ស្ត្រីអាមេរិកពីរនាក់ជោគជ័យលើវិញ្ញាសារបស់សាលាយោធាដ៏ល្បី Ranger School
ស្ត្រីអាមេរិកពីរនាក់បានទទួលជោគជ័យជាលើកដំបូងគេបង្អស់ លើការហ្វឹកហ្វឺនដ៏លំបាករបស់សាលាយោធាអាមេរិកដ៏មានកិត្យានុភាពឈ្មោះ Ranger School។ ការជោគជ័យនេះជានិមិត្តរូបដ៏សំខាន់មួយ សម្រាប់អ្នកការពារសិទ្ធិស្រ្តី ក្នុងការទទួលបានរាល់មុខតំណែងប្រយុទ្ធនានាក្នុងជួរកងទ័ពអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
ក្នុងសេចក្តីថ្លែងការណ៍មួយរាយការណ៍ដោយសារពត៌មាន AFP កាលពីថ្ងៃអង្គារម្សិលមិញបានឲ្យដឹងថា លោក John M. McHugh រដ្ឋលេខាធិការនៃកងទ័ពអាមេរិក បានសរសេរកោតសរសើរពីជោគជ័យនេះថា៖ សូមអបអរសាទរចំពោះរាល់សមាជិកថ្មីរបស់ Ranger ទាំងអស់។ សម័យប្រលងនេះបានសបញ្ជាក់ឲ្យឃើញថា បុគ្គលគ្រប់រូបទោះជាភេទអ្វីក៏ដោយ ក៏អាចអភិវឌ្ឈន៍សក្តានុពលរបស់ខ្លួននៅក្នុងជួរកងទ័ពបានដែរ។
ការហ្វឹកហ្វឺនរបស់សាលា Ranger School ដែលបើកការអនុញ្ញាតឲ្យមានស្ត្រីចុះឈ្មោះចូលរៀនជាលើកដំបូងនេះ បានចាប់ផ្តើមកាលពីខែមេសា និងមានស្រ្តី១៩ចូលរួម តែមានតែស្រ្តីពីររូបប៉ុណ្ណោះដែលបានឆ្លងផុតដោយជោគជ័យលើវិញ្ញាសាយោធាដ៏លំបាក។ ភាពជោគជ័យរបស់ស្រ្តីពីររូបនេះ គឺជាជ័យជម្នះ ដ៏សំខាន់សម្រាប់អ្នកដែលការពារសិទ្ធិស្រ្តី និងគាំទ្រការធ្វើសមាហរណកម្មពេញលេញរបស់ស្ត្រី នៅក្នុងជួរកងទ័ព រួមមានទាំងមុខតំណែងក្នុងខ្សែប្រយុទ្ធ ដ៏គ្រោះថ្នាក់បំផុតផងដែរ។
គួររំលឹកថា មកទល់នឹងសព្វថ្ងៃនេះសហរដ្ឋអាមេរិក មានកងទ័ពជាស្ត្រីប្រមាណ១៥% ហើយ រដ្ឋបាលលោកអូបាម៉ាបាននិងកំពុងជំរុញបន្ថែមទៀត ដោយកាលពីឆ្នាំ២០១៣ បានសម្រេចថា រាល់តំណែងកងទ័ពទាំងអស់ត្រូវតែបើកអនុញ្ញាតឲ្យមានបេក្ខភាពជាស្ត្រី ចាប់ពីថ្ងៃទី១ខែមករាឆ្នាំ២០១៦តទៅ។
សេចក្តីសម្រេចនេះនឹងអនុវត្តជាទូទៅលើតំណែងកងទ័ពទាំងអស់ ទាំងជើងគោក ជើងអាកាស និងជើងទឹក។ ក៏ប៉ុន្តែកងកម្លាំងពិសេសមួយចំនួនមានសិទ្ធិអាចស្នើសុំឲ្យមានការលើកលែងការអនុវត្តន៍សេចក្តីសម្រេចនេះដោយមានមូលហេតុជាក់លាក់ ពិសេសដូចជាតំណែងទាហានមារីនថ្មើរជើង ដែលមកទល់នឹងពេលបច្ចុប្បន្ន ពុំទាន់មានស្រ្តីណាម្នាក់ អាចប្រលងជាប់វិញ្ញាសាដ៏លំបាកនៃការបណ្តុះបណ្តាលក្នុងវិស័យនេះនៅឡើយទេ។
ការហ្វឹកហ្វឺនរបស់សាលាយោធា Ranger School នេះមានរយៈពេល៦១ថ្ងៃ ដោយត្រូវហ្វឹកហាត់២០ម៉ោងក្នុង១ថ្ងៃ មានគោលដៅបណ្តុះបណ្តាលទាហានអង់អាច រាង្គកាយមាំមួន ស្មារតីខ្លាំងក្លា និងមានសមត្ថភាពដឹកនាំនៅក្នុងស្ថានភាពដ៏លំបាកបំផុត។
ជាទូទៅមានសិស្សត្រឹម៤០%ប៉ុណ្ណោះដែលអាចឈានដល់ចុងបញ្ចប់នៃការបណ្តុះបណ្តាលនេះ។
នៅពេលទទួលបានសញ្ញាបត្រពីសាលា Ranger មួយផ្នែកនឹងទៅបម្រើការនៅក្នុងកងវរសេនាធំទី៧៥ របស់ក្រុម Rangers ដែលជាកងទ័ពជើងគោកប្រើសម្រាប់ប្រតិបត្តិការពិសេស។ មួយផ្នែកទៀតនឹងត្រូវឋិតក្នុងកងពលដើមរបស់ខ្លួនដើម្បីចែករំលែកបទពិសោធន៍ ដែលនេះជាករណីរបស់ស្រ្តីទាំងពីរ ព្រោះថាកងវរសេនាធំទី៧៥នៅមិនទាន់បើកទទួលឲ្យស្ត្រីចូលបំរើការនៅឡើយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ