ក្រុមជីហាតរដ្ឋអ៊ីស្លាមគំរាមសម្លាប់ចំណាប់ខ្មាំងជនជាតិជប៉ុន២នាក់
ក្រុមជីហាតរដ្ឋអ៊ីស្លាមនៅអ៊ីរ៉ាក់និងស៊ីរី បានគំរាមថានឹងសម្លាប់ជនជាតិជប៉ុន ២នាក់ ដែលពួកគេចាប់ជាចំណាប់ខ្មាំង ប្រសិនបើរដ្ឋាភិបាលជប៉ុនមិនបង់លុយ ២០០លានដុល្លារជាថ្នូរ នៅក្នុងរយៈពេល ៧២ម៉ោង។ ក៏ប៉ុន្តែ រដ្ឋាភិបាលក្រុងតូក្យូបានប្រកាសនៅថ្ងៃអង្គារនេះថា ខ្លួននឹងមិនធ្វើតាមការទាមទាររបស់ក្រុមភេរវជននេះជាដាច់ខាត។
ចុះផ្សាយនៅថ្ងៃ៖
ស្តាប់ - ០១:៤៨
នៅក្នុងខ្សែវីដេអូចុះផ្សាយតាមអ៊ីនធ័រនែត គេឃើញចំណាប់ខ្មាំងជនជាតិជប៉ុន ២នាក់ ក្នុងសម្លៀកបំពាក់ជាអ្នកទោសពណ៌ទឹកក្រូចអង្គុយលុតជង្គង់ ហើយនៅក្បែរនោះសកម្មជនជីហាតម្នាក់ស្លៀកពាក់ខ្មៅ បិទមុខជិត ដោយមានកាន់កាំបិតនឹងដៃ បាននិយាយជាភាសាអង់គ្លេសថា រដ្ឋាភិបាលជប៉ុនមានពេល ៧២ម៉ោង ដើម្បីបង់លុយ ២០០លានដុល្លារ ជាថ្នូរលោះជីវិតពលរដ្ឋជប៉ុនទាំងពីររូប។
សកម្មជនជីហាតរូបនេះក៏បានបញ្ជាក់ផងដែរថា ការទារលុយលោះចំណាប់ខ្មាំងនេះ គឺធ្វើឡើង ដើម្បីតបតនឹងជប៉ុនដែលចូលរួមផ្តល់ជំនួយជាលុយដល់ប្រតិបត្តិការវាយប្រហារលើក្រុមជីហាតរដ្ឋអ៊ីស្លាមនៅអ៊ីរ៉ាក់និងស៊ីរី។
គួរបញ្ជាក់ថា លោកស្ហ៊ីនហ្សូ អាបេ ដែលកំពុងបំពេញទស្សនកិច្ចក្នុងតំបន់ដើមបូព៌ាបានប្រកាសសន្យា កាលពីថ្ងៃសៅរ៍ថា ជប៉ុននឹងផ្តល់ជំនួយចំនួន ២៥០០លានដុល្លារ ដល់បណ្តាប្រទេសក្នុងតំបន់មជ្ឈិមបូព៌ា ព្រមទាំងជំនួយជាទឹកប្រាក់ចំនួន ២០០នលានដុល្លារផ្សេងទៀតដល់បណ្តាប្រទេស ដែលកំពុងប្រយុទ្ធប្រឆាំងនឹងក្រុមជីហាតរដ្ឋអ៊ីស្លាម។
ថ្លែងនៅថ្ងៃអង្គារនេះ ពីទីក្រុងហ្សេរុយសាឡឹមដែលលោកកំពុងបំពេញទស្សនកិច្ច លោកស្ហ៊ីនហ្សូ អាបេ បានបរិហារទង្វើរបស់ក្រុមជីហាត ហើយទាមទារឲ្យដោះលែងជាបន្ទាន់នូវចំណាប់ខ្មាំងជប៉ុនទាំងពីររូប។
ពីទីក្រុងតូក្យូវិញ អ្នកនាំពាក្យរដ្ឋាភិបាលជប៉ុនបានប្រកាសនៅក្នុងសន្និសីទសារព័ត៌មានថា ជប៉ុននឹងនៅតែបន្តប្រកាន់យកយ៉ាងខ្ជាប់ខ្ជួននូវជំហររបស់ខ្លួន គឺចូលរួមចំណែកក្នុងយុទ្ធនាការប្រយុទ្ធប្រឆាំងនឹងភេរវកម្មដោយមិនចុះញ៉ម បើទោះបីជាមានការគំរាមសម្លាប់ចំណាប់ខ្មាំងដោយក្រុមជីហាតរដ្ឋអ៊ីស្លាមក៏ដោយ។
គួររំឭកឡើងវិញថា ចាប់តាំងពីខែសីហាឆ្នាំ២០១៤មក ក្រុមជីហាតរដ្ឋអ៊ីស្លាមបានសម្លាប់ចំណាប់ខ្មាំងលោកខាងលិចចំនួន ៥រូបរួចមកហើយ គឺជនជាតិអាមេរិក ៣នាក់ និងជនជាតិអង់គ្លេស ២នាក់។ ក៏ប៉ុន្តែ នេះជាលើកទីមួយហើយ ដែលក្រុមជីហាតនេះគំរាមសម្លាប់ចំណាប់ខ្មាំងជនជាតិជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ