ជនជាតិអាមេរិកាំងម្នាក់ទៀតត្រូវក្រុមជីហាតនៃអង្គការរដ្ឋអ៊ីស្លាមប្រហារជីវិត
ក្រុមជីហាតនៃអង្គការរដ្ឋអ៊ីស្លាម នៅថ្ងៃអាទិត្យទី ១៦វិច្ឆិកា បានបញ្ចេញរូបភាពវីដេអូមួយដែលបានបង្ហាញថា ជនជាតិអាមេរិក លោកPeter Kassigត្រូវបានក្រុមនេះកាត់ករ ប្រហារជីវិត។ Peter Kassig អតីតទាហានអាមេរិកាំង នៅអ៊ីរ៉ាក់ បានប្រែក្លាយខ្លួនជាបុគ្គលិករបស់អង្គការមនុស្សធម៌ និងត្រូវបានក្រុមជីហាតចាប់ខ្លួន កាលពីឆ្នាំ២០១៣ នៅក្នុងទឹកដីស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
តាមរយៈវីដេអូចេញផ្សាយតាមអ៊ីនធ័នេត ក្រុមជីហាតនៃអង្គការរដ្ឋអ៊ីស្លាមបានអះអាងថា ខ្លួនបានប្រហារជីវិតចំណាប់ជនជាតិអាមេរិកាំង ម្នាក់ទៀត។ ខុសពីរូបភាពវីដេអូមុនៗ ដែលបានបង្ហាញសកម្មភាពកាត់ករចំណាប់ខ្មាំង រូបភាពវីដេអូដែលក្រុមជីហាតបញ្ចេញឲ្យឃើញនៅថ្ងៃអាទិត្យ នេះ បានបង្ហាញពេជ្ឈឃាត រុំបិទមុខម្នាក់ឈរ ដាក់ជើង ក្បែរក្បាលជនរងគ្រោះ ដែលស្រោចស្រពទៅដោយឈាម។ នៅក្នុងសំឡេងនិយាយជាជនជាតិអង់គ្លេស ពេជ្ឈឃាតបិទមុខអះអាងថា ក្បាលនៅលើដី ជាក្បាលរបស់ជនជាតិអាមេរិកាំង លោកPeter Kassig។
លោកPeter Kassig អាយុត្រឹម២៦ឆ្នាំ ជាប្រជាជនប្រទេសលោកខាងលិចទី៥ ដែលត្រូវពួកជីហាតនៃអង្គការរដ្ឋអ៊ីស្លាមប្រហារជីវិត ចាប់តាំងពីពួកនេះបានប្រកាសរដ្ឋអ៊ីស្លាម នៅលើទឹកដីភាគច្រើនរបស់ស៊ីរី និងអ៊ីរ៉ាក់។ កាលពីខែតុលាកន្លងទៅ ក្រុមជីហាតនៃអង្គការរដ្ឋអ៊ីស្លាមបានបញ្ចេញវីដេអូបង្ហាញការប្រហារជីវិតទៅលើលោកAlan Henning ជនជាតិអង់គ្លេសធ្វើការផ្នែកមនុស្សធម៌នៅ ស៊ីរី។ នៅចុងកន្ទុយវីដេអូកាលណោះ ក្រុមជីហាតធ្លាប់បានគំរាមកាត់ករPeter Kassig ដើម្បីសងសឹកនឹងសហរដ្ឋអាមេរិក។ ហើយ ក្នុងរូបភាពវីដេអូរបស់ក្រុមជីហាតនៅថ្ងៃនេះ គេឃើញផងដែរការប្រហារជីវិតទៅលើទាហានស៊ីរីដទៃ ដែលពួកជីហាតចាប់ខ្លួនបាន។
Peter Kassig ធ្លាប់ធ្វើជាទាហានបានប៉ុន្មានខែក្នុងប្រទេសអ៊ីរ៉ាក់។ ប៉ុន្តែ ដោយសារបញ្ហាសុខភាព Peter Kassigបានផ្លាស់ចេញពីអង្គភាព និងបានប្តូរជំនាញទៅជាអ្នកជួយសង្រ្គោះបន្ទាន់។ យុវជនរូបនេះទៅធ្វើជាជំនួយការរបស់ក្រុមមនុស្សធម៌ នៅក្នុងប្រទេសលីបង់សម្រាប់ជនភៀសខ្លួន ស៊ីរី។ នៅឆ្នាំ ២០១៣ Peter Kassig ត្រូវក្រុមជីហាតចាប់ខ្លួន នៅភាគខាងកើតស៊ីរី។ អាជ្ញាធរអាមេរិក និងឪពុកម្តាយរបស់ Peter Kassigបានលាក់ដំណឹងនេះអស់ជាងមួយឆ្នាំ និងទើបតែបញ្ចេញឲ្យដឹង បន្ទាប់ពីវីដេអូរបស់ក្រុមជីហាតកាលពីខែតុលា បានបង្ហាញថា Peter Kassigពិតជាត្រូវក្រុមនេះចាប់ជាចំណាប់ខ្មាំងមែន។
នាយករដ្ឋមន្រ្តី បារាំង និងអង់គ្លេស បានប្រតិកម្មភ្លាមៗ មុនប្រធានាធិបតីអាមេរិកា កាលពីថ្ងៃអាទិត្យ ក្រោយពីបានដំណឹងប្រហារជីវិតជនជាតិអាមេរិកាំង។ លោកប្រធានាធិបតីបារាំងអះអាងថា ការប្រហារជីវិតទៅលើជនបរទេសរឹតតែធ្វើឲ្យបារាំងមានឆន្ទះ ចង់ទៅប្រយុទ្ធប្រឆាំងនឹងក្រុមជីហាតកាន់តែខ្លាំង។
ការបញ្ចេញវីដេអូរបស់ក្រុមជីហាត ដែលបង្ហាញការប្រហារជីវិតចំណាប់ខ្មាំងអាមេរិកាំង ធ្វើនៅឡើងនៅជួនចំពេលដែលប្រធានាធិបតីអាមេរិក លោកបារ៉ាក់អូបាម៉ាបានថ្លែង ប្តេជ្ញាប្រយុទ្ធប្រឆាំងនឹងក្រុមជីហាតនៃអង្គការរដ្ឋអ៊ីស្លាម។ តាំងពីប្រទេសអូស្រ្តាលី ប្រធានាធិបតីអាមេរិកបានបដិសេធ មិនចងសម្ព័ន្ធភាពជាមួយប្រធានាធិបតីស៊ីរីដើម្បីរួមគ្នាប្រឆាំងនឹងសត្រូវរួម គឺក្រុមជីហាត។ សម្រាប់ប្រធានាធិបតីអាមេរិក លោកបាស្ហា អាល់អាសាដ អស់មានភាពស្របច្បាប់ជាប្រធានាធិបតីស៊ីរី ហើយការចងសម្ព័ន្ធភាពជាមួយលោកបាស្ហា អាល់អាសាដនឹងធ្វើឲ្យសម្ព័ន្ធអន្តរជាតិដែលកំពុងប្រយុទ្ធប្រឆាំងនឹងពួកជីហាត ចុះខ្សោយកម្លាំងទៅវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ