អាជ្ញាធរភូមាលើកចេញការត្រួតពិនិត្យទៅលើសារព័ត៌មានសេដ្ឋកិច្ច
រដ្ឋអំណាចភូមាបានលើកចេញការត្រួតពិនិត្យទៅលើសារព័ត៌មានមួយចំនួនដែលក្នុងនោះមានជាអាទិ៍សារព័ត៌មានសេដ្ឋកិច្ច។ ក៏ប៉ុន្តែពាក់ព័ន្ធនឹងការផ្សព្វផ្សាយបច្ចុប្បន្នភាពទូទៅ អាជ្ញាធរភូមានៅតែបន្តធ្វើការត្រួតពិនិត្យមុននឹងអនុញ្ញាតឲ្យចេញផ្សាយ។ នេះជាការប្រកាសឲ្យដឹងនៅថ្ងៃអាទិត្យនេះដោយ Myanmar Times ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
ជាសរុបមានទិនានុប្បវត្តិ ទស្សនាវដ្តី ប្រមាណ៥៤បានរួចខ្លួនពីការត្រួតពិនិត្យដោយអាជ្ញាធរភូមាមុននឹងធ្វើការចេញផ្សាយ។ នេះបើអនុលោមតាមកំណែទម្រង់នៃថ្ងៃទី៩ធ្នូឆ្នាំ២០១១។
ចំណែកឯសារព័ត៌មានពាក់ព័ន្ធនឹងបច្ចុប្បន្នភាពទូទៅ បញ្ហាអប់រំ និងបញ្ហាសាសនាឋិតនៅក្រោមការត្រួតពិនិត្យដដែល។ នេះជាការប្រកាសឲ្យដឹងដោយលោក Tint Swe ប្រធានត្រួតពិនិត្យភូមា។
បើយោងតាម Myanmar Times លោក Tint Swe ប្រធានត្រួតពិនិត្យសារព័ត៌មានភូមាបានថ្លែងឲ្យដឹងនៅពេលថ្មីៗនេះថា “ការត្រួតពិនិត្យទៅលើសារព័ត៌មានជាទង្វើពុំសមស្របនឹងការអនុវត្តន៍លទ្ធិប្រជាធិបតេយ្យឡើយ ដូច្នេះគេនឹងត្រូវលុបចេញនៅពេលឆាប់ៗខាងមុខនេះ”។
រីឯលោកប្រធានាធិបតីភូមា Thein Sein ដែលបានឡើងមកកាន់អំណាចនៅខែមីនាកន្លងទៅ ក្រោយពីបានរំលាយរបបសឹកភូមា កំពុងខិតខំបង្ហាញឲ្យបក្សប្រឆាំងភូមានិងប្រទេសលោកខាងលិចឃើញថា លោកបានសម្រេចចិត្តធ្វើកំណែទម្រង់ឲ្យបានស៊ីជម្រៅនៅក្នុងប្រទេសភូមា។
គួរកត់សម្គាល់ថា ក្រោយពីមានការបោះឆ្នោតដ៏ចម្រូងចម្រាសនៅខែវិច្ឆិកាឆ្នាំ២០១០ និងក្រោយពីមានការដោះលែងលោកស្រីអ៊ុងសានស៊ូជី ឥឡូវនេះសារព័ត៌មានភូមាចាប់មានសេរីភាពធ្វើការផ្សព្វផ្សាយពីសកម្មភាពរបស់លោកស្រីអ៊ុងសានស៊ូជីដែលកាលពីមុនបានជួបនឹងការហាមឃាត់។
មិនតែប៉ុណ្ណោះ បើយោងតាមទិនានុប្បវត្តិរដ្ឋភូមាឈ្មោះ New Light of Myanmar បានថ្លែងឲ្យដឹងនៅថ្ងៃអាទិត្យនេះថា រដ្ឋអំណាចភូមាគ្រោងធ្វើការសម្រាលការត្រួតពិនិត្យទៅលើខ្សែភាពយន្តផងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ