អាកាសធាតុក្តៅខ្លាំងសម្លាប់មនុស្សកាន់តែច្រើនឡើងៗនៅប៉ាគីស្ថាន
បន្ទាប់ពីប្រទេសឥណ្ឌា ដល់វេនប្រទេសប៉ាគីស្ថានម្តងដែលរងគ្រោះព្រោះអាកាសធាតុក្តៅខ្លាំង។ បើតាមតួលេខរបស់អាជ្ញាធរមូលដ្ឋាន នៅភាគខាងត្បូងប្រទេស មានស្លាប់យ៉ាងហោចណាស់ ៤៥០នាក់ ក្នុងរយៈពេលបីថ្ងៃចុងក្រោយនេះ។ អ្វីជាការកត់សម្គាល់ខ្លាំង ចំនួនមនុស្សស្លាប់បានកើនឡើងទ្វេដង បើប្រៀបទៅនឹងនៅថ្ងៃម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៣
សីតុណ្ហភាពបានឡើងដល់៤៥អង្សារ អាកាសធាតុឡើងក្តៅខ្លាំង និងថប់ខ្យល់ បានផ្តាច់ជីវិតមនុស្សអស់ជាង៤៥០នាក់ ភាគច្រើនជាប្រជាជនរស់នៅក្នុងក្រុងការ៉ាហ្ស៊ី ក្រុងសេដ្ឋកិច្ចដ៏សំខាន់ របស់ប៉ាគីស្ថាន ដែលមានពលរដ្ឋសរុបជាង២០លាននាក់។
តាំងពីថ្ងៃម្សិលមិញមក អាជ្ញាធរថ្នាក់ជាតិ តាមរយៈរដ្ឋាភិបាល បានស្នើសុំជំនួយពីយោធា និងពីកងកម្លាំងយុទ្ធជនកងរក្សាស្ម័គ្រ Rangers ឱ្យមកជួយសង្គ្រោះជនរងគ្រោះ។ ចំណែករដ្ឋាភិបាលខេត្តផ្ទាល់តែម្តងវិញ បានចេញក្រិត្យប្រកាសភាពអាសន្ននៅតាមគ្រប់មន្ទីរពេទ្យ កោះហៅវេជ្ជបណ្ឌិត ដែលកំពុងសម្រាកវិស្សមកាល ឱ្យមកធ្វើការវិញទាំងអស់ ព្រមទាំងបង្កើនចំនួនថ្នាំបំរុងក្នុងឃ្លាំង។
អាកាសធាតុក្តៅហួតហែងមរណៈនេះ កាន់តែធ្ងន់ធ្ងរបន្ថែមទៀតដោយហេតុតែមានបញ្ហាចរន្តអគ្គិសនី។ ភ្លើងដាច់កាន់តែញយឡើងៗ ស្ទើរតែជារៀងរាល់ថ្ងៃ បង្កឱ្យការបូមទឹកយកប្រើប្រាស់ ត្រូវរអាក់រអួលខ្វះទឹកបរិភោគ។
អត្រាមរណៈខ្ពស់ព្រោះអាកាសធាតុក្តៅខ្លាំង នៅប៉ាគីស្ថាននេះ បានកើតឡើងតែប្រមាណមួយខែក្រោយប្រទេសឥណ្ឌា ដែលបានស្គាល់រលកកម្តៅជាប្រវត្តិសាស្ត្រ សម្លាប់មនុស្សអស់ជាងពីរពាន់នាក់ កាលពីខែឧសភាមុន។ ម្យ៉ាងទៀត អាកាសធាតុក្តៅខ្លាំងនេះ បានធ្លាក់មកជួនចំពេលបណ្តាជនប៉ាគីស្ថានភាគច្រើនជាអ្នកសាសនាអ៊ីស្លាម ទើបចាប់ផ្តើមប្រារព្ធពិធីតមអាហារ មិនបរិភោគអាហារ និងទឹក នៅពេលថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ