ដៃគូពិសេសជប៉ុននិងបារាំងចុះកិច្ចព្រមព្រៀងអភិវឌ្ឍន៍វិស័យយោធា
នៅថ្ងៃសុក្រទី ១៣មីនា ២០១៥នេះ ប្រទេសបារាំង និងជប៉ុន បានបោះជំហានរួមគ្នា ក្នុងនាមជាដៃគូយុទ្ធសាស្ត្រពិសេស ដោយបានចុះហត្ថលេខា នៅទីក្រុងតូក្យូ លើកិច្ចព្រមព្រៀង អភិវឌ្ឍន៍រួមគ្នា វិស័យការពារជាតិ បន្ថែមពីលើការពង្រឹងកិច្ចសហប្រតិបត្តិការនយោបាយការទូតប្រឆាំងនឹងភេរវនិយម។ ជាជំនួបថ្នាក់រដ្ឋមន្ត្រីការបរទេសនិងការពារជាតិរបស់បារាំងនិងជប៉ុន ឬហៅថាជំនួប២ បូក ២។
ចុះផ្សាយនៅថ្ងៃ៖ កែប្រែថ្ងៃទី៖
កិច្ចសហប្រតិបត្តិការជាច្រើនផ្នែក ត្រូវបានអនុម័តនាឱកាសជំនួប២បូក២ ដែលជាជំនួបរវាងរដ្ឋមន្ត្រីការបរទេស លោក Laurent Fabius និងការពារជាតិបារាំងលោក Jean-Yves Le Drianជាមួយសមភាគីជប៉ុនលោក Fumio Kishida និងលោក Gen Nakatani។ ជប៉ុនជាប្រទេសនៅតំបន់អាស៊ីតែមួយគត់ ដែលមានទំនាក់ទំនងលំដាប់នេះជាមួយបារាំង។ នេះបើតាមគូសបញ្ជាក់របស់លោកប្រមុខការទូតបារាំង ឡូរ៉ង់ ហ្វាប្យ៊ូស។ ប៉ុន្តែសម្រាប់ជប៉ុនវិញ ជប៉ុនធ្លាប់មានកិច្ចព្រមព្រៀងប្រភេទនេះជាមួយបីប្រទេសផ្សេងទៀត គឺសហរដ្ឋអាមេរិក អង់គ្លេស និងអូស្ត្រាលី។
លទ្ធផលដ៏សំខាន់នៃជំនួបពីរបូកពីរថ្ងៃសុក្រនេះ គឺការចុះហត្ថលេខាលើកកិច្ចព្រមព្រៀងអន្តររដ្ឋាភិបាល ស្តីពីការផ្ទេរសម្ភារៈបិរក្ខា និងបច្ចេកវិទ្យាយោធា ឱ្យគ្នាទៅវិញទៅមក។ ជាការបោះជំហានទៅមុខគួរឱ្យកត់សម្គាល់ ព្រោះ កិច្ចព្រមព្រៀងនេះ ក៏ជាបើកផ្លូវឱ្យបារាំងនិងជប៉ុន មានទស្សនវិស័យលើគម្រោងជាច្រើនផ្សេងទៀត ដូចជា ប្រព័ន្ធយន្តហោះគ្មានមនុស្សបើក Drone ឧទ្ធម្ភាគចក្រ និងអវកាស។
បារាំងបានសម្តែងការគាំទ្រនយោបាយសន្តិនិយមសកម្មរបស់ជប៉ុន និងគាំទ្រវត្តមានជប៉ុនក្នុងដំណោះស្រាយផ្សេងៗនៅពិភពលោក ដើម្បីសន្តិភាព ក្នុងន័យនេះបារាំងនិងជប៉ុនបានសម្រេចចែកចាយចំណេះដឹង និងបទពិសោធន៍ឱ្យគ្នា ដើម្បីប្រឈមនឹងការគំរាមកំហែងភេរវកម្ម។ ការផ្តោះប្តូរ ក៏នឹងត្រូវបង្កើនក្នុងវិបត្តិអន្តរជាតិ ដូចជាវិបត្តិនៅអ៊ីរ៉ាក់ ស៊ីរី និងអ៊ីរ៉ង់ ... សម្រាប់ឥស្សរជនទាំងបួន វិបត្តិអ៊ុយក្រែនត្រូវតែដោះស្រាយដោយគោរពអធិបតេយ្យភាពនិងបូរណភាពប្រទេសនោះ។ តូក្យូនិងប៉ារីសនឹងបង្កើនការផ្តោះប្តូរព័ត៌មានទាក់ទងនឹងទ្វីបអាហ្វ្រិក។ ជប៉ុនចង់រៀនពីបារាំងដើម្បីបានស្គាល់អាហ្វ្រិកឱ្យបានច្រើនជាមុន។ នេះបើតាមការគូសបញ្ជាក់របស់តំណាងជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ