ជប៉ុនបើកសន្និសីទអន្តរជាតិស្តីពីសិទ្ធិស្ត្រី
នៅថ្ងៃសុក្រទី២៨ សីហានេះ ទីក្រុងតូក្យូ បានបើកសន្និសីទអន្តរជាតិ ដែលមានរយៈពេល២ថ្ងៃ ដើម្បីជជែកពិភាក្សា ពីការលើកកំពស់សិទ្ធិស្ត្រី និងការជំរុញឲ្យមានសមភាព រវាងបុរសនិងស្រ្តី នៅក្នុងវិស័យការងារ ក្រោមអធិបតីភាព របស់លោកស៊ិនហ្សូ អាបេ នាយករដ្ឋមន្ត្រីជប៉ុន។ សង្គមជប៉ុន ជាសង្គមដែលផ្តល់តម្លៃខ្ពស់ ឲ្យតែមនុស្សប្រុស ត្រូវបានរបាយការណ៍ប្រចាំឆ្នាំនៃវេទិការសេដ្ឋកិច្ចពិភពលោក ចាត់ថ្នាក់ នៅលេខរៀងទី១០៤ ក្នុងចំណោម ១៤២ប្រទេស ដែលនេះមានន័យថា ថ្វីត្បិតតែជប៉ុន ជាប្រទេសជឿនលឿន មានសេដ្ឋកិច្ចរឹងមាំ ប៉ុន្តែក្នុងវិស័យសមភាពរវាងស្តី្រ និងបុរស គឺជប៉ុនស្ថិតនៅក្រោយគេ ច្រើនណាស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:៤២
នេះគឺជាលើកទីពីរ ហើយដែលមានការបើកសន្និសីទអន្តរជាតិ ស្តីពីស្រ្តី នៅក្រុងតូក្យូ។ កាលពីឆ្នាំទៅ ឆ្នាំ២០១៤ ជប៉ុនក៏បានរៀបចំការជួបជុំពិភាក្សា ស្តីពីសិទ្ធិស្រី្ត ដោយបានទទួលជោគជ័យ និងការអបអរជាខ្លាំង ទើបគេសម្រេចរៀបចំម្តងទៀត នៅក្រុងតូក្យូដដែល ក្នុងឆ្នាំ២០១៥នេះ។ សន្និសីទអន្តរជាតិនេះ មានឈ្មោះជាផ្លូវការថា World Assembly for Women in Tokyo (WAW !)។ សន្និសីទនេះ មិនមែនជាសន្និសីទអន្តរជាតិផ្លូវការ ដែលរៀបចំដោយអង្គការអន្តរជាតិណាមួយទេ ប៉ុន្តែជាសន្និសីទ ដែលរៀបចំឡើង ក្រោមការផ្តួចផ្តើមគំនិត របស់រដ្ឋាភិបាលជប៉ុន ដោយផ្ទាល់តែម្តង។ ដូចកាលពីលើកមុនដែរ ជប៉ុនបានអញ្ជើញមនុស្សចូលរូម ប្រមាណជា ១៥០នាក់ មកពីបណ្តា ៤០ប្រទេស ដែលមានទួនាទីការងារ ក្នុងការលើកកំពស់សិទ្ធិស្ត្រី។
“សង្គមមួយដែលស្ត្រីបញ្ចេញពន្លឺ”
ក្រៅពីលោក ស៊ិនហ្សូ អាបេ ដែលអញ្ជើញចូលរួមបើកកម្មវិធី កាលពីឆ្នាំទៅ គេបានអញ្ជើញ លោកស្រី គ្រីស្ទីន ឡាហ្កាដ អគ្គនាយកមូលនិធិរូបិយវត្ថុអន្តរជាតិ ចូលរួមជាកិត្តិយស។ ចំណែកឆ្នាំនេះ គឺមានលោកស្រី អេឡេន ចនសុន សៀរលីហ្វ ដែលជាប្រធានាធិបតីប្រទេសលីបេរីយ៉ា និងជាជ័យលាភី ពានរង្វាន់ណូបែលសន្តិភាព ដែលជាអ្នកបើកវេទិកាពិភាក្សា រយៈពេល២ថ្ងៃ ស្តីពីការលើកកំពស់សមភាព រវាងស្រ្តី និងបុរស។
សន្និសីទអន្តរជាតិនេះ គឺជាឆន្ទៈរបស់រដ្ឋាភិបាលលោក ស៊ិនហ្សូ អាបេ នាយករដ្ឋមន្ត្រីជប៉ុន ដែលបានប្តេជ្ញាថា នឹងធ្វើកំណែទម្រង់សង្គម ដើម្បីផ្តល់តម្លៃដល់ស្តី្រ ឲ្យបានល្អប្រសើរ។ រដ្ឋាភិបាលជប៉ុន បានប្រើពាក្យស្លោកមួយថា “សង្គមមួយដែលស្រ្តីបញ្ចេញពន្លឺ” ដែលពាក្យស្លោកនេះ គឺជាពាក្យស្លោក របស់សន្និសីទ អន្តរជាតិនេះតែម្តង ពោលគឺជប៉ុន ព្យាយាមអភិវឌ្ឍន៍សង្គមរបស់គេ ទាក់ទងនឹងសិទ្ធិស្ត្រី ប៉ុន្តែគេមិនមែនបិទទ្វារ ធ្វើតែម្នាក់ឯងទេ តែគេអញ្ជើញមនុស្ស មកពីបណ្តាប្រទេស រឺអង្គការអន្តរជាតិនានា ដើម្បីចែករំលែកបទពិសោធន៍គ្នា ទាក់ទងទៅនឹងការលើកកំពស់ សមភាព រវាងស្រ្តីនិងបុរស។ ប្រធានបទស្នូល នៃការពិភាក្សាគ្នាលើកនេះ គឺទាក់ទងនឹង ការស្វែងរកវិធីសាស្ត្រ ដើម្បីជំរុញ និងលើកកំពស់តួនាទីស្ត្រី នៅក្នុងវិស័យកាងារ។
ជប៉ុនជាប់លេខ១០៤ ខាងការគោរពសិទ្ធិស្ត្រី៖
សង្គមនីមួយៗ មានបញ្ហា និងចំណុចខ្សោយ ផ្សេងៗគ្នា។ មិនមែនសេដ្ឋកិច្ចរីកចំរើន មានការជឿនលឿនគ្រប់វិស័យ អ្វីៗ នឹងល្អគ្រប់យ៉ាង ទាំងអស់នោះទេ។ ប៉ុន្តែយើងត្រូវទទួលស្គាល់ថា កាត្តារីកចំរើនសេដ្ឋកិច្ច គឺជាកម្លាំងចលករមួយ ដែលនឹងរុញច្រានវិស័យផ្សេងទៀត ក្នុងសង្គម ឲ្យរីកចំរើនដែរ ប៉ុន្តែល្គិកណា ទាល់តែថ្នាក់ដឹកនាំ យកចិត្តទុកដាក់ ខំប្រឹងជំរុញដែរ។ ដូចជាជប៉ុននាពេលនេះអញ្ចឹង។ នេះជាលើកទីមួយហើយ ដែលថ្នាក់ដឹកនាំរដ្ឋាភិបាលជប៉ុន ចេញមុខធ្វើកំណែទម្រង់សង្គម ដើម្បីលើកកំពស់ការគោរពសិទ្ធិស្រ្តី នៅជប៉ុន។
ជាឧទាហរណ៍ ហ្វីលីពីន មិនមែនជាមហាអំណាចសេដ្ឋកិច្ចអីទេ តែបើនិយាយពីការគោរពសិទ្ធិ សមភាពរវាងស្ត្រីនិងបុរស គឺ ហ្វីលីពីន ជាប់លេខ៩ ល្អជាងជប៉ុនឆ្ងាយណាស់ ដែលជាប់លេខ១០៤។ កម្ពុជាយើង ដែលយើងគ្រប់គ្នា តែងតែទន្ទេញជាប់មាត់ថា សង្គមខ្មែរ ជាសង្គមមាតាធិបតេយ្យ ឲ្យតម្លៃស្ត្រីជាធំហ្នឹង នៅពីក្រោយជប៉ុនទៅទៀត គឺជាប់លេខ១០៨ ឯណោះ។ ទាំងនេះ គឺដោយសារតែសង្គមខ្មែរយើង នៅបិទជិត។ មនុស្សស្រី ត្រូវជាប់ឃុំ ក្នុងរនាំងប្រពៃណី ត្រូវគោរពឪពុកម្តាយ គោរពប្តី ជាដើម។ អំពើហឹង្សាលើស្រ្តី ការជួញដូរផ្លូវភេទ ការចាប់បង្ខំកូនស្រីឲ្យរៀបការ ទាំងអស់នេះ ជាចំណុចដែលសង្គមយើង ត្រូវចោទសួរ ដើម្បីរកវិធីកែលម្អ។
ការពិតទៅ អ្វីៗ វាអាស្រ័យទៅលើលក្ខណៈរបស់សង្គមនីមួយ ដោយយោងទៅ តាមប្រពៃណី សាសនា និងប្រវត្តិសាស្ត្រជាដើម។ ក្នុងចំណោមប្រទេសដែលជាប់លេខអាក្រក់ជាងគេ ខាងការមិនផ្តល់តម្លៃឲ្យមនុស្សស្រី គឺមានភាគច្រើន ជាប្រទេស ប្រកាន់សាសនាអ៊ីស្លាមតឹងរឹង។ ចំណែកជប៉ុនវិញ មិនមែនកត្តាសាសនាទេ តែជាកត្តាប្រពៃណី ទំនៀមទំលាប់តែម្តង ដែលផ្តល់តម្លៃខ្ពស់ ទៅឲ្យមនុស្សប្រុស ច្រើនជាងមនុស្សស្រី។ ទាក់ទងនឹងវិស័យការងារ សង្គមជប៉ុន គេផ្តល់តម្លៃឲ្យការងារណាស់ ម្នាក់ប្រឹងប្រែងធ្វើការងារ រហូតដល់ដេកនៅកន្លែងធ្វើការ ក៏មានដែរ។ កន្លងមក នរណាក៏គេដឹងដែរថា មានតែបុគ្គលិកជនជាតិជប៉ុនទេ ដែលហ៊ានសម្លាប់ខ្លួន ដោយសារតែធ្វើការងារមិនបានជោគជ័យ។ ដូច្នេះ សង្គមជប៉ុន តាំងពីដើមមក យល់ថា មានតែមនុស្សប្រុសទេ ដែលស៊ូនឹងការងារ អាចទ្រាំទ្របានទាំងកម្លាំងកាយ និងស្មារតី ខុសពីមនុស្សស្រី ដែលជាភេទទន់ខ្សោយ បានតែធ្វើកិច្ចការផ្ទះ កំប៉ិកកំប៉ុក តែប៉ុណ្ណោះ។
ប៉ុន្តែសង្គមនិមួយៗ វាប្រែប្រួល និងវិវឌ្ឍន៍ទៅតាមសម័យកាល។ ទាក់ទងនឹងវិស័យនេះ សង្គមជប៉ុនមានរបត់រីកចំរើន នៅយឺតណាស់ ដោយសារតែមនុស្សជប៉ុន ជាមនុស្សស្រលាញ់ប្រពៃណីបូរាណ គោរពចាស់ព្រឹទ្ធាចារ្យ។ ដូច្នេះ មានរឿងខ្លះ ដែលធ្វើឲ្យប៉ះពាល់ ដល់ទំនៀមទំលាប់បូរាណ គឺគេមិនសូវជាចង់ លើកមកនិយាយទេ។ ដូច្នេះ យើងឃើញថា ឆន្ទៈរបស់លោក ស៊ិន ហ្សូអាបេ ដែលលើកយកបញ្ហាសិទ្ធិស្ត្រី មកជាកម្មវិធីនយោបាយរបស់លោកនេះ គឺជារឿងមួយ ដែលគួរឲ្យកោតសរសើរណាស់ ព្រោះអី ព្រោះថាលោក បានមើលទៅលើតថៈភាពជាក់ស្តែង ក្នុងសង្គម មិនមែនធ្មេចភ្នែក ស្រម៉ៃទៅ តែកាលពីអតីតកាលចាស់គម្រិល រាប់ពាន់ឆ្នាំនោះទេ។ ធ្វើបែបនេះ ទើបសង្គមរីកចំរើន ដើរទៅមុខ។
បើកចិត្តឲ្យទូលាយ ផ្លាស់ប្តូរផ្នត់គំនិត លើកកំពស់ស្ត្រី ដើម្បីចំណេញទាំងអស់គ្នា៖
លោកស្រី សៀរលីហ្វ ប្រធានាធិបតីលីបេរីយា ដែលបានថ្លែងបើកសន្និសីទ នាក្រុងតូក្យូ បាននិយាយពាក្យមួយឃ្លា មានខ្លឹមសារថា “ការលើកកំពស់ស្រី្ត គឺបានផលប្រយោជន៍រួមទាំងអស់គ្នាក្នុងសង្គម ព្រោះថាមនុស្សប្រុស និងមនុស្សស្រី មានបទពិសោធន៍ខុសគ្នា ក្នុងការដោះស្រាយបញ្ហា ដូច្នេះ ការជំរុញឲ្យមនុស្សស្រី មានសិទ្ធិស្មើមនុស្សប្រុស គឺ ជំរុញឲ្យមានការច្នៃប្រឌិតខ្ពស់ ការបង្កើតថ្មី និងការសម្រេចលទ្ធផល ដោយវិជ្ជមាន ច្រើន ជាជាងមនុស្សប្រុសធ្វើតែឯង”។
វិធានការមានច្រើន ប៉ុន្តែលទ្ធផលជាក់ស្តែង នៅមានស្តួចស្តើងនៅឡើយ។ កំណែទម្រង់សង្គម គឺត្រូវធ្វើឡើង តាមរយៈ ការតាក់តែងច្បាប់ បទដ្ឋានថ្មីៗ ដែលតំរូវឲ្យមនុស្ស នាំគ្នាគោរព។ មួយវិញទៀត គឺរៀបចំការជជែកដេញដោល ដូចដែលជប៉ុនធ្វើក្នុងពេលនេះ ដើម្បីពញ្ញាក់ស្មារតីមហាជន ដាស់តឿន និងកែប្រែផ្នត់គំនិតចាស់គំរិល របស់មនុស្សក្នុងសង្គម។ ទោះបីជាអ្វីៗនៅមិនទាន់ល្អប្រសើរ ស្រី្តជប៉ុននៅតែទទួលរងការរើសអើង ពីសំណាក់មនុស្សប្រុស នៅកន្លែងធ្វើការមែនពិត ប៉ុន្តែបើប្រៀបធៀបទៅ កាលពី១០ឆ្នាំមុន ឃើញថាមនុស្សស្រីជប៉ុន មានភាពងាយស្រួលច្រើន ជាពិសេសក្នុងការបង្កើតក្រុមហ៊ុន មុខរបររកស៊ី ដោយខ្លួនឯង។ ការបើកទូលាយផ្នត់គំនិត ការបញ្ចេញអាកប្បកិរិយា ផ្តល់តម្លៃឲ្យមនុស្សស្រីនេះ សំខាន់ណាស់ ហើយបញ្ហានេះ ជាបញ្ហា ដ៏សែនលំបាក មិនងាយ ផ្លាស់ប្តូរមួយថ្ងៃបានភ្លាមទេ។
ជំរុញក្រុមហ៊ុន ឲ្យផ្តល់មុខតំណែងគ្រប់គ្រង ដល់ស្រ្តីឲ្យបានច្រើន៖
គោលនយោបាយរដ្ឋាភិបាលជប៉ុនពេលនេះ គឺធ្វើយ៉ាងណា ជំរុញឲ្យមានមនុស្សស្រី បានទទួលតួនាទី ដឹកនាំឲ្យបានច្រើន។ ដើម្បីឆ្លើយតបនឹងយុទ្ធសាស្ត្រនេះ រដ្ឋសភាជប៉ុន ទើបតែបានអនុម័តច្បាប់ថ្មីមួយ ដោយតម្រូវឲ្យ សហគ្រាស រឺក្រុមហ៊ុនណា ដែលមានបុគ្គលិកចាប់ពី ៣០០នាក់ ឡើងទៅ ត្រូវដាក់ចេញនូវ គម្រោងផែនការ ជាតួលេខជាក់ស្តែង ដើម្បីជ្រើសរើសមនុស្សស្រី ទៅក្នុងមុខតំណែងគ្រប់គ្រង និងចាត់ចែង ក្នុងក្រុមហ៊ុន។
ទន្ទឹមនឹងនេះ រដ្ឋាភិបាលជប៉ុន ទើបបានដាក់ចេញគម្រោងសងសង់ កន្លែងថែរក្សាទារក ឲ្យបានយ៉ាងហោចណាស់ ៤សែនកន្លែង បន្ថែមទៀត ពីនេះរហូតដល់ឆ្នាំ ២០១៨ ដើម្បីសម្រាលបន្ទុក ស្ត្រីដែលត្រូវបែងចែកពេលវេលា រវាងការងារ និងការមើលថែកូន។ ដូចយើងដឹងស្រាប់ ថា ការលំបាករបស់មនុស្សស្រ្តី គឺគ្នាត្រូវពរពោះ សម្រាលកូន ហើយត្រូវមើលថែរក្សាកូនទៀត។ ចំណុចនេះហើយដែលធ្វើឲ្យស្ត្រីខ្លះ ត្រូវបង្ខំចិត្ត ឈប់ពីការងារ ទាំងមនុស្សនោះ ជាមនុស្សមានសមត្ថភាពខ្ពស់ ក្នុងការងារក៏ដោយ។ នេះជារឿងមួយ ខាតបង់ធំណាស់។ បន្ថែមពីនេះ ជប៉ុននឹងលើកឡើងនូវវិធានមួយចំនួន ដើម្បីជំរុញ ឲ្យមនុស្សប្រុស ឈប់សំរាក ដើម្បីមើលថែរក្សាកូនដែរ ព្រោះនេះជាតួនាទីទាំងអស់គ្នា មិនមែនជារបស់ស្រ្តី តែម្នាក់ឯងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ