ខ្យល់ក្តៅសម្លាប់មនុស្សជាង ៨០០នាក់ នៅឥណ្ឌា
តែក្នុងមួយសប្តាហ៍ អាកាសធាតុក្តៅខ្លាំង បានសម្លាប់មនុស្ស ជាង ៨០០នាក់ នៅប្រទេសឥណ្ឌា។ ទីភ្នាក់ងារព្យាករណ៍ឧតុនិយមឥណ្ឌា បានបង្ហាញថា ធាតុអាកាសក្តៅ នឹងមិនថមថយឥទ្ធិពលរបស់ខ្លួន ហើយកំដៅ នៅថ្ងៃពុធទី ២៧ឧសភា នឹងឡើងដល់៤៥អង្សារសេ។ អាជ្ញាធររបស់រដ្ឋដែលប៉ះពាល់ដោយរលកកំដៅ នៅ ឥណ្ឌាបានចាត់វិធានការជួយសង្រ្គោះបន្ទាន់ ក៏ដូចជាណែនាំឲ្យប្រជាជនឲ្យស្ថិតនៅក្រោមម្លប់ និងបរិភោគទឹកឲ្យបានច្រើន ដើម្បីទប់ទល់នឹងការអស់ទឹកពីខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
ទីភ្នាក់ងារឧតុនិយមឥណ្ឌាបានទាញសញ្ញាប្រកាសអាសន្ន ព្រោះថា ធាតុអាកាសក្តៅដែលឥណ្ឌា ជួបប៉ុន្មានថ្ងៃមកហើយ នឹងមិនបន្ថយឥទ្ធិពលរបស់ខ្លួនទេ នៅប៉ុន្មានថ្ងៃខាងមុខ។ នៅថ្ងៃពុធ គេព្យាករថា ធាតុអាកាសក្តៅខ្លាំងនឹងឡើងដល់ ៤៥អង្សារសេ។ តួលេខចុងក្រោយបានបង្ហាញថា នៅទូទាំងប្រទេស អាកាសធាតុក្តៅខ្លាំង បានសម្លាប់មនុស្សជាង ៨០០នាក់ នៅក្នុងពេលតែមួយសប្តាហ៍។ ស្ថិតនៅភាគខាងត្បូងឥណ្ឌា រដ្ឋអ៊ីនដ្រា ប្រាដេស ដែលមានកម្រិតសីតុណ្ហភាពឡើង ដល់ ៤៧អង្សារសេ កាលពីថ្ងៃចន្ទ រងគ្រោះខ្លាំងជាងគេ។ ធាតុអាកាសក្តៅ ខ្លាំង នៅរដ្ឋនេះ បានសម្លាប់មនុស្សជាង ៥០០នាក់។
ជារៀងរាល់ឆ្នាំ ឥណ្ឌារងគ្រោះដោយសារអាកាសធាតុក្តៅខ្លាំង។ នៅឥណ្ឌា ធាតុអាកាសចាប់ផ្តើមក្តៅខ្លាំង នៅរដូវក្តៅ។ តាមអ្នកជំនាញឧតុនិយម នៅឆ្នាំនេះ ធាតុអាកាសក្តៅខ្លាំង កើតឡើង មុនកាលកំណត់ និងដោយសារតែខ្វះទឹកភ្លៀង។ ក្នុងមួយឆ្នាំៗ អាកាសធាតុក្តៅខ្លាំងសម្លាប់ប្រជាជនឥណ្ឌា ជាច្រើនពាន់នាក់ ដែលភាគច្រើន ជាអ្នកក្រីក្រ និងអ្នកដែលធ្វើការនៅតាមទីវាល ក្រោមកំដៅថ្ងៃ ដូចជាកសិករ ឬអ្នកធាក់រឺម៉ក នៅតាមទីក្រុង ជាដើម។ មនុស្សភាគច្រើនស្លាប់ ដោយសារតែបាត់បង់ទឹកអស់ពីខ្លួន។
ប្រឈមមុខនឹងគ្រោះធម្មជាតិ អាជ្ញាធររបស់រដ្ឋនីមួយៗដែលរងគ្រោះ ដោយអាកាសធាតុក្តៅ បានធ្វើយុទ្ធនាការឃោសនា តាមប្រព័ន្ធផ្សព្វផ្សាយ លើកទឹកចិត្ត ឲ្យមនុស្សស្ថិតនៅក្នុងម្លប់ ឬ ពាក់មួក នៅពេលដើរចេញក្រៅ និងត្រូវបរិភោគទឹកឲ្យបានច្រើន។
យោងតាមកាសែត ស្រុកឥណ្ឌា ទឹកដីមួយភាគធំរបស់ឥណ្ឌា រួមទាំងរដ្ឋធានី ញូវដេលី រងគ្រោះដោយរលកកំដៅ។ តាមការព្យាករណរបស់អ្នកឧតុនិយម ធាតុអាកាសក្តៅ នឹងមិនបន្ថយអានុភាពរបស់ខ្លួនទេ រហូតដល់ចុងខែ ឧសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ