វិបត្តិនយោបាយថៃ ៖ លោកស្រីយីងឡាក់ តាំងទីនៅក្រៅរាជធានី
ប្រមុខរដ្ឋាភិបាលថៃ លោកស្រី យីងឡាក់ ស៊ីនណាវ៉ាត់ ដែលក្រុមបាតុករបះបោរប្រឆាំងចង់ទម្លាក់ចេញពីអំណាចអស់ជាច្រើនខែ និងបានធ្វើឱ្យក្រុងបាងកកគាំងស្ទះ តាំងពីច្រើនសប្តាហ៍នោះ បានចាកចេញពីរាជធានី និងបានទៅតាំងទីស្នាក់ការ នៅចំងាយប្រមាណ១៥០គីឡូម៉ែត្រពីបាងកក ប៉ុន្តែប្រភពព័ត៌មានរបស់រដ្ឋាភិបាលមិនបានបញ្ជាក់ឈ្មោះភូមិឃុំដែលលោកស្រីយីងឡាក់កំពុងស្ថិតនៅនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
សេចក្តីជូនដំណឹងរបស់ការិយាល័យនាយករដ្ឋមន្ត្រីថៃ មិនបានបញ្ជាក់ឡើយថាអំពីចំនួនថ្ងៃដែលលោកស្រី យីងឡាក់បានចាកចេញពីទីក្រុងបាងកកទេ។ លោកស្រីបានលេចមុខជាសាធារណៈចុងក្រោយ នៅរាជធានី កាលពីថ្ងៃអង្គារទី ទី១៨ កុម្ភៈ សប្តាហ៍មុន និងត្រូវចូលបង្ហាញខ្លួននៅតុលាការចំពោះការចោទប្រកាន់ប្រព្រឹត្តអំពើពុករលួយ នៅថ្ងៃព្រហស្បតិ៍ ទី ២០កុម្ភៈ។ កិច្ចប្រជុំគណៈរដ្ឋមន្ត្រីទំនងជានឹងអាចត្រូវរៀបចំជាលើកទីមួយ នៅក្រៅក្រុង នៅថ្ងៃអង្គារទី ២៥កុម្ភៈស្អែកនេះ។ នេះបើតាមរដ្ឋមន្ត្រីក្រសួងការបរទេស ដែលរូបលោកផ្ទាល់ក៏មិនដឹងថាលោកស្រីនាយករដ្ឋមន្ត្រីតាំងទីនៅទីណាឱ្យពិតប្រាកដផង។
លោកស្រីនាយករដ្ឋមន្ត្រីបានសម្រេច រើនិងភៀសខ្លួនទៅនៅក្រៅក្រុង បន្ទាប់ពីបាងកកបានជាប់គាំង និងពេលខ្លះបានក្លាយជាសមរភូមិបញ្ចេញអំពើហិង្សា រវាងក្រុមបាតុករនិងប៉ូលិស។ អំពើហិង្សាកាលពីថ្ងៃអាទិត្យម្សិលមិញ លោកស្រីនាយករដ្ឋមន្ត្រីចាត់ទុកថាអំពើភេរវកម្ម បានបង្កជាលើកទីមួយ ក្នុងចំណោមមនុស្សស្លាប់បីនាក់ ឱ្យស្លាប់កុមារពីរនាក់ ម្នាក់ជាក្មេងប្រុសមានអាយុទើបតែបួនឆ្នាំប៉ុណ្ណោះមិនមែន ១២ឆ្នាំ ដូចការជូនដំណឹងបឋមឡើយ និងម្នាក់ជាទៀតជាក្មេងស្រីអាយុ៦ឆ្នាំ ស្លាប់ព្រោះរបួសធ្ងន់ពេក នៅព្រឹកមិញ។
គិតចាប់តាំងពីផ្ទុះវិបត្តិមក ជីវិតមនុស្ស២០នាក់បានបាត់បង់ ហើយជារៀងរាល់ពេល ក្រុមសកម្មជនប្រឆាំងនិងប៉ូលិសតែងទម្លាក់កំហុសដាក់គ្នាទៅវិញទៅមក។ ប៉ុន្តែនៅថ្ងៃនេះ ប្រមុខក្រុមប្រឹក្សាសន្តិសុខជាតិថៃ បានចង្អុលមុខក្រុមអ្នករៀបចំបាតុកម្មថាជាអ្នកទទួលខុសត្រូវលើអំពើហិង្សាពីរលើកចុងក្រោយនេះ។ រីឯក្រុមយោធា ជាថ្មីម្តងទៀត តាមរយៈលោកអគ្គមេបញ្ជាការកងទ័ព ប្រាយុទ្ធ ចាន់អូចា ដែលធ្លាប់ដឹកនាំធ្វើរដ្ឋប្រហារមុនៗបានបញ្ជាក់ជាថ្មី តាមកញ្ចក់ទូរទស្សន៍ នៅថ្ងៃចន្ទនេះ ថាគ្មានចេតនា ធ្វើអន្តរាគមន៍ក្នុងវិបត្តិនយោបាយឡើយ តែសូមឱ្យភាគីបក្សដិបក្សចូលចរចា។
ទាំងលោកអគ្គលេខាធិការអង្គការសហប្រជាជាតិ បាន គីមូន និងទាំងអង្គការយូនីសេហ្វ បានបញ្ចេញប្រតិកម្មនៅថ្ងៃនេះ អំពាវនាវមិនឱ្យបាតុករយកកូនចៅទៅលូកលំក្នុងចលនាបាតុកម្ម។ បាតុកម្ម ប្រឆាំងនឹងរដ្ឋាភិបាល ពេលខ្លះហិង្សាខ្លាំង ធ្វើឡើងក្នុងបំណង បង្ខំលោកស្រីយីងឡាក់នាយករដ្ឋមន្ត្រីចុះចេញពីតំណែង និងដើម្បីលុបបំបាត់ឥទ្ធិពលរបស់លោក ថាក់ស៊ីន ដែលពួកអ្នកប្រឆាំងយល់ថាជាអ្នកដឹកនាំរដ្ឋាភិបាលពីចម្ងាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ