គ្មានលោកអូបាម៉ា ចិនជាអ្នកកំណត់ជោគវាសនាក្នុងជម្លោះសមុទ្រចិនខាងត្បូង
ចុះផ្សាយនៅថ្ងៃ៖
ស្តាប់ - ០៦:៤០
កិច្ចប្រជុំកំពូលអាស៊ាន និងដៃគូបានបន្តធ្វើនៅថ្ងៃព្រហស្បតិ៍នេះ នៅក្នុងប្រទេសព្រុយណេ។ កិច្ចប្រជុំកំពូលអាស៊ានបានពង្រីកខ្លួន មកជាជំនួបកំពូលអាស៊ី បូព៌ា ដោយមានប្រទេសសមាជិកអាស៊ានទាំង១០ប្រជុំជាមួយប្រទេសដៃគូ៨ទៀត។ នៅមួយថ្ងៃក្រោយ នាយករដ្ឋមន្រ្តីចិនបង្ហាញចេតនាចង់ឲ្យមានសន្តិភាព នៅសមុទ្រចិនខាងត្បូង ប្រមុខការបរទេសអាមេរិក និងសម្ព័ន្ធមិត្តបានជំរុញឲ្យចិនពន្លឿនការងារក្នុងការបង្កើតឲ្យមានក្រមប្រតិបត្តិដោះស្រាយជម្លោះនៅសមុទ្រចិនខាងត្បូង
លោកប្រមុខការបរទេសអាមេរិក បានជំរុញឲ្យប្រទេសចិនបង្កើនការប្រឹងប្រែងរបស់ខ្លួន ដើម្បីបន្ធូរបន្ថយភាពតានតឹង នៅសមុទ្រចិនភាគខាងត្បូង។ នៅមួយថ្ងៃ ក្រោយ នាយករដ្ឋមន្រ្តីចិនបង្ហាញការប្តេជ្ញាចូលរួមបង្កើតក្រមប្រតិបត្តិ ជប៉ុន ហ្វីលីពីន បានចូលរួមជាមួយអាមេរិក ដើម្បីដាក់សម្ពាធលើចិនឲ្យបង្កើនការងារការទូតដោះស្រាយជម្លោះនៅសមុទ្រចិនខាងត្បូង។
នៅក្រៅកិច្ចប្រជុំកំពូលអាស៊ី បូព៌ា លោកប្រមុខការបរទេសអាមេរិកបាននិយាយថា គេត្រូវការចាំបាច់ ក្រមប្រតិបត្តិមួយ ដើម្បីការពារកុំឲ្យមានជម្លោះ ក្នុងពេលអនាគត ប៉ុន្តែ ជាមួយគ្នានេះ ប្រទេសភាគីជម្លោះ គួរជួបចរចាគ្នាដើម្បីជៀសវាងការយល់ភាន់ច្រលំគ្នា។
ក្រៅតែពីសមុទ្រចិនខាងត្បូង ប្រទេសចិនកំពុងប្រឈមមុខនឹងប្រទេសជប៉ុន ក្នុងបញ្ហាទាមទារដែនកោះ នៅសមុទ្រចិនខាងកើត។ រហូតមក ចិន និងជប៉ុនកំពុងដំឡើងសរសៃកដាក់គ្នា រឿងគ្រប់គ្រងប្រជុំកោះ សេនកាគូ ដែលចិនដាក់ឈ្មោះថា ទាវយូ។ កោះដែលគ្មានមនុស្សរស់នៅ គ្រប់គ្រងដោយជប៉ុន តាំងពីសម័យសង្រ្គាមលោកលើកទីពីរ ប៉ុន្តែ ចិនតែងតែទាមទារថា ជាសម្បត្តិទឹកដីរបស់ខ្លួន។
នៅថ្ងៃព្រហស្បតិ៍ នាយករដ្ឋមន្រ្តីជប៉ុនដែលចេញមុខការពារទឹកដីជប៉ុន នៅចំពោះការទាមទាររបស់ចិន បានប្រាប់អ្នកកាសែតថា លោកកំពុងសង្ឃឹមចង់ឃើញក្រមប្រតិបត្តិដែលជាអ្នកកំណត់ដែនទឹក និងសិទ្ធិរបស់ប្រទេសនីមួយៗ នៅក្នុងសមុទ្រអន្តរជាតិ។ « គេប្រើច្បាប់ដើម្បីគ្រប់គ្រងសមុទ្រ ប៉ុន្តែ មិនមែនកម្លាំងបាយទេ » នេះជាការអះអាងរបស់លោកស៊ីនហ្សូ អាបេ នាយករដ្ឋមន្រ្តីជប៉ុន។
បើទោះបីជាភាគីជម្លោះជាមួយចិនបានកត់សំគាល់ឃើញចិនបើកទ្វារចរចាច្រើនជាងមុន គឺបង្ហាញចេតនាចូលរួមដោះស្រាយបញ្ហាសមុទ្រចិនខាងត្បូង ប៉ុន្តែ គ្មានអ្នកណាជឿទុកចិត្តលើការអះអាងរបស់ប្រមុខដឹកនាំចិនទេ។ គេមើលដឹងថា ចិនកំពុងយកចិត្តប្រទេសសមាជិកអាស៊ាន ដោយសារតែមើលឃើញសក្តានុពលទីផ្សាររបស់អាស៊ាន ដែលប្រមូលផ្តុំដោយប្រជាជន៦០០លាននាក់។
អ្នកជំនាញខ្លះអាស៊ីខ្លះ មើលឃើញថា ចិនកំពុងទិញពេលវេលា តាមរយៈការនិយាយបញ្ចុះបញ្ចូលផ្នែកការទូត ដើម្បីបន្ធូរស្ថានភាពជាមួយប្រទេសនៅអាស៊ាន ក្នុងគោលដៅទាក់ទាញមុខមាត់របស់ខ្លួន ក្នុងនាមជាមហាអំណាចផ្តាច់មុខ នៅអាស៊ី។
ប៉ុន្តែ នៅលើទីតាំងជាក់ស្តែង ចិនមិនបន្ធូរដៃទេ។ ចិនបានពង្រឹងការការពារដែនសមុទ្រច្រើនជាងមុន។ ចិនបានបង្កើនការសាងសង់ បោះទីតាំងឆ្មាំសមុទ្រ លើកោះមានជម្លោះដូចជា នៅប្រជុំកោះ Scarbouroug ជាមួយហ្វីលីពីន។ ចិនបានចេញច្បាប់ថ្មី ដែលបានអនុញ្ញាតឲ្យគេបំពាក់អាវុធលើនាវាល្បាតរបស់ខ្លួន និងឧស្សាហ៍បញ្ជូនទៅបើកឆ្វែលជិតកោះដែលមានជម្លោះជាមួយហ្វីលីពីន វៀតណាម ឬជប៉ុន។
ប្រទេសជាច្រើន ដែលមានជម្លោះជាមួយចិន នៅ សមុទ្រចិនភាគខាងត្បូងសង្ឃឹមខ្លាំងណាស់ថា លោកអូបាម៉ានឹងមានវត្តមាន នៅក្នុងកិច្ចប្រជុំ នៅឥណ្ឌូណេស៊ី និងនៅព្រុយណេ។ តាំងពីយូរហើយ សម្ព័ន្ធមិត្តរបស់អាមេរិក នៅអាស៊ី សង្ឃឹមពឹងផ្អែកលើអំណាចអាមេរិកដើម្បីទប់ទល់នឹងប្រទេសចិន ទាំងផ្នែកសេដ្ឋកិច្ច និងយោធា។ ប៉ុន្តែ ប្រទេសទាំងនេះ ដូចជាជប៉ុន ហ្វីលីពីន ម៉ាឡេស៊ី និងវៀតណាម បានខកចិត្ត ខ្លាំងតែម្តង ដែលលោកអូបាម៉ា លុបចោលការចូលរួមរបស់ខ្លួន នៅអាស៊ាន ដោយសារតែរឿងវិបត្តិជាប់គាំងថវិកា នៅអាមេរិក។
អវត្តមានរបស់លោកអូបាម៉ា នៅក្នុងកិច្ចប្រជុំអាស៊ាន និងអាស៊ី ប៉ាស៊ីហ្វិក ធ្វើឲ្យអាមេរិកខាតបង់ច្រើន និងផ្តល់ប្រយោជន៍ទៅឲ្យមហាអំណាចចិន។ អាមេរិកមានតំណាងឲ្យលោកប្រមុខការបរទេស John Kerry ប៉ុន្តែ គ្មានលោកអូបាម៉ា គឺដូចជាគ្មានអាមេរិក នៅក្នុងកិច្ចប្រជុំកំពូលអាស៊ាន។ លោកអូបាម៉ាដែលជាអ្នកបានសន្យាបោះយុថ្កាអាមេរិកនៅអាស៊ី។ លោកបានសន្យាយកអាស៊ីធ្វើជាគោលដៅយុទ្ធសាស្រ្ត ទាំងផ្នែកសេដ្ឋកិច្ច និងយោធា។
លោកប្រធានាធិបតីហ្វីលីពីន ដែលប្រឈមមុខខ្លាំងជាងគេ ជាមួយចិន នៅសមុទ្រចិនខាងត្បូង មិនលាក់ទេ ក្តីព្រួយបារម្ភរបស់លោក នៅចំពោះមុខការពង្រីកឥទ្ធិពលចិន នៅក្នុងពេលដែលអាមេរិក សម្ព័ន្ធមិត្តរបស់ខ្លួន គ្មានវត្តមានក្បែរខ្លួន។ លោកអាគីណូបានចោទសំណួរថា បើសិនជាមហាអំណាចសេដ្ឋកិច្ចអាមេរិកត្រូវដួល តើប្រទេសផ្សេងទៀត ដូចជាហ្វីលីពីន នឹងត្រូវការពារខ្លួនយ៉ាងម៉េច? ប៉ុន្តែ យ៉ាងណាក៏ដោយ លោកប្រធានាធិបតីបាននិយាយសម្រួលភាពតានតឹងមកវិញ ដោយនិយាយថា រឿងអាមេរិកដួលរលំ គឺមិនអាចទៅរួចទេ។
អាមេរិកកំពុងជួបវិបត្តិជាប់គាំងថវិកា និងគ្រោះថ្នាក់រដ្ឋក្ស័យធន ប្រសិនបើសភាមិនព្រមបោះឆ្នោតអនុញ្ញាតិឲ្យរដ្ឋាភិបាលខ្ចីប្រាក់បំណុល បន្ថែម ចាប់ពីថ្ងៃទី ១៧តុលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ