ប៉េកាំងចង់បង្កើនការដោះដូរពាណិជ្ជកម្មទ្វេ ជាមួយអាស៊ាន
បើទោះបីជាមានជម្លោះដណ្តើមដែនទឹក ជាមួយប្រទេសសមាជិកមួយចំនួនរបស់អាស៊ាន នៅសមុទ្រចិនភាគខាងត្បូង ប៉ុន្តែ ប្រទេសចិននៅតែចង់ពង្រឹងទំនាក់ទំនងពាណិជ្ជកម្មជាមួយសមាគមអាស៊ីអាគ្នេយ៍មួយនេះ។ យោងតាមការចុះផ្សាយរបស់កាសែតចិន កាលពីថ្ងៃពុធម្សិលមិញ លោកលី ខឺឈាំង នាយករដ្ឋមន្រ្តីចិនបានថ្លែងថា ប្រទេសចិនចង់បង្កើនការដោះដូរពាណិជ្ជកម្មជាមួយអាស៊ាន ឲ្យបានទ្វេដង ចាប់ពីពេលនេះ ដល់ឆ្នាំ ២០២០។
ចុះផ្សាយនៅថ្ងៃ៖
ស្តាប់ - ០១:៤៩
ក្នុងរយៈពេលប៉ុន្មានទសវត្សរ៍ចុងក្រោយនេះ ទំហំដោះដូរពាណិជ្ជកម្មរវាងចិន មហាអំណាចសេដ្ឋកិច្ចទីពីរពិភពលោក ជាមួយប្រទេសទាំង១០របស់អាស៊ានបានកើនឡើង ៦ដង ដល់តម្លៃ៤០០ពាន់លានដុល្លារ នៅឆ្នាំ ២០១២។ នេះបើយោងតាមកាសែតចិនថ្មី។
ប្រទេសចិនចង់ឲ្យទំហំដោះដូរពាណិជ្ជកម្មរវាងចិន និងអាស៊ានកើនឡើង ទ្វេ ដងទៀត គឺដល់ មួយពាន់ ពាន់លានដុល្លារ ចាប់ពីពេលនេះ រហូតដល់ឆ្នាំ២០២០។ នេះជាការអំពាវនាវរបស់លោកនាយករដ្ឋមន្រ្តីចិន នៅក្នុងឱកាសបើកកិច្ចប្រជុំកំពូលលើកទី១០ ស្តីពីពាណិជ្ជកម្ម និងវិនិយោគរវាងចិន និងអាស៊ាន ដែលត្រូវធ្វើឡើង នៅខេត្តណានណីង។
នៅចំពោះមុខថ្នាក់ដឹកនាំប្រទេសសមាជិកអាស៊ាន លោកនាយករដ្ឋមន្រ្តីចិនលើកឡើងច្រើនពីផលប្រយោជន៍សេដ្ឋកិច្ច ប៉ុន្តែ និយាយតិចតួចប៉ុណ្ណោះ ពីជម្លោះផលប្រយោជន៍ទឹកដីដែលចិន កំពុងមានជាមួយប្រទេសសមាជិកខ្លះរបស់អាស៊ាន។ វៀតណាម ហ្វីលីពីន ម៉ាឡេស៊ី និងព្រុយណេ កំពុងប្រឈមមុខជាមួយចិន ដើម្បីទាមទារដែនទឹករបស់ខ្លួន នៅសមុទ្រចិនភាគខាងត្បូង។
លោកប្រធានាធិបតីហ្វីលីពីនវិញបានបដិសេធមិនទៅចូលរួមក្នុងកិច្ចប្រជុំកំពូលសេដ្ឋកិច្ច នៅប្រទេសចិនទេ ដោយលោកបានជំទាស់ដាច់ខាតតបនឹងការរំលោភទឹកដីពីសំណាក់ចិន នៅសមុទ្រចិនភាគខាងត្បូង ។ កាលពីអង្គារកន្លងទៅ ហ្វីលីពីនបានរកឃើញថា ចិនកំពុងលួចសាងសង់សំណង់បេតុង នៅលើប្រជុំកោះ Scarborough ដែលស្ថិតមកជិតកោះហ្វីលីពីន ប៉ុន្តែ ត្រូវបានចិនទាមទារដែរ និងបានបោះទីតាំងកប៉ាល់ល្បាតរបស់ខ្លួនរហូតមក។
ជម្លោះទឹកដីមិនបានធ្វើឲ្យមហាអំណាចចិនភ្លេច សុខចិត្តបោះបង់ចោលផលប្រយោជន៍សេដ្ឋកិច្ចដែលខ្លួនមានជាមួយសមាគមអាស៊ីអាគ្នេយ៍។ បន្ទាប់ពីបានបដិសេធអស់ជាច្រើនឆ្នាំ ទីក្រុងប៉េកាំងទើបបានប្រកាសយល់ព្រមជួបជាមួយប្រទេសសមាជិកអាស៊ាន នៅខែកញ្ញា ដើម្បីពិភាក្សាពីក្រមប្រតិបត្តិ ដែលចែងពីការគ្រប់គ្រងតំបន់ទឹកជាប់ជម្លោះ ជាមួយប្រទេសសមាជិកអាស៊ាន នៅសមុទ្រចិនភាគខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ