ហុងកុងបង្ហាញផែនការកំណែទម្រង់បោះឆ្នោត ដោយមិនខ្វល់ពីអ្នកប្រជាធិបតេយ្យ
រដ្ឋាភិបាលហុងកុង បានបង្ហើបបង្ហាញនៅថ្ងៃពុធនេះ អំពីផែនទីចង្អុលផ្លូវ សម្រាប់ការបោះឆ្នោតជ្រើសរើសប្រមុខដឹកនាំហុងកុង ឆ្នាំ២០១៧ នៅចំពោះមុខក្រុមប្រឹក្សាសភា។ ប៉ុន្តែជាកំណែទម្រង់បោះឆ្នោតសកល បែបចិនប៉េកាំង ដែលជាហេតុធ្វើឱ្យតំណាងគណបក្សប្រជាធិបតេយ្យ នាំគ្នាងើបដើរចេញពីតុប្រជុំ ដើម្បីសម្តែងការប្រឆាំង។
ចុះផ្សាយនៅថ្ងៃ៖
នៅចំពោះមុខសភា លោកស្រី ការី ឡាំ (Carrie Lam) ប្រមុខដឹកនាំលំដាប់ទីពីររបស់ហុងកុង បានបង្ហាញ ផែនការធ្វើកំណែទម្រង់បោះឆ្នោតជ្រើសរើសអភិបាលក្រុងហុងកុង ថាជាការបោះឆ្នោត ដោយសេរីនិងដោយសកល។ នៅឆ្នាំ២០១៧ ពលរដ្ឋហុងកុង ជាម្ចាស់ឆ្នោត អាចបញ្ចេញសំឡេង ជ្រើសតាំង ប្រមុខដឹកនាំរបស់ខ្លួនបាន។
បើតាមលោកស្រីឡាំដដែល ការបោះឆ្នោតនឹងប្រព្រឹត្តទៅ ដោយឈរលើគោលការណ៍ “សំឡេងមួយឆ្នោតមួយ” ដែលសភាប្រជាជនចិន អ្នកគ្រប់គ្រងការបោះឆ្នោតរបស់បក្សកុម្មុយនិស្តចិន បានអនុម័តកំណត់ឡើង កាលពីខែសីហា ២០១៤។ មិនតែប៉ុណ្ណោះ សំណើច្បាប់បោះឆ្នោតនេះ បានតាក់តែងឡើងដោយផ្អែកទាំងស្រុងទៅលើច្បាប់ជាមូលដ្ឋានគ្រឹះរបស់ហុងកុងផង និងដោយគោរពសេចក្តីសម្រេចរបស់អាជ្ញាធរក្រុងប៉េកាំងផង។ ដូច្នេះគ្រប់បក្ស គ្រប់សហគមន៍ពិតជាអាចបញ្ចេញមតិរបស់ខ្លួនបានពេញលេញ។ នេះបើតាមការធានាអះអាងរបស់លោកស្រី ការី ឡាំ។
ប៉ុន្តែ មានបេក្ខជន តែពីរនាក់ ឬយ៉ាងច្រើនបំផុតបីនាក់ប៉ុណ្ណោះ ដែលអាចឈរឈ្មោះឱ្យគេបោះឆ្នោត។ ហើយបេក្ខជនទាំងអស់នោះត្រូវជ្រើសរើសដោយគណៈកម្មាធិការមួយដែលមានសមាជិកសរុប ១២០០នាក់។ ល្បាយសមាសភាគរបស់គណៈកម្មាធិការនេះ មានទម្រង់ដូចជាគណៈកម្មាធិការមុនដែលមានសមត្ថកិច្ចជ្រើសតាំងអភិបាលក្រុង និងដែលសុទ្ធសឹងជាមនុស្សរបស់ក្រុងប៉េកាំង។
សម្រាប់ក្រុមអ្នកប្រជាធិបតេយ្យ ជ្រើសរើសបេក្ខជនឱ្យឈរឈ្មោះ គឺការបោះឆ្នោតឱ្យមនុស្សរបស់ប៉េកាំង។ ហេតុដូច្នេះហើយបានជាតំណាងរាស្ត្របក្សស៊ីវិល ដែលជាអ្នកប្រជាធិបតេយ្យ បាននាំគ្នាដើរចេញពីសភា ដើម្បីបរិហារទង្វើរបស់រដ្ឋាភិបាលហុងកុង និងបានសន្យាបើកយុទ្ធនាការប្រឆាំងនឹងសំណើច្បាប់នេះ ព្រមទាំងស្នើទៅកាន់មតិសាធារណៈហុងកុងឱ្យបន្តទាមទារការបោះឆ្នោតដោយសេរីនិងសកលពិតៗ។ ដើម្បីបុព្វហេតុបោះឆ្នោតជ្រើសរើសប្រមុខដឹកនាំដោយគ្មានការជ្រៀតជ្រែកពីប៉េកាំងក្រុមអ្នកប្រជាធិបតេយ្យរាប់សិបពាន់ធ្លាប់បានចុះថ្នល់ ធ្វើបាតុកម្ម បិទខ្ទប់សង្កាត់កណ្តាលក្រុង អស់ជាច្រើនខែ មុននឹងត្រូវអាជ្ញាធរគាស់រំលើងចេញនៅខែធ្នូចុងឆ្នាំ២០១៤នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ