ្មីម្តងទៀត ដូចនៅឆ្នាំ២០០៨-២០០៩។
ការដែលប្រទេសBrics អាចជួយទិញមូលបត្របំណុលរបស់ប្រទេសក្រិក ឬរបស់ប្រទេសអ៊ីតាលីនិងយល់ព្រមទិញមូលបត្ររបស់មូលនិធិអឺរ៉ុបដើម្បីស្ថិរភាពហិរញ្ញវត្ថុ មិនពិតជាអាចជួយដោះស្រាយបានទេវិបត្តិសេដ្ឋកិច្ចនៅអឺរ៉ុប។ ក៏ប៉ុន្តែធ្វើបែបនេះ ប្រទេសBricsយ៉ាងហោចណាស់ ក៏អាចនឹងជួយធ្វើឲ្យអ្នកវិនិយោគមានការកក់ក្តៅក្នុងចិត្តឡើងវិញដែរ ឲ្យមានទំនុកចិត្តឡើងវិញ និងនៅទីបំផុតអាចនឹងធ្វើឲ្យទីផ្សារមូលបត្រអន្តរជាតិមានស្ថិរភាពឡើងវិញ។
ប្រយោជន៍ដែលBricsអាចទាញយកបាន
បញ្ចុះបញ្ចូលឲ្យប្រទេសBrics ទាំង៥ ពួតដៃគ្នាដើម្បីទិញដំណាលគ្នាមូលបត្របំណុលនៅក្នុងតំបន់ចាយលុយអឺរ៉ូ មិនមែនជាការងាយស្រួលទេ ពីព្រោះទីមួយ មហាយក្សថ្មីថ្មោងទាំង៥ គ្មានលុយនៅក្នុងដៃច្រើនដូចគ្នានោះទេ និងពីព្រោះទីពីរ ការទិញមូលបត្របំណុលរបស់ប្រទេសចាយលុយអឺរ៉ូ ដូចជារបស់ប្រទេសក្រិក អ៊ីតាលី អេស្ប៉ាញ និងសូម្បីតែរបស់បារាំងគឺជាហានិភ័យមួយធំ ដ្បិតបើប្រទេសទាំងអស់នេះក្ស័យធន អ្នកខាតមុនគេ គឺអ្នកដែលបានទិញមូលបត្របំណុលនៃប្រទេសទាំងហ្នឹងតែម្តង។
យ៉ាងណាមិញ មានមូលហេតុនយោបាយមួយចំនួនដែលអាចនឹងជំរុញឲ្យប្រទេសBricsយល់ព្រមព្រៀងគ្នាទិញមូលបត្របំណុលរបស់បណ្តាប្រទេសចាយលុយអឺរ៉ូ។ ឧទាហរណ៍ ចិនចង់ឲ្យសហគមន៍អន្តរជាតិទទួលស្គាល់ជាផ្លូវការថាសេដ្ឋកិច្ចរបស់ខ្លួនជាសេដ្ឋកិច្ចផ្សារសេរីសុទ្ធសាធ។ រុស្ស៊ីចង់ក្លាយជាសមាជិករបស់អង្គការពាណិជ្ជកម្មពិភពលោក។ រីឯប្រេស៊ីលនិងឥណ្ឌាវិញចង់ក្លាយជាសមាជិកអចិន្ត្រៃយ៍នៃក្រុមប្រឹក្សាសន្តិសុខរបស់អង្គការសហប្រជាជាតិ។ ដោយឡែក ទាំងអស់គ្នា ទាំងប្រេស៊ីល រុស្ស៊ី ឥណ្ឌា ចិននិងអាហ្វ្រិកខាងត្បូង សុទ្ធតែចង់បានអាសនៈបន្ថែមនិងឥទ្ធិពលបន្ថែម នៅក្នុងមូលនិធិរូបិយវត្ថុអន្តរជាតិFMI។
តាមរយៈការយល់ព្រមទិញមូលបត្របំណុលរបស់តំបន់ចាយលុយអឺរ៉ូ ប្រទេសBricsអាចនឹងដាក់លក្ខខណ្ឌ និងគាបសង្កត់ទៅលើសហភាពអឺរ៉ុប ទៅលើប្រទេសអឺរ៉ុបនីមួយៗឲ្យជួយពួកគេវិញក្នុងការសម្រេចគោលដៅនយោបាយខាងលើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ