អ្នកទទួលខុសត្រូវថៃនានា លើកឡើងថា ថៃស្ថិតក្បែរសង្គ្រាមស៊ីវិល
នៅថ្ងៃអង្គារនេះ អ្នកទទួលខុសត្រូវថៃនានា បានសំដែងការប្រុងប្រយ័ត្នចំពោះស្ថានភាពប្រទេសថៃ ដែលស្ថិតនៅក្បែរជ្រោះនៃសង្គ្រាមស៊ីវិល។ កាលពីថ្ងៃចន្ទ លោក ប្រាយុត ចាន់ អូឆា ជាមេដឹកនាំកងទ័ពជើងគោកថៃដ៏មានឥទ្ធិពល ក៏បានបង្ហាញការព្រួយបារម្ភផងដែរ ថាថៃអាចនឹងវិនាសភ្លាមៗបាន។ វិបត្តិនយោបាយនៅថៃ ជិត៤ខែមកនេះ បានសម្លាប់មនុស្ស២២នាក់ មកហើយ ក្នុងនោះមានកុមារ៤នាក់ផងដែរ។ ការបាញ់គ្នាដែលតែងកើតឡើងជាប្រចាំ នៅក្រុងបាងកក បានធ្វើអោយរបួសមនុស្ស២នាក់ នៅព្រឹកថ្ងៃអង្គារនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
នៅថៃ ថ្ងៃអង្គារនេះ លោក តារិត ប៉េងឌីត ប្រធានមន្ទីរស៊ើបអង្កេតពិសេសថៃ ដែលជាមន្ទីរមានភារកិច្ចដូចទីភ្នាក់ងារស៊ើបអង្កេត FBI អេហ្វ ប៊ី អាយ អាមេរិកដែរនោះ បានលើកឡើងពីការព្រួយបារម្ភរបស់លោក ថា ថៃអាចនឹងរងនូវការវាយលុកឈានទៅដល់សង្គ្រាមស៊ីវិលបាន។ ជិត៤ខែមកនេះ វិបត្តិនយោបាយថៃ បង្កឡើងដោយក្រុមបាតុករប្រឆាំងរដ្ឋាភិបាល បានសម្លាប់មនុស្សជាង២០នាក់មកហើយ ជនរងគ្រោះភាគច្រើនស្ថិតនៅក្រុងបាងកក។
គិតពីឆ្នាំ២០១០មក វិបត្តិនយោបាយលើកនេះ ជាវិបត្តិធ្ងន់ធ្ងរបំផុតដែលថៃឆ្លងកាត់។ កាលពីឆ្នាំ២០១០ ក្រុមអាវក្រហមគាំទ្រអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា បានចុះបាតុកម្មតាមដងផ្លូវ និងត្រូវបានកងទ័ពបង្ក្រាប ធ្វើអោយមានមនុស្សស្លាប់ជាង៩០នាក់។
នៅចំពោះមុខមហាបាតុកម្មប្រឆាំងរដ្ឋាភិបាលរបស់ក្រុមអាវលឿង នៅពេលនេះ ក្រុមអាវក្រហមដែលគាំទ្រលោកស្រីយីងឡាក់ មិនបានចេញមុខធ្វើសកម្មភាពអ្វីទេ ព្រោះខ្លាចប៉ះទង្គិចជាមួយក្រុមប្រឆាំងរដ្ឋាភិបាល ។ ប៉ុន្តែ នៅពេលថ្មីៗនេះ ក្នុងពេលដែលលោកស្រី យីងឡាក់ អាចរងការជាប់ពិរុទ្ធពីបទធ្វេសប្រហែស ក្នុងកម្មវិធីទិញផលស្រូវជួយកសិករនោះ ក្រុមអាវក្រហម បានចាប់បង្ហាញពីជំហរខ្លួនកាន់តែខ្លាំង។ លោកណាតាវុត សៃគូយ៉ា ជាអ្នកទទួលខុសត្រូវសកម្មជនអាវក្រហមបានលើកឡើង នៅថ្ងៃអង្គារនេះថា សកម្មជនអាវក្រហមបានត្រៀមចុះក្រុងបាងកករួចហើយ ក្នុងរយៈពេល២៤ម៉ោងទៀតនេះ ដើម្បីការពារលទ្ធិប្រជាធិបតេយ្យ។ ក្រុមអាវក្រហមនឹងធ្វើបាតុកម្មគាំទ្រលោកស្រីយីងឡាក់ នៅសប្តាហ៍ក្រោយៗនេះ នៅតាមខេត្តភាគឥសានប្រទេស ដើម្បីបង្ហាញពីសមត្ថភាពតវ៉ារបស់ខ្លួន។
ដូច្នេះ អ្វីដែលគេបារម្ភពេលនេះ គឺការប៉ះទង្គិចរវាងក្រុមប្រឆាំង និងក្រុមគាំទ្ររដ្ឋាភិបាល។ យោងតាមលោក ប្រាយុត ចាន់ អូឆា ជាមេដឹកនាំកងទ័ពជើងគោកថៃដ៏មានឥទ្ធិពល ប្រសិនបើគ្រប់ភាគីមិនគោរពតាមវិធានច្បាប់នោះទេ នោះសង្គ្រាមស៊ីវិលនឹងផ្ទុះឡើង។ លោកបន្ថែមថា កងទ័ពថៃនឹងធ្វើគ្រប់យ៉ាងដើម្បីជាតិនិងប្រជាជន មិនមែនដើម្បីបក្សពួកណាមួយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ